ក្នុងសំនុំរឿងឧក្រិដ្ឋកម្ម ទៅលើឪពុកម្ដាយខ្លួនឯង ដែលឪពុកអាយុ៦៥ឆ្នាំ និងម្ដាយអាយុ៦២ឆ្នាំនេះ បុរស ហង់រី ឆូ ហ័យលឿង (Henry Chau Hoi-Leung) អាយុ៣១ឆ្នាំ ត្រូវបានរកឃើញពីទោសកំហុស នៅក្នុងសវនាការ កាលពីថ្ងៃ​សុក្រ​សប្ដាហ៍​មុន ពីទង្វើ ដ៏​សាហាវ​ព្រៃផ្សៃ របស់ខ្លួន ដែលបានប្រព្រឹត្តិ កាលពីឆ្នាំ២០១៣កន្លងមក។

នៅក្នុងសវនាការ ចៅក្រមបានដឹងថា ពីវិធីសាស្ត្រដ៏ហួសចិត្ត ដែលជនជាប់ចោទ បានកាប់ឪពុកម្ដាយរបស់ខ្លួន ជា​កំណាត់ៗ រួចយកទៅចំអិន ក្នុងពេលបន្ទាប់មក។ ក្រោយពីចំអិនរួច បុរសនេះបានសាច់ចំអិនរួចទាំងនោះ មកខ្ចប់ជា​ប្រអប់ៗ ដាក់លាយជាមួយបាយ ដែលមានលក្ខណៈ ដូចទៅនឹង «បាយសាច់ជ្រូកអាំង» យ៉ាងដូច្នោះ។ សវនាការ​បាន​ដឹង​ទៀត​ដែរថា បុរសម្នាក់នេះ បានរៀបគម្រោងសម្លាប់ឪពុកម្ដាយរបស់ខ្លួន ក្នុងរយៈពេល៦ខែ។

នៅប៉ុន្មានថ្ងៃក្រោយការបាត់ខ្លួន គេបានរកឃើញ ក្បាលរបស់ឪពុក លោក ឆូ វីងគី (Chau Wing-ki) និងម្ដាយ អ្នកស្រី សួយ យ៉េតយី (Siu Yuet-yee) ដាក់ក្នុងទូទឹកកក ដែលស្ថិតនៅក្នុង បន្ទប់ស្នាក់នៅមួយ ដិតដាមទៅដោយឈាម។ បន្ទប់​​ស្នាក់​នៅ​នោះ ជារបស់មិត្តភ័ក្រមួយរូប របស់ជនសង្ស័យ។ រីឯឆ្អឹង ឬសំណល់អ្វីទៀត ត្រូវបានរកឃើញ នៅ​ក្នុង​ធុង​សម្រាម។

ជនជាប់ចោទ បានរាយការណ៍ប្រាប់អ្នកស៊ើបអង្កេតថា ឪពុកម្ដាយរបស់ខ្លួន បានធ្វើដំណើរ ទៅកាន់ប្រទេសចិនដីគោក ទាំងពីរនាក់។ ប៉ុន្តែ នៅពេលក្រោយមក បុរសនេះបានសារភាព ពីសកម្មភាពមនុស្សឃាតរបស់ខ្លួន ដាក់ក្នុងប្រព័ន្ធ​សារ​សម្លេង របស់ទូរស័ព្ទដៃ។ ហង់រី ឆូ ហ័យលឿង ខ្លួនឯង បាននិយាយថា ខ្លួនមាន«រោគចិត្ត» ប្រាប់ទៅក្រុមអ្នកជំនាញ ដែល​ទទួលបន្ទុក ធ្វើការក្នុងសំនុំរឿងនេះ។ ហង់រី បាននិយាយទៀតថា៖ «ខ្ញុំគ្មានមនោសញ្ចេតនាអ្វីសោះ ជាមួយនឹង​ការ​​ឈឺចាប់ ដ៏ហួសហេតុទាំងឡាញ ដែលបានកើតឡើង ដោយសាររឿងរ៉ាវជាច្រើន តាំងពីកុមារ និងពេលខ្ញុំ​ចូលវ័យ​ជំទង់»។

ជនជាប់ចោទ បានថ្លែងឲ្យដឹងថា ខ្លួន«ស្អប់»ឪពុករបស់ខ្លួនជាខ្លាំង ដែលតែងតែបានបដិសេធ មិនព្រមបិទសម្លេង​ទូរទស្សន៍ នៅពេលខ្លួនធ្វើកិច្ចការសាលា។ រីឯម្ដាយរបស់ខ្លួនវិញ ត្រូវបានបុរសនេះ ចាប់កំហុសថា ស្ដ្រីចំណាស់​តែង​ស្ដីថា​ឲ្យ​ខ្លួន មិនលោះពេល។

ចំណែកឯមិត្ត របស់ជនជាប់ចោទវិញ បានសម្រេចទោសរបស់ខ្លួន ចំនួនពីរឆ្នាំ នៅក្នុងពន្ធនាគាររួចហើយ ពីបទ​«ឃុប​ឃិត» ចូលរួមក្នុងឧក្រិដ្ឋកម្មនេះ៕