«មានអារម្មណ៍ថា ប្លែកណាស់បង ពេលដែលស្លៀកពាក់ទៅ បង្ហាញអំពីបុគ្គលិកលក្ខណៈខ្លួនឯង ថាជាកូនខ្មែរ។ និយាយ​ពីប្អូនស្លៀកពាក់ទៅ ឃើញថាខ្លួនឯងសមសួន ជាកូនខ្មែរមែនទែន»។ នេះការរៀបរាប់ ជាមួយទឹកមុខរីករាយ ក្នុង​សំលៀក​បំពាក់ ជានារីសម័យលង្វែក របស់កញ្ញា ដួង ច័ន្ទសូរិយ។ ថ្លែងប្រាប់ទស្សនាវដ្ដីមនោរម្យ.អាំងហ្វូ កញ្ញា​បាន​សម្ដែង​អារម្មណ៍​ថា  ប្លែកមែនទែន ក្នុងការស្លៀកសំលៀកបំពាក់ របស់ខ្មែរបូរាណ របៀបនេះ។

យុវតីរូបនេះ បានបន្តថា នាងចង់មានកម្មវិធីជួបជុំ ស្លៀកសំលៀកបែបបុរាណខ្មែរបែបនេះ លើកក្រោយៗទៀត។ សូរិយា​ចង់ឱ្យយុវវ័យខ្មែរ សម័យទំនើបទាំងអស់ ចូលរួមស្លៀកពាក់ដូចកញ្ញាដែរ ដើម្បីលើកស្ទួយវប្បធម៌ខ្មែរ និងរក្សា​ប្រពៃណី​ទំនៀមទម្លាប់ខ្មែរ សម័យបុរាណឱ្យនៅគង់វង្ស។ «បើសិនជាអាច សាកឱ្យប្រជាជនខ្មែរស្លៀកជុំវិញប្រទេស មិនដឹង​ជាល្អ​មើលប៉ុណ្ណាទេ» សូរិយាបន្ថែម។

ចំណែកលោក អ៊ឹម ខេណូរ៉ា បានប្រាប់ដែរថា កម្មវិធីដែលបំផុស ឱ្យយុវវ័យខ្មែរសម័យទំនើប បានដឹង និងយល់ពីវប្បធម៌ នៃការស្លៀកពាក់បែបខ្មែរបុរាណនេះ ពិតល្អខ្លាំងណាស់ ដែលធ្វើឱ្យពួកគាត់យល់ពីវប្បធម៌ និងប្រៃណីនាសម័យនោះ។
លោកបន្តថា លោកពេញចិត្តខ្លួនឯង ក្នុងសម្លៀកបំពាក់បែបនេះ។ បើទោះបីជាវាពិបាក ក្នុងការស្លៀក ដើរ ឈរអង្គុយ​ក៏​ដោយ ប៉ុន្តែលោកចូលចិត្ត។ បើសិនជាកម្មវិធីនេះ មាននៅលើកក្រោយទៀត លោកនឹងចូលរួមបន្តទៀត ព្រោះថាការ​ចូល​រួមក្នុងកម្មវិធីបែបនេះ ជួយលើកស្ទួយដល់វប្បធម៌ និងជួយផ្សព្វផ្សាយ ពីអរិយធម៌ខ្មែរ ពីសម័យអតីតកាលផងដែរ។ ណូរ៉ា បានបន្ថែមថា៖ «ព្រោះអីកូនខ្មែរសម័យថ្មី គេមិនទាន់យល់ច្បាស់ ពីសំលៀកបំពាក់ខ្មែរសម័យបុរាណ។ តែឥលូវ យុវវ័យ​សម័យថ្មី គេអាចស្លៀកពាក់បុរាណអញ្ចឹងបាន។ បន្ទាប់ពីចូលរួម ក្នុងកម្មវិធីយប់នេះហើយ ខ្ញុំនឹងធ្វើការផ្សព្វផ្សាយ តាម​ហ្វេសប៊ុក​ពីកម្មវិធីនេះ។»

» សូមទស្សនារូបភាព ពីកម្មវិធីនេះឡើងវិញ ដោយចុចនៅលើទីនេះ។

នាយកសាលាតន្ត្រីមរតកហ្វូណន លោក ស៊ុប ស័ក្ករ៉ា ដែលបានផ្តួចផ្តើមឱ្យមានកម្មវិធីនេះឡើង បានឱ្យប្រាប់ឱ្យដឹងថា យុវវ័យមានចាប់អារម្មណ៍ជាខ្លាំង ជាមួយនឹងស្លៀកពាក់ បែបខ្មែរបុរាណ។ លោកមើលឃើញថា នាពេលបច្ចុប្បន្ននេះ យុវវ័យខ្មែរ បានងាកមកចាប់អារម្មណ៍ ជាមួយនឹងវប្បធម៌របស់ខ្លួន ខុសពីប៉ុន្មានឆ្នាំមុន ដែលយុវជនកម្ពុជា បានភ្លើតភ្លើន​នឹងវប្បធម៌បរទេស។

លោកបានអះអាងថា៖ «ពិតជាការជោគជ័យ ដែលយើងនឹកស្មានមិនដល់មែន យើងកំណត់មុនដំបូង តែអ្នកចូលរួម​តែ៨០​នាក់តែប៉ុណ្ណោះ ខ្ញុំគិតថា ប្រហែលជាគ្មានអ្នកចូលរួមទេ ព្រោះវាជាកម្មវិធីលើកដំបូង គេមិនដែលស្គាល់ ប៉ុន្តែ​ឥលូវ​នេះ លើសរហូត ទៅដល់១៤០នាក់»។

គ្រោងរៀបចំធ្វើ បីសម័យកាល

នាយកសាលាតន្ត្រីមរតកហ្វូណនរូបនេះ បានឱ្យដឹងដែរ ថាបន្ទាប់ពីជោគជ័យ ក្នុងការរៀបចំកម្មវិធីលើកទីមួយនេះ លោក​នឹងរៀបចំធ្វើ នៅឆ្នាំក្រោយទៀត ឱ្យមានលក្ខណៈធំដុំជាងនេះ ព្រមទាំងធ្វើរម្លឹក ពីបីសម័យកាលចូលគ្នា ដែលអ្នកចូលរួម អាចស្លៀកពាក់សម្លៀកបំពាក់សម័យអង្គរ សម័យលង្វែក និងសម័យចតុមុខ។

លោកបានស្នើទៅកាន់ក្រសួង និងស្ថាប័នពាក់ព័ន្ធទាំងអស់ ឲ្យរៀបចំកម្មវិធីបែបវប្បធម៌ ឱ្យបានច្រើនដើម្បីទាក់ទាញ​យុវជនងាកមរកវប្បធម៌ខ្មែរ កុំឈ្លក់វង្វេង នឹងវប្បធម៌បរទេសច្រើនពេក។ លោករៀបរាប់បន្ថែម៖ «មួយរយៈចុងក្រោយ គឺគាត់អាចគិតឃើញថា ងាកមកបន្តិចម្តងៗ អញ្ចឹង យើងនឹងបង្កើតកម្មវិធីវប្បធម៌ ឱ្យបានច្រើន យើងនឹងអាចទាញ​ពួក​គាត់វិញបានហើយ។»៕