នៅពេលដែលយន្ដហោះ បានហោះចេញពីរដ្ឋធានី តេលអាវីវ (Tel-Aviv ប្រទេសអ៊ីស្ត្រាអែល) ឆ្ពោះទៅកាន់​រដ្ឋធានីតូរ៉ុងតូ (Toronto ប្រទេសកាណដា) នៅលើអាកាសហើយនោះ អ្នកបើកបរយន្ដហោះ បានដឹងថា នៅ​ក្នុង​បន្ទប់ដាក់សម្ភារៈ របស់យន្ដហោះ មានបញ្ហាដោយម៉ាស៊ីនកម្ដៅមួយ បានខូច ដែលអាចធ្វើឲ្យ​សីតុណ្ហភាព នៅទីនោះ​អាចចុះត្រជាក់ជាង ១០អង្សាសេ។

លក្ខត្តិកៈផ្ទៃក្នុងរបស់ក្រុមហ៊ុន អ៊ែរកាណាដា បានចែងថា ប្រសិនជាសត្វធ្វើដំណើរក្នុងយន្ដហោះ ​ដោយដាក់​នៅក្នុងបន្ទប់ ផ្ទុកសម្ភារៈនោះ សីតុណ្ហភាពនៅទីនោះ មិនត្រូវឲ្យចុះទាប ជាង១០អង្សានោះឡើយ។

អ្នកនាំពាក្យរបស់ក្រុមហ៊ុនអាកាសចរណ៍ លោក ភីធើរ ហ្វីតប៉ាទ្រីក (Peter Fitzpatrick) បានពន្យល់ថា អ្នក​បើកបរដឹងពីសីតុណ្ហភាព នឹងត្រូវធ្លាក់ចុះក្រោម១០អង្សាសេ នៅពេលដែលយន្ដហោះ ហោះឆ្លងកាត់​មហា​សាគរអាត្លង់ទិក។ ជាមួយនឹងសីតុណ្ហភាពដ៏ត្រជាក់នេះ ឆ្កែ«Simba» អាចនឹងស្លាប់។

លោក ហ្វីតប៉ាទ្រីក បានរៀបរាប់ទៀតថា ដូច្នេះអ្នកបើកបរ បានសម្រេចចិត្តប្ដូរផ្លូវយន្ដហោះបន្តិច ដើម្បី​បញ្ជា​យន្ដហោះ ឲ្យទៅចុះចតនៅព្រលានយន្ដហោះ ក្រុង ហ្វ្រង់ហ្វ័រ (Francfort ប្រទេសអាល្លឺម៉ង់) ដើម្បីឲ្យសត្វ​ឆ្កែ​អាចធ្វើដំណើរ ជាមួយជើងហោះហើរផ្សេងទៀត ដែលមានសុវត្ថភាព និងសីតុណ្ហភាព ដូចមានចែង​ក្នុង​លក្ខត្តិកៈ។ ជាលទ្ធផល សត្វឆ្កែបានមកដល់ព្រលានយន្ដហោះ តូរ៉ុងតូ ដូចការគ្រោងទុក តែយឺត​ជាង​យន្ដហោះ​មុន តែ៧៥នាទីប៉ុណ្ណោះ។

អ្នកនាំពាក្យបានថ្លែងឲ្យដឹងថា៖ «យើងបានដឹងយ៉ាងច្បាស់ថា វាជាគុណវិបត្តិ (ដែលបានប្ដូរផ្លូវហោះហើរ) សម្រាប់​អ្នកដំណើរទាំងអស់របស់យើង តែផ្ទុយទៅវិញ ប្រតិកម្មរបស់អ្នកដំណើរ មានលក្ខណៈជាវិជ្ជមាន សឹង​តែទាំងអស់គ្នា ជាពិសេសនៅពេល ដែលពួកគេដឹងថា ឆ្កែមួយក្បាលបានស្ថិតក្នុងគ្រោះថ្នាក់»។

បន្ទាប់ពីបានទទួលឆ្កែរបស់ខ្លួន នៅព្រលានយន្ដហោះ នារដ្ឋធានីតូរ៉ុងតូ រួចហើយ បុរសជាម្ចាស់ឆ្កែ បាន​ថ្លែង​ប្រកាសថា «Simba» ត្រូវបានលោក និងគ្រួសារស្រឡាញ់ និងចាត់ទុក ដូចជាកូនម្នាក់អញ្ចឹង៕