យន្ដហោះ MH370 មិនបានទៅបញ្ចប់វាសនារបស់ខ្លួន នៅក្នុងលំហខាងត្បូង នៃមហាសមុទ្រឥណ្ឌានោះទេ ប៉ុន្តែ​យន្ដហោះ ត្រូវបានចាប់ពង្រត់ ឆ្ពោះទៅកាន់... ប្រទេសរ៉ូស្សី ឬតំបន់ណាមួយ ដែលនៅក្បែរនោះ។ នេះបើតាម​ការអះ​អាង របស់​អ្នក​ជំនាញ​មួយ​រូប។

លោក ចេហ្វ វីស្ស៍ (Jeff Wise) អ្នកជំនាញខាងអាកាសចរណ៍ស៊ីវិល និងជាអ្នកនិពន្ធជាតិអាមេរិក បានបង្ហាញ​ការជឿ​ជាក់របស់លោក បន្ទាប់ពីបានស្រាវជ្រាវ ទៅទិន្នន័យទាំងឡាយ ដែលទាក់ទងនឹងការបាត់ខ្លួន យ៉ាងចម្លែករបស់​យន្ដហោះ MH370 ថា អ្នកដែលស្គាល់ យន្ដហោះប្រភេទប៊ូអីង ៧៧៧ នេះច្បាស់ ទំនងជាអ្នក ដែលគួរឲ្យសង្ស័យខ្លាំង​ជាងគេ ក្នុងការផ្លាស់ប្ដូរអ្វីៗ សម្រាប់ជើងហោះហើរ នៅពេលនោះ។ លោកបានទម្លាក់ការសង្ស័យ ទៅរកប្រទេសរ៉ូស្សី ដោយ​ហេតុ​ថា ប្រទេសមហាអំណាចមួយនេះ មានឧស្សាហកម្ម អាកាសចរណ៍រីកចំរើនខ្លាំង ជាពិសេសបច្ចេកវិទ្យា ដែល​​អាច​បង្វិល​ទិន្នន័យ នៃ​ការ​ហោះ​ហើរ​បាន។

ថ្លែងប្រាប់សារព័ត៌មានចិនដ៏ធំមួយ ឈ្មោះ South China Morning Post កាលពីថ្ងៃទី១៨ ខែមីនានេះ លោក វីស្ស៍ បាន​បញ្ជាក់ថា ពីក្នុងចំណោមអ្នកដំណើរទាំង២៣៩នាក់ មានអ្នកដំណើរបីនាក់ ជាជនជាតិរ៉ូស្សី។ ហើយជនជាតិរ៉ូស្សីម្នាក់ បានអង្គុយនៅក្នុងបន្ទប់ VIP ដែលស្ថិតនៅមិនឆ្ងាយប៉ុន្មាន ពីប្រអប់អេឡិចត្រូនិក ដែលបញ្ជាខាងបច្ចេកទេស របស់​យន្ដហោះ។ ប៉ុន្តែការសង្ស័យរបស់លោក មិនមានត្រឹមតែជនជាតិរ៉ូស្សី ទាំងបីនាក់នេះទេ តែលោកជឿជាក់ថា អាច​​នឹង​មាន​ជំនួយ ពីរដ្ឋការនៃប្រទេសរ៉ូស្សីនោះ ថែមទៀត។ លោកបានថ្លែងឡើងថា៖ «ករណីនេះ ត្រូវការយុទ្ធនាការនៃ​ការ​ចាប់​ពង្រត់​មួយ ដែលមានលក្ខណៈស្មុគ្រស្មាញ ប្រកបដោយបច្ចេកទេសជ្រៅជ្រះ ដែលចាំបាច់ត្រូវមានជំនួយ ពី​រដ្ឋាភិបាល​នៃ​ប្រទេស​ណាមួយ»។

លោកបានអះអាងទៀតថា មូលហេតុ ដែលមានការបង្វែ ទិន្នន័យហោះហើរនេះ គឺដើម្បីបំភ័ន្ដអាជ្ញាធរ នៃប្រទេស​ដែល​ពាក់ព័ន្ធ ជាមួយនឹងយន្ដហោះ MH370។ បន្ទាប់មក យន្ដហោះ ទំនងជាត្រូវបានចាប់ពង្រត់ ទៅកាន់ទិសដៅមួយ ក្នុង​ប្រទេស​កាហ្សាក់ស្ដង់ ឬតំបន់ក្បែរនោះ។ ការសង្ស័យរបស់លោក វីស្ស៍ ប្រហាក់ប្រហែលនឹងការរកឃើញ កាលពី​ដំបូង​ឡើយ ដោយ​ក្រុម​អ្នក​ស៊ើប​អង្កេតម៉ាឡេស៊ី ដែលអះអាងថា យន្ដហោះត្រូវបានបង្ហោះ ចេញពីគោលដៅដើម ទៅរក​ទិស​ពីរផ្សេងគ្នា៖ ទី១ ទៅកាន់មហាសមុទ្រឥណ្ឌា និងទី២ទៅកាន់ភូមិភាគអាស៊ីខាងលិច ឬអ៊ឺរ៉ុបខាងកើត។

យ៉ាងណាក៏ដោយ បន្ទាប់ពីយន្ដហោះប៊ូអីង របស់ក្រុមហ៊ុនម៉ាឡេស៊ីអែរឡាញ មួយនេះ បានបាត់ខ្លួនយ៉ាង​អាថ៌កំបាំង​រួច ការសិក្សា​ស្រាវ​ជ្រាវ និងការរកឃើញ ជាលក្ខណៈឯកជនជាច្រើន ត្រូវបានចេញផ្សាយ ជាបន្តបន្ទាប់។ ពីក្នុងការ​រក​ឃើញ​ទាំងនោះ មាន​​ការសន្និដ្ឋានខ្លះនិយាយថា បានឃើញយន្ដហោះ នៅប្រទេសអាហ្វហ្គានីស្ដង់ ខ្លះទៀតថា​យន្ដហោះ ត្រូវ​បាន​កង​​ទ័ព​​អាមេរិក​បាញ់ទម្លាក់... និងខ្លះទៀតថា យន្ដហោះបានហោះទៅកាន់ ទ្វីបទឹកកក ស្ថិតនៅ​ភាគ​ខាងត្បូង នៃ​ផែន​ដី។ ប៉ុន្តែ ​មិន​ដែល​មាន ការសិក្សាណាមួយ ត្រូវបានបញ្ជាក់ ទទួល​យក​ជាផ្លូវការនោះឡើយ។

» សូមអានរាល់អត្ថបទ ដែលទាក់ទងនឹងរបកគំហើញទាំងនោះ ដោយចុចនៅលើទីនេះ៕