អ្នក​តវ៉ា​៥៥​រូប របស់​បក្ស​សង្គ្រោះ​ជាតិ នឹង​ត្រូវ​«ដក»​ពី​សមាជិក​បក្ស?

ក្រុមការងារគណបក្រសង្គ្រោះជាតិ ខេត្តសៀមរាប ប្រមាណ៥៥រូប អាចនឹងដកចេញ ពីក្រុមការងារគណបក្ស ក្នុងថ្ងៃទី៥ ខែមីនា ឆ្នាំ២០១៥នេះ។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) -ភ្នំពេញថ្ងៃទី៥ មីនា ២០១៥
  • កែប្រែចុងក្រោយ: March 05, 2015
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

សេចក្តីសម្រេចចិត្តមួយ នឹងត្រូវចេញដោយ លោក សម រង្ស៊ី ប្រធានគណបក្សសង្គ្រោះជាតិ ដែលនឹងឡើងទៅកាន់ ខេត្ត​សៀមរាប ក្នុងថ្ងៃទី៥ ខែមីនានេះ ដើម្បីដោះស្រាយបញ្ហាផ្ទៃក្នុង ដែលក្រុមការងារបក្សសង្គ្រោះជាតិខេត្តសៀមរាប ទាមទារឲ្យប្តូរតំណែង​លោកស្រី កែ សុវណ្ណរតន៍ ចេញពីប្រធានក្រុមការងារខេត្តនេះ។ នេះបើតាមការបញ្ជាក់​របស់​លោក សុខ គឹមសេង សមាជិកក្រុម​ប្រឹក្សាគណបក្ស ​ខេត្តសៀមរាប របស់គណបក្សសង្គ្រោះជាតិ។

សមាជិកក្រុមប្រឹក្សាគណបក្ស ប្រចាំខេត្តសៀមរាបរូបនេះ មិនបានធ្វើអត្ថាធិបាយអ្វីលំអិត នូវកិច្ចស្វែងរក​ដំណោះ​ស្រាយ នៃជម្លោះផ្ទៃក្នុងគណបក្សនោះឡើយ ព្រោះវាជាការងារ របស់ក្រុមប្រឹក្សាគណបក្សថ្នាក់ជាតិ។ លោកគ្រាន់​តែ​បង្ហាញ​ថា សមាជិកបក្សទាំងអស់ នឹងរង់ចាំដំណោះស្រាយមួយ ពីប្រធានគណបក្សក្នុងថ្ងៃនេះ ដើម្បី​បញ្ចប់​ជម្លោះ​ផ្ទៃក្នុង​គណបក្សប៉ុណ្ណោះ។

មន្រ្តីជាន់ខ្ពស់មួយរូប របស់គណបក្សសង្គ្រោះជាតិ ដែលសុំមិនបញ្ចេញឈ្មោះ បានបង្ហើបប្រាប់ ទស្សនាវដ្តី​មនោរម្យ.អាំងហ្វូថា ក្រុមការងារចំនួន៥៥នាក់ ដែលបានឡើងមកតវ៉ា ដល់ស្នាក់ការធំ នៅរាជធានីភ្នំពេញនោះ ត្រូវ​បាន​សម្រេចធ្វើការលប់ឈ្មោះ ចេញពីបញ្ជីបំរុង នៃសមាជិកគណបក្សហើយ ព្រោះតែពួកគេ មិនបានគោរព​តាម​បទ​បញ្ជាផ្ទៃក្នុង និងលក្ខខន្តិកៈរបស់គណបក្ស។

មន្រ្តីរូបនេះ បានធ្វើការពន្យល់ដូច្នេះថា៖ «អ្នកទាំងនោះ មិនបានធ្វើតាមយន្តការផ្ទៃក្នុង របស់បក្សជាមុន។ ត្រូវមាន​បណ្តឹង មកទីស្នាក់ការបក្សប្រចាំខេត្ត បន្ទាប់មកចូលតាមអចិន្ត្រៃយ៍បក្ស។ ក្រោយអចិន្ត្រៃយ៍បក្ស ទទួលបាន​បណ្តឹង​ហើយ ត្រូវធ្វើការអញ្ជើញសាម៉ីខ្លួន មកធ្វើការសាកសួរបញ្ជាក់ និងដោះស្រាយ។»

លោកបានបញ្ជាក់ថា អ្នកឬទាំង៥៥រូបនោះ មិនមានតួនាទីអ្វីនៅក្នុងបក្សឡើយ គ្រាន់តែជាសមាជិកបំរុងរបស់​គណបក្ស​ប៉ុណ្ណោះ មិនទាន់ទាំងបានបញ្ចូល ជាសមាជិកគណបក្សពេញសិទ្ធិនៅឡើយ គ្រាន់តែជាមន្រ្តីគាំទ្ររបស់​គណបក្ស​ប៉ុណ្ណោះ។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ ពីអ្នកនាំពាក្យគណបក្សសង្គ្រោះជាតិបានទេ នាព្រឹកនេះ ដោយ​គ្មានអ្នកទទួលទូរស័ព្ទ។ តែមន្រ្តីជាន់ខ្ពស់ដដែលនោះ បានបង្ហើបទៀតថា សេចក្ដីសម្រេចបញ្ឈប់ ក្រុមការងារ​ទាំង​៥៥​រូបនោះ ពីសមាជិកបំរុងរបស់គណបក្ស ក្នុងកិច្ចប្រជុំគណកម្មការនាយក កាលពីរសៀលថ្ងៃទី៤ ខែមីនានេះ នៅ​ទីស្នាក់ការ​កណ្តាលរាជធានីភ្នំពេញ ក្រោមវត្តមានប្រធាន និងអនុប្រធានបក្ស។

កាលពីថ្ងៃទី០១ និង០២ ខែមីនា ឆ្នាំ២០១៥កន្លងមក ក្រុមការងារគណបក្សសង្គ្រោះជាតិ ខេត្តសៀមរាប ប្រមាណ៥៥រូប បានប្រមូល​ផ្តុំគ្នា ដើម្បីតវ៉ាទាមទារ ឲ្យផ្លាស់ប្តូរលោកស្រី កែវ សុវណ្ណរតន៍ ឲ្យចេញពីប្រធានក្រុមការងារខេត្តសៀមរាប ក្នុងមូល​ហេតុ​បក្សពួក​និយម គ្មានយុត្តិធម៌ និងគ្មានតម្លាភាព។

លោក សេង រដ្ឋា អនុប្រធានក្រុមសម្របសម្រួល ស្រុកក្រឡាញ់ខេត្តសៀមរាប ក៏ទស្សនាវដ្តីមិនអាច សុំការបញ្ជាក់​បានដែរ នាព្រឹកនេះ ដោយភ្ជាប់ទំនាក់ទំនងមិនបាន។ តែលោកបានថ្លែង កាលពីថ្ងៃទី២ ខែមីនា មុខស្នាក់ការ​គណបក្ស​រាជធានីភ្នំពេញថា មូលហេតុចំបង នៃការចង់ផ្លាស់ប្តូរប្រធានក្រុមការងារនេះ ក៏ព្រោះតែ ការដឹកនាំរបស់លោកស្រី កែ សុវណ្ណរតន៍ តាមបែបអំណាច​ប្រមូលផ្តុំ។ លោកបន្តថា៖ «ប្រធានក្រុមការងារនេះ ហាក់ដូចជា មិនមានប្រជាធិបតេយ្យ នៅក្នុងបក្សទាល់តែសោះ។ (…) ដូចជា​ការ​ចាត់តាំងក្រុមការងារ ដើម្បីធ្វើការនោះវិញ មើលទៅវាហាក់បីដូច ជាមាន​លក្ខណៈ​បក្សពួកនិយម គ្រួសារនិយម ដែលមិនមាន​ប្រជាធិបតេយ្យទាល់តែសោះ។»

ទាក់ទងនឹងការទាមទារទម្លាក់លោកស្រី កេ សុវណ្ណរតន៍ ចេញពីប្រធានក្រុមការងាររបស់ខេត្តសៀមរាប ដោយ​សមាជិក​​ក្រុម​ប្រមាណ​៥៥នាក់នោះ ត្រូវបានលោកស្រីផ្ទាល់ អះអាងក្នុងកិច្ចសម្ភាស ជាមួយទស្សនាវដ្តី​មនោរម្យ.អាំងហ្វូ កាលពីថ្ងៃទី២ ខែមីនា កន្លង​មក​នេះ​ថា ការងាររបស់លោកស្រីមានច្រើន ចាំបាច់ត្រូវ​ធ្វើការ​ដោះ​ស្រាយ និង​ត្រូវ​អនុវត្ត​ភ្លាមៗ ក្នុងពេលមួយជាក់លាក់ ដោយ​មិន​ត្រូវ​ការ​រង់ចាំ អ្នកដែលមិនទំនេរ មកធ្វើការ​ជា​មួយ​នោះ​ឡើយ។

ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យ៉ង់ គឹមអេង បានចាត់ទុកថា នេះជាការតវ៉ា ដែល​ស្តែងឡើង តាមលិទ្ធិប្រជាធិបតេ្យមួយ ដ៏ពិតប្រាកដ មិនថាក្នុងសង្គម ក្នុងប្រទេស និងក្នុងគណបក្សឡើយ។ តែ​យ៉ាងណាក៏ដោយ មុននឹងមានការតវ់ានេះឡើង ក៏ត្រូវធ្វើតាមច្បាប់ប្រទេស សង្គម ឬគណបក្សជាមុនដែរ។ លោក​បាន​បញ្ជាក់ថា «ការតវ៉ាក្នុងសង្គមប្រជាធិបតេយ្យ វាបែបហ្នឹងឯង។ (...) ប្រជាធិបតេយ្យ កាលណាមានការខុសឆ្គង ការមិន​ពេញចិត្ត គេធ្វើការទាមទារ ធ្វើការតវ៉ា ឬជំទាស់ដោយសន្តិវិធី មិនម្តងម្កាលទេ អាចកើតឡើងជាញឹកញាប់ ឬសឹង​គ្រប់​ពេលវេលា។ (...) ថ្នាក់ដឹកនាំទាំងនោះ ក្នុងការដោះស្រាយបញ្ហាតវ៉ា ឬការទាមទារ ក៏ត្រូវមានភាពចាស់ទុំ ក្នុងការ​ដោះ​ស្រាយ​បញ្ហានោះ។ (...) តែក៏ត្រូវមើលថា ការតវ៉ានោះ គោរពបទដ្ឋានច្បាប់នានា របស់គណបក្សនោះដែរឬទេ។»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...