អ្នកដែលតាមដាន ពីការបាត់ខ្លួនដ៏ចម្លែករបស់យន្ដហោះប៊ូអីង កាលពីជាងពីរសប្ដាហ៍មុន ពិតជាចង់ដឹងណាស់​ថាតើមានរឿងអ្វីកើតឡើង ដែលបង្កឲ្យយន្ដហោះដឹកមនុស្ស២៣៩នាក់ បានបាត់ស្រមោលរហូតឈឹង គ្មានដំណឹង​រហូតមកដល់ថ្ងៃនេះ? រឿងកាន់តែចម្លែកទៅទៀត នៅពេលដែលការស៊ើបអង្កេតបានដាក់ការសង្ស័យ ទៅអ្នកបើក​បរយន្ដហោះទាំងពីររូប ដែលពីមុនមកគ្មាននរណាម្នាក់នឹកស្មានដល់នោះ។ សារព័ត៌មានមួយរបស់អង់គ្លេស បាន​រក​ឃើញ «កិច្ចសន្ទនាចុងក្រោយបង្អស់» របស់អ្នកបើកបរយន្ដហោះទាំងពីរ នៅមុនប្រព័ន្ធទំនាក់ទំនង​របស់​យន្ដហោះ ត្រូវបានកាត់ផ្ដាច់ចេញពីប្រព័ន្ធចាប់រលកអាកាស នៅលើផែនដី។

បន្ទប់បើកបររបស់យន្ដហោះ នៅពេលយប់។ (រូបថត Getty Images)

បាត់យន្ដហោះ - បើទោះជា យន្ដហោះប៊ូអីង ៧៧៧ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ដែលបាន​បាត់ខ្លួនតាំងពីជាងពីរសប្ដាហ៍មកនោះ ទើបនឹងត្រូវបានប្រកាសជាផ្លូវការ ដោយនាយករដ្ឋមន្ត្រីម៉ាឡេស៊ី ថាបាន​ធ្លាក់នៅលំហខាងត្បូង នៃមហាសមុទ្រឥណ្ឌានោះក៏ដោយ តែការស៊ើបអង្កេតស្ដីពី មូលហេតុដែលធ្វើឲ្យ​យន្ដហោះ​នេះ ចាកចេញពីផ្លូវរត់របស់ខ្លួន នៅតែបន្តធ្វើនៅឡើយ។

សារព័ត៌មាន តេឡេហ្គាហ្វ ( Telegraph) របស់អង់គ្លេស បានចេញផ្សាយអត្ថបទមួយរបស់ខ្លួន ស្ដីពីកិច្ចសន្ទនា​ចុង​ក្រោយរបស់អ្នកបើកបរទាំងពីរនាក់ ពីបន្ទប់បើកបរលើយន្ដហោះ មកកាន់បន្ទប់ត្រួតពិនិត្យការហោះហើរ នៅព្រលាន​យន្ដហោះអន្តរជាតិកូឡាឡំពួរ។

អ្នកជំនាញមួយរូប ដែលត្រូវបានដកស្រង់សម្ដីដោយ សារព័ត៌មានអង់គ្លេសនេះ បានវាយតម្លៃជារួមពីសារ​ដែល​ទទួលបាន ទៅលើកិច្ចសន្ទនាទាំងនោះ ថាមានលក្ខណៈ«ធម្មតា»។ តែសារចំនួន«ពីរ» ពីក្នុងនោះ បានធ្វើឲ្យមាន​ការសង្ស័យ ពីការចាប់ពង្រត់យន្ដហោះ។

កិច្ចសន្ទនាមានរយៈពេល៥៤នាទី ចាប់បីពេលដែលបន្ទប់ត្រួតពិនិត្យការហោះហើរ បានទាក់ទងជាមួយ​យន្ដហោះ​ប៊ូអីងដំបូង (ម៉ោង ០ និង២៥នាទី នៅរដ្ឋធានីកូឡាឡំពួរ) រហូតដល់ពេលដែលការទាក់ទងបានបាត់ (វេលាម៉ោង ១ និង១៩នាទី។ យន្ដហោះបានបង្ហើបខ្លួនពីដី នៅម៉ោង០ និង៤២នាទី ដើម្បីអាចហោះនៅកំពស់បណ្ដែតខ្លួនមួយ នៅ​ម៉ោង ០១ និង០១នាទី។

អ្វីដែលគួរឲ្យចាប់អារម្មណ៍នោះ គឺនៅ ៦នាទីក្រោយមក សារសម្លេងមួយ  ផ្ញើរចេញពីបន្ទប់បើកបរយន្ដហោះ បាន​បង្ហាញឲ្យបន្ទប់ត្រួតពិនិត្យការហោះហើរ លើផែនដី ដឹងពី«បំណងចង់ឲ្យរក្សានូវរយៈកំពស់»នេះ។ សារព័ត៌មាន បាន​សរសេរថា «ជាសារសម្លេងមួយ ដែលមិនមានភាពចាំបាច់»។

កាលពីដើមសប្ដាហ៍មុន សម្ដីចុងក្រោយពីម៉ាត់ របស់អ្នកជំនួយការបើកបរ ក៏ត្រូវ​បានគេទម្លាយចេញ​មកឲ្យដឹង​ដែរ។ សម្ដីជូនពរ«អញ្ចឹង រាត្រីសួស្ដី!» របស់លោក ហ្វារីក អាឌុល ហាមីដ (Fariq Abdul Hamid) អាយុ ២៧ បានបន្លឺ​ឡើង​នៅ១៧នាទីក្រោយពេលប្រព័ន្ធទាក់ទងរបស់យន្ដហោះ ត្រូវបានកាត់ផ្ដាច់ ហើយបានបង្កឲ្យមានមន្ទិលកាន់តែខ្លាំង ពីការប៉ុនប៉ងចាប់ពង្រត់យន្ដហោះ ថាតើលោកនិយាយទៅរកនរណា នៅក្នុងបន្ទប់បើកបរ?

ចំណុចសំខាន់មួយទៀត ដែលអាចបង្ហាញពីការប៉ុនប៉ងចាប់ពង្រត់យន្ដហោះនោះ គឺយន្ដហោះ ប៊ូអីង ៧៧៧ បាន​ងាកចេញពីផ្លូវហោះហើររបស់វា នៅក្រោយបន្តិចពីការហោះចេញផុតពីដែនអាកាសម៉ាឡេស៊ី និងនៅមុនបន្តិច ពេលដែលយន្ដហោះហោះទៅដល់ ដែនអាកាសរបស់ប្រទេសវៀតណាម។

អតីតអ្នកបើកបរយន្ដហោះមួយរូប បានថ្លែងប្រាប់សារព័ត៌មានថា «បើខ្ញុំចង់លួចពង្រត់យន្ដហោះ ខ្ញុំក៏ធ្វើ​សកម្មភាព​នេះ នៅចំណុចនោះដែរ»។ អតីតបុគ្គលិករបស់ក្រុមហ៊ុនអាកាសចរណ៍របស់អង់គ្លេស ប្រ៊ីធីស អ៊ែរឡាញ បានថ្លែងថា «ជាពេលតែមួយគត់ ដែលគេមិនអាចធ្វើការកត់សម្គាល់បាន ពីផែនដីមក»៕

-----------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស​ ថ្ងៃទី២៤ មីនា ២០១៤