«ស្រី ត្រូវទទួលខុសត្រូវ ក្នុងករណីរំលោភ ច្រើនជាងបុរស» នេះជាសម្ដី របស់ជនជាប់ចោទ ម៉ូកេស ស៊ីង (Mukesh Singh) ដែលបានចាប់រំលោភ និស្សិតស្រី កាលពីអំឡុងខែធ្នូ ឆ្នាំ២០១២ កន្លងទៅ នៅក្នុងរថយន្ដក្រុង កណ្ដាលរដ្ឋធានី ញ៉ូដេលី នៃប្រទេសឥណ្ឌា។ បើតាមបុរសនេះ ស្ត្រីត្រូវតែទទួលខុសត្រូវ ពីអំពើរំលោភសេពសន្ធវៈ ដែលរូបនាងបាន​រងគ្រោះ។

ផ្ដល់កិច្ចសម្ភាស នៅក្នុងភាពយន្ដឯកសារមួយ របស់ស្ថានីយទូរទស្សន៍ ប៊ីប៊ីស៊ី (BBC) ដែលនឹងត្រូវយកមកបញ្ចាំង នៅ​ថ្ងៃ​អាទិត្យនេះ ក្នុងឱកាសទិវាស្ត្រីអន្តរជាតិ ជនសង្ស័យ ម៉ូកេស ស៊ីង បានថ្លែងថា ខ្លួន«គ្មានវិប្បដិសារី»សោះឡើយ នៅ​ចំពោះ​ទង្វើឧក្រិដ្ឋរបស់ខ្លួន។

«នៅពេលត្រូវគេរំលោភ មិនត្រូវរើទេ!»

នៅក្នុងឯកសារនោះ ស៊ីង បានពន្យល់ថា និស្សិតស្រី និងសង្សារបស់នាង ដែលជិះនៅលើរថយន្ដ បន្ទាប់ពីបានចេញពី​ទស្សនាភាពយន្ដ មិនគួរនឹងប្រតិកម្មការពារខ្លួន ទល់នឹងក្រុមខ្លួន ដែលមានគ្នាដល់ទៅ៦នាក់ ហើយចង់ចាប់និស្សិត​ស្រី​វ័យក្មេងនោះ រំលោភនោះឡើយ។ ស៊ីង និយាយទៀតថា ពួកខ្លួនក៏ប្រហែលជា មិនធ្វើបាបអ្នកទាំងពីរ ដល់កម្រិតខ្លាំង​យ៉ាង​ដូច្នេះទេ ប្រសិនជាអ្នកទាំងពីរ មិនព្យាយាមតបតរនោះ។

ជនជាប់ចោទ ម៉ូកេស ស៊ីង បានបន្ថែមទៀតថា ការស្លាប់របស់និស្សិតស្រី គ្រាន់តែជា«ឧប្បត្តិហេតុ»ប៉ុណ្ណោះ។ ស៊ីង និយាយថា៖ «នៅពេលត្រូវគេរំលោភ មិនត្រូវរើទេ។ ស្រីនេះ គួរតែស្ងាត់មាត់ ហើយទុកឲ្យគេរំលោភ។ បន្ទាប់ពីរំលោភរួច នាងប្រាកដជាត្រូវគេ ដោះលែងជាមិនខាន ហើយប្រហែលជាគេវាយ តែប្រុសសង្សានាងនោះ តែប៉ុណ្ណោះ។»

» សូមអានពីហេតុការណ៍នេះឡើងវិញ ដោយចុចនៅលើទីនេះ។

ស៊ីង ជាអ្នកបើករថយន្ដក្រុង នៅពេលនោះ ប៉ុន្តែអាជ្ញាធរបានរកឃើញ ស្លាកស្នាម ADN របស់បុរសនេះ នៅ​លើ​ខ្លួន​ប្រាណ​និស្សិត​ស្រីរងគ្រោះ ដែលធ្វើឲ្យតុលាការ បានធ្វើការចោទប្រកាន់ និងកាត់ទោសប្រហារជីវិត។ បុរស​ជាប់​ចោទ ស៊ីង កំពុង​​​ជាប់​ក្នុង​ពន្ធនាគារ រហូតមកដល់ពេលនេះ ដើម្បីរង់ចាំពេល«ប្រហារជីវិត»។

ស៊ីង បាននិយាយបន្តថា៖ «ស្រីត្រឹមត្រូវ មិនត្រូវដើរល្ហេចល្ហាច នៅម៉ោង៩យប់ដូច្នោះទេ។​ ស្រី ត្រូវទទួលខុសត្រូវ ក្នុង​ករណី​រំលោភ ច្រើនជាងបុរស។ ប្រុសនិងស្រី មិនមានសិទ្ធិស្មើរគ្នាទេ។ នៅផ្ទះបោសជូត ធ្វើម្ហូប ជាតួនាទីរបស់ស្រី និង​មិន​មែនដើរចូលបារបន រួចធ្វើរឿងអាក្រក់ៗ ពាក់សម្លៀកបំពាក់ លេចលើបញ្ចេញក្រោមនោះឡើយ។ ស្រីដែលល្អ មាន​តែ២០ភាគរយប៉ុណ្ណោះ។»

នៅចំពោះទោសប្រហារជីវិត ដែលត្រូវបានតុលាការសម្រេច មកលើខ្លួននោះ ជនជាប់ចោទ ស៊ីង បានគិតថា វានឹងរឹត​តែ​ធ្វើឲ្យមានបញ្ហាទ្វេឡើង។ «ពីមុន ជនចាប់រំលោភហើយ តែងតែនិយាយថា "ដោះលែងនាងទៅ នាងនឹងមិននិយាយ​ប្រាប់​នរណាឡើយ"។ តែឥឡូវនេះ បន្ទាប់ពីរំលោភនាងហើយ ជនចាប់រំលោភ នឹងសម្លាប់នាងចោល។» នេះជាការ​អះអាង​ចុង​ក្រោយ របស់ជនជាប់ចោទ៕