យន្ដហោះប៊ូអីង (Boeing 737) របស់ក្រុមហ៊ុនអាកាសចរណ៍កាណាដា «WestJet» ដែលជាជើង​ហោះ​ហើរ​ក្នុង​ស្រុក លេខ WS442 ហោះភ្ជាប់ក្រុង «Edmonton» និងក្រុង «Toronto» ត្រូវបានប្ដូរផ្លូវ ឆ្ពោះទៅកាន់​ព្រលាន​យន្ដហោះ ក្រុង «Winnipeg» ក្រោមមូលហេតុ មានការគម្រាមមួយ។ នេះជាការប្រកាស របស់​ក្រុមហ៊ុន​អាកាស​ចរណ៍ខ្លួនឯង នៅក្នុងគណនីទ្វីសធើរផ្លូវការរបស់ខ្លួន នៅវេលាម៉ោងប្រមាណជិត ២២ (ម៉ោង​ក្នុង​ស្រុក) យប់​ថ្ងៃចន្ទ។ ប៉ុន្តែក្រុមហ៊ុនមិនបានបញ្ជាក់លំអិត ថាតើការគម្រាមនោះ ជាអ្វី និងបណ្ដាលមកពី​អ្វី​នោះ​ឡើយ។

បន្ទាប់ពីបានចុះចត នៅក្នុងក្រុង «Winnipeg» ក្រុមហ៊ុនបានរាយការណ៍ទៀតថា អ្នកដំណើរទាំង៥៤នាក់ និងបុគ្គលិកលើយន្ដហោះ ៥នាក់ ត្រូវបានជម្លៀសចេញពីយន្ដហោះ ដោយមានជំនួយការ ពីផ្នែក​សុវត្ថិភាព​ព្រលានយន្ដហោះនោះផង។

ពោងសង្គ្រោះរបស់យន្ដហោះ ត្រូវបានពន្លា នៅតាមច្រកទ្វាយន្ដហោះ ដើម្បីរំដោះមនុស្សចេញ ហើយនៅ​ក្នុង​ការរំដោះមនុស្ស ជាបន្ទាន់នេះ អ្នកដំណើរ៦នាក់ បានរងរបួសស្រាល។

ចាកចេញពីក្រុង «Edmonton» ផ្នែកខាងលិចនៃប្រទេសកាណាដា នៅម៉ោង១៨ និង០៥នាទី យន្ដហោះនេះ​ត្រូវមកចុះចត ៣ម៉ោងក្រោយមក នៅព្រលានយន្ដហោះ ក្រុង«Toronto» ភាគខាងកើតនៃប្រទេស។ តែ​យន្ដហោះ បានចាប់ផ្ដើមប្ដូរទិសដៅរបស់ខ្លួន នៅពេលដែលហោះនៅពីលើក្រុង «Manitoba» និងបាន​ទៅចុះ​ចតនៅព្រលានយន្ដហោះ ភាគអាគ្នេយ៍នៃក្រុង«Winnipeg»។

នៅក្នុងយប់ថ្ងៃដដែលនោះ នគរបាលក្រុង បានចូលមកឆែកឆេរគ្រប់កន្លែងទាំងអស់ នៃតួយន្ដហោះ។ ដំណឹង​ក្រៅផ្លូវការមួយ បានឲ្យដឹងថា ការគម្រាមនោះ មានជាប់ទាក់ទងនឹងការដាក់គ្រាប់បែកមួយ ប្រឆាំងនឹង​យន្ដហោះ​របស់ក្រុមហ៊ុន។

ដំណឹងទើបនឹងធ្លាក់មកថ្មីទៀត បានឲ្យដឹងដែរថា យន្ដហោះមួយគ្រឿងទៀត ដែលហោះចេញពីក្រុង «Toronto» ឆ្ពោះទៅកាន់ក្រុង «Saskatoon» បានរងនូវការគម្រាមដូចគ្នា នៅវេលាយប់ម៉ិញនេះ ធ្វើឲ្យ​យន្ដហោះ​ត្រូវចុះចត នៅក្រុង«Saskatoon» ជាបន្ទាន់ នៅនឹងកណ្ដាលព្រលានយន្ដហោះ។ ទាំងអ្នកដំណើរ និងបុគ្គលិបម្រើការទាំងអស់ បានចុះពីយន្ដហោះតាមជណ្ដើរ និងជិះរថយន្ដក្រុងបន្ត ដើម្បីមកដល់អាគារ​ព្រលាន​យន្ដហោះ៕

» ព្រឹត្តិការណ៍ជម្លៀសមនុស្ស ចេញពីយន្ដហោះ ជាវីដេអូ៖