បញ្ជាឲ្យដោះលែងអ្នកទោស ជាស្ត្រីដែលមានកូនក្រោមអាយុ៤ឆ្នាំ និងស្រ្តីមានផ្ទៃពោះ របស់លោក ហ៊ុន សែន ត្រូវបាន​ទទួលការអបអរជាទូទៅ ជាពិសេស ពីសំណាក់មន្ត្រីឃ្លាំមើលសិទ្ធិមនុស្ស។ ប៉ុន្តែ ក្រុមមន្ត្រីទាំងនោះ នៅបង្ហាញ​នូវ​មន្ទិល​មួយចំនួន ដែលពាក់ព័ន្ធនឹងការដោះលែង ស្ត្រីទណ្ឌិតទាំងនោះ។

ប្រធានផ្នែកបច្ចេកទេសស៊ើបអង្កេត របស់អង្គការលីកាដូ លោក អំ សំអាត បាននិយាយប្រាប់ទស្សនាវដ្តី​មនោរម្យ.អាំងហ្វូ​ថា ធ្វើយ៉ាងណា ឲ្យការដោះលែងនោះ ត្រូវធ្វើឡើងជាលក្ខណៈទូទៅ មិនចំពោះ និងត្រូវបានពិនិត្យ ឲ្យបានជាក់លាក់ ចំពោះ​ស្រ្តីទាំងនោះ នូវបទល្មើសរបស់ពួកគាត់ ដែលបានទទួល។ ពិសេសចំពោះស្រ្តី ដែលជាបទឧក្រិដ្ឋ យ៉ាងណា​ការ​ដោះ​លែង អាចធ្វើទៅបាន លុះត្រាតែស្រ្តីនោះ បានទទួលទោសចំនួន២ភាគបី នៃទោសទាំងមូលជាមុនសិន ឬមួយ​យោង​​តាម​សភាព​ជំងឺ នៃស្រ្តីដែលត្រូវដោះលែង ជាកិច្ចចាំបាច់។

លោក សំអាត បានថ្លែងឲ្យដឹងថា៖ «ការដោះលែង ត្រូវធ្វើឡើងជាទូទៅ មិនថាស្រ្តីខាងជំលោះដីធ្លី ស្រ្តីមានពិរុទ្ធ ត្រូវតែ​ធ្វើឡើង បានគ្រប់បុគ្គលទាំងអស់ និងធ្វើឡើងគ្រប់ពេលវេលា ដែលមានការលើកលែងទោសនេះ និងត្រូវធ្វើឡើងគ្រប់ឆ្នាំ ដោយមិនចាំបាច់ មានការស្រែកជាថ្មី ដោយលោកនាយករដ្ឋមន្រ្តីនោះទេ។»

នៅថ្ងៃទី១២ ខែកុម្ភៈថ្មីៗនេះ លោកនាយករដ្ឋមន្រ្តី ហ៊ុន សែន បានស្នើដល់ក្រសួងយុត្តិធម៌ ឲ្យធ្វើការគិតគួរពីបញ្ហានេះ ប្រកប​ដោយភាពស្មោះត្រង់ តម្លាភាពនិងមិនលំអៀង។ លោកថា ការស្នើឲ្យមានការលើកលែង របស់លោក​នាយករដ្ឋ​មន្ត្រី នា​ពេលនេះ បានធ្វើឡើង ចំពោះអ្នកទោសណា ដែលមានសាលក្រមស្ថាពរប៉ុណ្ណោះ។ តែលោក ហ៊ុន សែន នឹង​មិន​អាច​ស្នើ ឲ្យលើកលែងទោស សម្រាប់ជនជាប់ចោទណា ដែលនៅកំពុងដំណើរការរឿងក្តី នៅតុលាការនោះឡើយ។

សម្រាប់ លោក នី ចរិយា ប្រធានស៊ើបអង្កេត និងជាមេធាវីតំបន់ នៃសមាគមការពារសិទ្ធិមនុស្ស អាដហុក ក្នុងកិច្ចសម្ភាស​ជាមួយទស្សនាវដ្តី មិនបានធ្វើការបកស្រាយអ្វីទេ ចំពោះបញ្ជាដ៏មានឥទ្ធិពល របស់លោកនាយករដ្ឋមន្រ្តី ដែលបង្គាប់ឲ្យ​មានការពិនិត្យ និងដោះលែងស្រ្តីមានកូន និងស្រ្តីមានផ្ទៃពោះ ពីពន្ធនាគារនោះទេ។ តែលោកបានបញ្ជាក់យ៉ាងខ្លីថា៖ «ករណី​នេះ ជារឿងនយោបាយ»។

សូមរំលឹកថា នាវិមានសន្តិភាព ក្នុងទិវាសិទ្ធិនារីអន្តរជាតិលើកទី១០៤ កាលពីថ្ងៃទី៨ ខេមីនា ម្សិលម៉ិញនេះ លោកនាយក​រដ្ឋមន្រ្តី ហ៊ុន សែន ក៏បានសំណូមពី ដោយក្តីមេត្តាពីបណ្តាអ្នកច្បាប់ សង្គមស៊ីវិល និងបុគ្គលមួយចំនួនទៀត កុំធ្វើការ​ទិទៀន ចំពោះសេចក្តីស្នើរបស់លោក ក្នុងការដោះលែងស្រ្តី និងការលើកលែងទោសស្រ្តីមានគភ៌ និងមានកូន​ពីក្នុង​ពន្ធនាគារ​នោះ។ លោក ហ៊ុន សែន បានថ្លែងឡើងថា៖ «សូមអ្នកច្បាប់ទាំងឡាយ និងអ្នកចូលចិត្តទិទៀននាយករដ្ឋមន្រ្តី មេត្តា​យោគយល់។ ខ្ញុំមិនបានបំពានអំណាចទេ។ (…) ខ្ញុំបានប្រើប្រាស់អំណាចរបស់ខ្ញុំ ត្រឹមត្រូវតាមច្បាប់។ នោះគឺច្បាប់ ស្តីពី​ពន្ធនាគារ ដែលបើកច្រកឱ្យនាយករដ្ឋមន្រ្តី ស្នើសុំព្រះរាជទានទោស នៅពេលណាក៏បាន ឲ្យតែសាលក្រមចេញជា​ស្ថាពរ​ហើយ ធ្វើបានហើយ។»

អង្គការការពារសិទ្ធិមនុស្ស លីកាដូ ក្នុងសេចក្តីថ្លែងការណ៍របស់ខ្លួន ដែលបានដាក់ទៅកាន់នាយករដ្ឋមន្រ្តី នាពេល​កន្លង​មក បានបង្ហាញថា កុមារដែលស្ថិតក្នុងពន្ធនាគារ ជាមួយម្តាយរបស់ខ្លួន ដែលកំពុងមានទោសនោះ បាននឹងកំពុង​ប្រឈម​មុខពីបញ្ហាសុខភាព ជាមយយនឹងការលូតលាស់ ផ្នែកបញ្ញាស្មារតី។ សេចក្តីថ្លែងការណ៍នោះ បានសរសេរបន្តថា កុមារ​ដែល​មានអាយុក្រោមបួនឆ្នាំ កង្វះខាតផ្នែកអប់រំ ការថែរទាំ ភាពយឺតយ៉ាវ នៃការលូតលាស់ផ្នែកស្មារតី និងរាង​កាយ​ជាដើម។

ស្ត្រីទាំង២២នាក់ ដែលត្រូវបានធ្វើការដោះលែង ក្នុងថ្ងៃសិទ្ធិនារីនោះ ស្រ្តី១៣នាក់ ពាក់ព័ន្ធនឹងការជួញដូរ និងប្រើប្រាស់​គ្រឿងញៀន។ ស្រ្តី៣នាក់ ពាក់ព័ន្ធនឹងបទចោរកម្ម។ ស្រ្តី ២នាក់ពាក់ព័ន្ធ នឹងអំពើឃាតកម្ម ការប៉ុនប៉ងធ្វើមនុស្សឃាត។ ២នាក់ពាក់ព័ន្ធ នឹងបទប្រព្រឹត្តិអំពើហិង្សា និងជះទឹកអាស៊ីត។ រីឯ២នាក់ចុងក្រោយ ពាក់ព័ន្ធនឹងបទសញ្ចារកម្ម និងបង្ក​របួសស្នាម។ លោក អំ សំអាត បានអះអាងថា ស្រ្តីចំនួន៣៨នាក់ ផ្សេងទៀត ដែលមានផ្ទៃពោះ និងមានកូននៅ​ជាមួយ​នាក់ក្នុងពន្ធនាគារនោះ ក៏នឹងធ្វើការដោះលែងជាបន្តទៀត ក្នុងឱកាសចូលឆ្នាំខ្មែរខាងមុខនេះ។ ការងារនេះ លោកនឹង​បន្ត​ការតាមដាន និងឃ្លាំមើលពីតម្លាភាព និងអព្យាក្រិត្យភាព នៃការដោះលែងជាបន្ត មិនថាក្នុងពន្ធនាគារ នៅក្រុង ឬខេត្ត​ឡើយ។

តាមព្រះរាជក្រិត្យ ដែលគ្មានហត្ថលេខាង និងមានឈ្មោះលោក ជា ស៊ីម នោះ បានសរសេរបញ្ជាក់ថា ស្រ្តីចំណោម​២២​នាក់ ដែលត្រូវធ្វើការដោះលែងនោះ មានអាយុចន្លោះ ពី១៧ឆ្នាំ ទៅ៤០ឆ្នាំ រួមមានម្នាក់ដែលមានទោស តិចជាងគេ គឺ​ដប់​ខែ និងបីនាក់ មានទោសខ្ពស់ជាងគេ ដល់ទៅ១៥ឆ្នាំ។ ក្រៅពីនោះ សុទ្ធសឹងតែជាស្ត្រីមានទោស ចន្លោះពី១ឆ្នាំ ទៅ​៥ឆ្នាំ។

តាមអ្នកនាំពាក្យក្រសួងយុត្តិធម៌ លោក គឹម សន្តិភាព បានបង្ហាញថា ស្ត្រីអ្នកទោសមានកូនរស់នៅជាមួយ ក្នុងពន្ធនាគារ ចំនួន២១នាក់ និងស្ត្រីមានផ្ទៃពោះ០១នាក់ ដែលទទួលបាន ការលើកលែងទោស៕