នេះសម្រាប់ខ្មែរយើង គេអាចហៅថា ភ្លឹក ឬបើតាមជំនឿ គេនិយាយថា មិនទាន់អស់អាយុ មច្ចុរាជបានព្រលែង ព្រលឹង​ឲ្យមករក ខ្លួនប្រាណវិញ។ កាលពីថ្ងៃអាទិត្យកន្លងមកនេះ ដូនចាស់ចំណាស់ជាង៩០ឆ្នាំ ដែលរស់នៅក្នុងក្រុង ហ្សែល​សេន​គីឆេន (Gelsenkirchen) ប្រទេសអាល្លឺម៉ង់ ត្រូវបានប្រកាសជាផ្លូវការ ថាបានស្លាប់ហើយ ដោយក្រុមគ្រូពេទ្យ នៃមណ្ឌលសម្រាប់ជនចូលនិវត្តន៍មួយកន្លែង។ ប៉ុន្តែនៅពេលដែលគេនាំ សាកសពលោកយាយ មកដល់ទីបញ្ចុះសព ស្រាប់តែដូនចាស់ បានភ្ញាក់ដឹកខ្លួនមកវិញ បង្កឲ្យមានការភ្ញាក់ផ្អើលយ៉ាងខ្លាំង។ នេះបើតាមការផ្សាយឲ្យដឹង ពី​សារព័ត៌មាន​ក្នុងស្រុក ជាច្រើន។

«ខ្ញុំនៅទីណាអញ្ចេះ?» នេះជាសម្លេងរបស់ដូនចាស់ អាយុ៩២ឆ្នាំរូបនេះ ដែលបានព្យាយាម បើកគម្របមឈូស ជាមួយ​គ្រាប់ភ្នែក បើកឡើងសម្ដែងចំងល់។ យើងពិបាកនឹងស្រម័យណាស់ ប្រសិនណា ជាមឈូសរបស់លោកយាយ ត្រូវ​បាន​បញ្ចុះរួចរាល់... នៅពេលនោះ បើទោះលោកយាយ ដឹងខ្លួនមកវិញ ក៏ពិបាកនឹងគាស់ គម្របក្ដាមឈូសនៅក្រោមដី នោះ​ដែរ ហើយករណីនេះ នឹងក្លាយជាការបញ្ចុះមនុស្ស «ទាំងរស់»។

អ្នកនាំពាក្យនគរបាល នៃទីក្រុង បានថ្លែងប្រាប់អ្នកសារព័ត៌មានថា៖ «ដូនចាស់ បានត្រូវការ ឲ្យមានការព្យាបាល​ខ្លាំង​ក្លា​មួយ។ គាត់បានទន្ទឹងចាំ សេចក្ដីស្លាប់។» រីឯប្រធានមណ្ឌល សម្រាប់ជនចូលនិវត្តន៍វិញ បានថ្លែងឡើង ទាំងសោក​ស្ដាយ​ថា​៖ «ជារឿងមួយតក់ស្លុតណាស់ ហើយមិនអាចពន្យល់បានទេ»។

ប៉ុន្តែដូនចាស់ មិនបានរស់មកវិញ ដើម្បីបានសប្បាយ ក្នុងជីវិតសារជាថ្មីនោះទេ ព្រោះគាត់បានស្លាប់«មែនទែន» នា​រសៀល​​ថ្ងៃចន្ទ នៅក្នុងមន្ទីរពេទ្យមួយ ដែលគេបានយកគាត់ មកសម្រាកព្យាបាលវិញ។ នេះបើតាមអាជ្ញាធរ នៅក្នុង​តំបន់​ដដែល។ យ៉ាងណាក៏ដោយ ការស៊ើបអង្កេតមួយបានបើកធ្វើ ដើម្បីពន្យល់ឲ្យដឹងថា ហេតុអ្វីបានជាក្រុម​គ្រូពេទ្យ​មុននេះ បានប្រកាសថា ដូនចាស់បានស្លាប់ទៅហើយនោះ៕