សហគមន៍ខ្មែរនៅអ៊ឺរ៉ុប នឹងធ្វើបាតុកម្មនៅមុខអាគារ អ.ស.ប ក្នុងប្រទេសស្វីស
- ដោយ: សេក មនោរកុមារ អត្ថបទ និងយកការណ៍៖ សេក កុមារ ([email protected]) - បារីស ថ្ងៃទី៣០ ឧសភា ២០១៦
- កែប្រែចុងក្រោយ: May 30, 2016
- ប្រធានបទ: នយោបាយ-កម្ពុជា
- អត្ថបទ: មានបញ្ហា?
- មតិ-យោបល់
-
«ដោយសារតែស្ថានការណ៍នយោបាយ និងលទ្ធិប្រជាធិបតេយ្យ នៅប្រទេសកម្ពុជាធ្លាក់ដុនដាបខ្លាំង ប្រជាពលរដ្ឋខ្មែរនៅទ្វីបអុឺរុប គ្រោងធ្វើមហាបាតុកម្ម នៅថ្ងៃសៅរ៍ទី០៤ ខែមិថុនា ឆ្នាំ២០១៦ នៅទីក្រុង ហ្សឺណែវ ប្រទេសស្វីស» នេះ ជាសេចក្ដីប្រកាសព័ត៌មាន របស់ក្រុមអ្នករៀបចំបាតុកម្ម ដែលនឹងប្រមូលបណ្ដាជនរួមជាតិខ្មែរ មកពីប្រទេសនានាក្នុងទ្វីបអ៊ឺរ៉ុប ប្រមាណជាជាង២០០នាក់ ដើម្បីទាមទារទៅបណ្ដាប្រទេសហត្ថលេខីទាំងអស់ ឲ្យគោរពកិច្ចព្រមព្រៀងសន្តិភាព ទីក្រុងប៉ារីស ថ្ងៃទី២៣ ខែតុលា ឆ្នាំ១៩៩១។
បាតុកម្មនេះ ក៏នឹងទាមទារឲ្យមានការគោរពសិទ្ធិមនុស្ស សិទ្ធសេរីភាពបញ្ចេញមតិ និងអនុវត្តឲ្យបានពេញលេញ នូវលទ្ធិប្រជាធិបតរយ្យ ព្រមទាំងទាមទារ ឲ្យមានការដោះលែងអ្នកទោសមនសិការទាំងអស់ ដែលកំពុងជាប់ក្នុងពន្ធនាគារ នៃប្រទេសកម្ពុជា រហូតមកដល់សព្វថ្ងៃនេះ។
លោក ថៃ មករា តំណាងមួយរូប នៃអ្នករៀបចំបាតុកម្មខាងលើ បានថ្លែងប្រាប់ទស្សនាវដ្ដីមនោរម្យ.អាំងហ្វូថា ក្រុមលោកបានគ្រោងចំនួនមនុស្សចូលរួម ចំនួន២៥០នាក់ ដើម្បីធ្វើការជួបជុំគ្នា នៅមុខអាគារឧត្ដមស្នងការ ទទួលបន្ទុកសិទ្ធិមនុស្ស នៃអង្គការសហប្រជាជាតិ កណ្ដាលក្រុងហ្សឺណែវ ហើយលោកថា មកដល់ពេលនេះ លោកទទួលបានការសន្យាចូលរួម ប្រមាណជាជាង២០០នាក់ហើយ។
នៅក្នុងព្រឹត្តិការណ៍នោះ ក្រុមបាតុករក៏នឹងត្រៀមញត្តិមួយ ដើម្បីដាក់ជូនទៅអគ្គលេខាធិការអង្គការសហប្រជាជាតិ លោក បាន គី-មូន (Ban Ki-moon) ដែរ ប៉ុន្តែលោក ថៃ មករា បានពន្យល់ថា ដោយសារកាលបរិច្ឆេទរបស់បាតុកម្ម ធ្វើឡើងក្នុងថ្ងៃសៅរ៍ ដែលជាថ្ងៃសម្រាកចុងសប្ដាហ៍នោះ ទើបតំណាងបាតុករនឹងយកញត្តិនោះ ត្រឡប់មកដាក់ជូនអង្គការពិភពលោកនេះ នៅថ្ងៃចន្ទ ឬថ្ងៃអង្គារបន្ទាប់វិញ។
ព្រឹត្តិការណ៍ចុងក្រោយ រហូតមានការចាប់ចងមនុស្សជាច្រើននាក់ នៅក្នុងប្រទេសកម្ពុជា បានបង្កឲ្យមានប្រតិកម្មជាបន្ទាប់បន្ទាប់ ទាំងនៅក្នុងប្រទេស ទាំងនៅក្រៅប្រទេស។ អង្គការការពារសិទ្ធិមនុស្សក្នុងស្រុក ឈ្មោះ លីកាដូ (Licadho) បានបរិហារពីការចាប់ចងទាងនោះ ដោយបានហៅក្រុមអ្នកជាប់ឃុំ ថាជា«អ្នកទោសនយោបាយ»។ បើតាមអង្គការដដែលនេះ ត្រឹមតែរយៈពេលមួយឆ្នាំប៉ុណ្ណោះ ប្រទេសកម្ពុជា មានអ្នកទោសនយោបាយ២៩នាក់។
កាលពីសប្ដាហ៍មុន អង្គការមួយដែលមានទីតាំងនៅសហរដ្ឋអាមេរិក ឈ្មោះ «សម្ព័ន្ធមិត្តខ្មែរ-អាមេរិកាំង ដែលហៅជាភាសាអង់គ្លេស Cambodia-America Alliance (CAA)» ក៏បានប្រកាសដែរថា ខ្លួននឹងរៀបចំបាតុកម្មមួយ ដែលមានមនុស្សចូលរួមប្រមាណជា ៣០០នាក់ នៅថ្ងៃសុក្រទី១០ ខែមិថុនាខាងមុខ នាមុខវិមានរដ្ឋសភាអាមេរិក ដើម្បីទាមទារឲ្យរដ្ឋសភា របស់ប្រទេសមហាអំណាច ធ្វើច្បាប់ដាក់ទណ្ឌកម្ម «ផ្នែកសេដ្ឋកិច្ច និងការទូត ទៅលើរដ្ឋាភិបាលលោក ហ៊ុន សែន រហូតទាល់តែមានការដោះលែង អ្នកទោសនយោបាយ សកម្មជនការពារសិទ្ធិមនុស្ស និងសកម្មជនដ៏ទៃទៀត ឲ្យមានសេរីភាព។»
ប៉ុន្តែសម្រាប់រដ្ឋលេខាធិការ និងជាអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានយល់ថា រលកប្រតិកម្មរបស់បណ្ដាជនរួមជាតិខ្មែរ នៅក្រៅស្រុក«តែប៉ុន្មាននាក់»នេះ នឹងមិនមានជាទំងន់អ្វី មកលើរដ្ឋាភិបាលរបស់លោក ហ៊ុន សែន នោះឡើយ។ លោក ផៃ ស៊ីផាន បានប្រតិកម្មតបទៅនឹងគម្រោងធ្វើបាតុកម្មខាងលើ ថាខ្មែរនៅក្រៅស្រុកប៉ុន្មាននាក់នោះ មិនបានយល់អ្វីសោះ ពីនយោបាយរបស់រដ្ឋាភិបាលកម្ពុជា។
សូមបញ្ជាក់ដែរថា បន្ថែមពីលើព្រឹត្តិការណ៍ចាប់ចង ដែលកើតមាន កាលពីពេលកន្លងមក នៅព្រឹកថ្ងៃទី៣០ ខែឧសភានេះ លោកតំណាងរាស្ត្រ កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ ដែលជាគណបក្សប្រឆាំងធំជាងគេនៅកម្ពុជា ត្រូវបានរដ្ឋសភា ដែលមានតំណាងរាស្ត្រចូលប្រជុំ មកតែពីគណបក្សប្រជាជនកម្ពុជានោះ សម្រេចឲ្យតុលាការ និងអាជ្ញាធរចាត់ការ តាមនីតិវិធី (ដែលអាចឈានទៅដល់ការឃាត់ខ្លួន) នៅក្នុងសំនុំរឿងអាស្រូវស្នេហាមួយ ដ៏ចម្រូងចម្រាស។ ក្រុមអ្នកតំណាងរាស្ត្រ របស់គណបក្សសង្គ្រោះជាតិ ហៅការសម្រេចនោះ ថាជាការរំលោភរដ្ឋធម្មនុញ្ញធ្ងន់ធ្ងរ ទាក់ទងនឹងអភ័យឯកសិទ្ធិសភា ត្រង់មាត្រា៨០ ដែលតម្រូវឲ្យមានសម្លេងពីរភាគបី៕