ស្របពេលដែលអង្គការសហប្រជាជាតិ និងរដ្ឋាភិបាលកម្ពុជាកំពុងសហការគ្នា ដើម្បីលុបបំបាត់​ការធ្វើ​ទារុណកម្ម​លើជនជាប់ឃុំ និងទទូចឲ្យមានការគាំទ្រពីអង្គការសង្គមស៊ីវិលផងដែរនោះ អ្នកច្បាប់កម្ពុជា​ក៏​បាន​សាទរ​ចំពោះ​យន្តការនេះ ហើយថែមទាំងបានបង្ហាញ ពីរបៀបទប់ស្តាត់បញ្ហានេះឲ្យមានប្រសិទ្ធភាពផងដែរ។

អ្នកទោសដែលត្រូវបានមន្ត្រីពាក់ខ្នោះដៃ មុននឹងបណ្ដើរចេញទៅក្រៅ។ (រូបថត MONOROOM.info/ O.Vary)

ប្រព័ន្ធយុត្តិធម៌ - ជុំវិញបញ្ហានេះ លោក សុក សំអឿន នាយកប្រតិបត្តិនៃក្រុមអ្នកច្បាប់ការពារសិទ្ធិកម្ពុជា ក្នុងកិច្ច​សម្ភាស​ជា​មួយ​ទស្សនាវដ្តីមនោរម្យព័ងអាំងហ្វូ នៅថ្ងៃទី១៨ ខែធ្នូ ឆ្នាំ២០១៣ បានលើកឡើងថា បើយោងលើ​ការ​ត្អូញត្អែរ​របស់​ជនជាប់ចោទ រហូតមកដល់បច្ចុប្បន្ននេះ ករណីធ្វើទារុណកម្មលើជនជាប់ឃុំ ក្នុងពន្ធនាគារកម្ពុជា នៅ​តែមានកើត​ឡើងនៅឡើយទេ។ ហើយលើសពីនេះ ករណីមួយចំនួនមានជាប់ពាក់ព័ន្ធ​នឹងរឿងនយោបាយ​ទៀត​ផង។

ចំពោះដំណោះស្រាយបញ្ហានេះ លោក សុក សំអឿន បានពន្យល់ថា បើគ្រាន់តែមានអង្គភាពបង្កាអំពើទារុណកម្ម និងការសហការជាមួយដៃគូពាក់ព័ន្ធ វាជាការពិបាកជឿជាក់ណាស់ដែលថា ស្ថាប័ននេះនឹងមានសមត្ថភាព និង​ប្រសិទ្ធិភាពការងារគ្រប់គ្រាន់ សម្រាប់ការទប់ស្កាត់ ការធ្វើទារុណកម្មលើជនជាប់ឃុំ ខណៈចំណុចរសើប​នៃបញ្ហា​នេះ មិនត្រូវបានលើកយកមកដោះស្រាយ។

លោក សុក សំអឿន បញ្ជាក់ថា គេត្រូវធ្វើកំណែទម្រង់លើចំណុចសំខាន់ៗមួយចំនួនទៀត ដូចជា៖

១. លុបមាត្រា៩៨ នៃក្រមនីតិវិធីព្រហ្មទណ្ឌ ដែលហាមមិនឲ្យមេធាវីជួបជនសង្ស័យពេលចាប់ខ្លួនភ្លាម។ ហើយ​ក៏ត្រូវអនុញ្ញាតឲ្យជនជាប់ចោទ ជួបមេធាវីភ្លាមផងដែរ។

២. ផ្តល់ការហ្វឹកហ្វឺនមន្រ្តីនគរបាលឲ្យមានជំនឿថា ជនជាប់ចោទអាចមានទោស ដោយមិនចំបាច់មាន​ចម្លើយ​សារភាព ឲ្យតែនគរបាល ឬព្រះរាជអាជ្ញាមានភស្តុតាងគ្រប់គ្រាន់ សម្រាប់ដាក់បន្ទុក។

៣. កែក្រមនីតិវិធីព្រហ្មទណ្ឌ ដោយអនុញ្ញាតឲ្យនគរបាល នៅតែមានសិទ្ធិបន្ថែមភស្តុតាង​រហូតដល់ចៅក្រម​ស៊ើប​ចេញដីការដំណោះស្រាយ។

និងទី៤. ការសង់បន្ទប់ឃាត់ខ្លួននៅតាមស្ថានីយនគរបាល ឲ្យមានស្តង់ដាជាដើម។

ទាក់ទងបញ្ហានេះ នៅសណ្ឋាគារ អ៊ិនធើខន់ធីណិនថល(Intercontinental) ថ្ងៃទី១៧ ខែធ្នូ ឆ្នាំ២០១៣ ក្នុងពិធីបិទ​សិក្ខាសាលាស្ដីពីការបង្កើតស្ថាប័នឯករាជ្យ ដើម្បីទប់ស្កាត់ការធ្វើទារុណកម្មលើជនជាប់ឃុំ ដែលរៀបចំដោយ​ការិយាល័យនៃឧត្ដមស្នងការទទួលបន្ទុកសិទ្ធិមនុស្សប្រចាំកម្ពុជា លោក ស ខេង ជារដ្ឋមន្រ្តីក្រសួងមហាផ្ទៃ បាន​លើកឡើងថា កម្ពុជាមិនទាន់អាចដំណើរការបានល្អប្រសើរនៅឡើយទេ ចំពោះការទប់ស្កាត់ការធ្វើ​ទារុណកម្ម​លើ​ជនជាប់ឃុំ ព្រោះកម្ពុជានៅខ្វះខាតនៅឡើយ ទាំងបច្ចេកទេស បទពិសោធន៍ និងធនធានសម្ភារៈជាដើម។

លោក ស ខេង បន្ថែមថា ហេតុនេះទាមទារឲ្យគ្រប់សមាសភាព មានអង្គការសង្គមស៊ីវិល និងដៃគូម្ចាស់​ជំនួយ​ដទៃ​ទៀត គួរជួយជ្រោមជ្រែងកិច្ចការនេះ ដើម្បីឲ្យការអនុវត្តលើវិស័យសិទ្ធិមនុស្ស និងផ្នែកផ្សេងទៀតអាចប្រព្រឹត្ត​ទៅ​ប្រកបដោយថាមពល ឯករាជ្យ ប្រកាន់ខ្ជាប់វិជ្ជាជីវៈ សុចរិតភាព តម្លាភាព និងប្រសិទ្ធិភាពការងារផងដែរ៕

---------------------------------------
ដោយ៖ អ៊ុំ បូរី - ភ្នំពេញ ថ្ងៃទី១៨ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ