តើវត្ថុនេះ ពិតជាគ្រឿងប្រដាប់ប្រដា របស់យន្ដហោះប៊ូអីង (Boeing 777) ដែលបានបាត់ខ្លួន តាំងពីជាងមួយឆ្នាំមកនោះ មែនឬ? វត្ថុនោះ ជាកន្សែងជូតដៃ របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ដែលបានអណ្ដែងមកទើរ នៅលើ​ឆ្នេរភាគខាងលិច នៃកោះអូស្ត្រាលី។

វត្ថុនេះ ត្រូវបានរកឃើញ ដោយពីរនាក់ប្ដីប្រពន្ធចូលនិវត្តន៍មួយគូ ខណៈពេលដែលអ្នកទាំងពីរ បានដើរកំសាន្ដ នៅលើ​ឆ្នេរ នៃទីក្រុង សែវេន (Cervantes)។ អ្នកទាំងពីរបានទូរស័ព្ទហៅនគរបាល ឲ្យមកយករបស់នេះភ្លាម ដើម្បីធ្វើការ​វិភាគ។ បើតាមស្ថានីយទូរទស្សន៍  9news ក្នុងស្រុក ដែលបានរាយការណ៍ ពីហេតុការណ៍នេះ បានយោងតាមការ​បញ្ជាក់​របស់អ្នកជំនាញ ហើយថ្លែងពន្យល់ថា វាអាច​ជា​កំណាត់ជូតដៃ របស់យន្ដហោះ MH370 ដែលអណ្ដែត​ច្រើន​សិប​ថ្ងៃខែ នៅលើផ្ទៃមហាសមុទ្រ ឥណ្ឌា មុននឹងមកទើរ នៅលើទីឆ្នេរ នៃប្រទេសអូស្ត្រាលីនេះ។

សម្រាប់អ្នកស៊ើបអង្កេតវិញ ស្ថិតក្នុងសភាពស្ងាត់ស្ងៀមនៅឡើយ ប៉ុន្តែបាននិយាយ នៅក្នុងសេចក្ដីប្រកាសព័ត៌មាន របស់ខ្លួនថា វាពិតជាពិបាកខ្លាំងណាស់ ដែលអះអាង ពីការជាប់ទាក់ទង រវាងវត្ថុនេះ ដែលមានច្រើនរាប់មិនអស់ និង​យន្ដហោះ នៃជើងហោះហើរ MH370។ យ៉ាងណាក៏ដោយ ក្រុមអ្នកស៊ើបអង្កេត និងរុករកយន្ដហោះនេះ បាន​និយាយ​ថា ខ្លួនកំពុងធ្វើការពិនិត្យ ទៅលើកន្សែងនេះ ដើម្បីឲ្យដឹងពីប្រភពរបស់វាពិតប្រាកដ។

យន្ដហោះប៊ូអីង របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ដែលភ្ជាប់ជើងហោះហើរ ពីរដ្ឋធានីកូឡាឡំពួរ ប្រទេស​ម៉ាឡេស៊ី ឆ្ពោះទៅរដ្ឋធានីប៉េកាំង ប្រទេសចិន បានបាត់ខ្លួនយ៉ាងអាថ៌កំបាំង ពីប្រព័ន្ធចាប់រលកអាកាស យ៉ាង​អាថ៌កំបាំង កាលពីថ្ងៃទី៨ ខែមីនា ឆ្នាំ២០១៤ ជាងមួយឆ្នាំមុន ជាមួយនឹងអ្នកដំណើរ ២៣៩នាក់។ បើទោះជា ប្រព័ន្ធ​ផ្កាយ​រណប​បានឆ្លុះឃើញ ថាមានវត្ថុជាច្រើនបានអណ្ដែតនៅលើផ្ទៃទឹក ប៉ុន្តែការរុករុកយ៉ាងសម្បើម ដោយប្រទេស​ជា​ច្រើន នៅក្នុងតំបន់ មិនបានរកឃើញ សូម្បីស្រមោលរបស់យន្ដហោះ បន្តិចឡើយ។

ចំពោះគ្រួសារ របស់ជនរងគ្រោះវិញ បានសម្ដែងការខឹងសម្បាររបស់ពួកគេ កាន់តែធំឡើង។ លោក ហ្សីស្លាំង វាត្រេឡូស (Ghyslain Wattrelos) ដែលមានភរិយា និងកូនពីរនាក់ បានស្ថិតនៅក្នុងយន្ដហោះ MH370 នោះ បានថ្លែងឡើងថា៖ «ខ្ញុំខឹងខ្លាំងណាស់ ហើយកាន់តែខ្លាំងឡើង ព្រោះរឿងបានកើតឡើង ជាងមួយឆ្នាំហើយ តែគ្មានដំណឹងអ្វីសោះ។ យើងដឹងច្បាស់ណាស់ ថាពួកគេកុហកយើង។ យើងគ្មានអារម្មណ៍ ទទួលបានការលើកទឹកចិត្ត នៅក្នុងហេតុការណ៍នេះសោះ។»៕