ក្នុងប៉ុន្មានថ្ងៃនេះ តុលាការសាលាដំបូង រាជធានីភ្នំពេញ បានអនុវត្តនីតិវិធីរបស់ខ្លួន យ៉ាងមានប្រសិទ្ធិភាព ដោយ​បានចេញដីការឲ្យចាប់ខ្លួន និងដាក់ឃុំ មនុស្សជាបន្តបន្ទាប់ (យ៉ាងហោច១៤នាក់) ដោយបានចោទ​មនុស្ស​ទាំង​នោះ ថាមានជាប់ពាក់ព័ន្ធ នឹងអំពើហិង្សា ធ្វើទៅលើកងសន្ដិសុខ កាលពីថ្ងៃទី១៥ ខេកក្កដា ឆ្នាំ​២០១៤ កន្លង​ទៅ នៅស្ពាននាគ ក្បែរទីលានប្រជាធិបតេយ្យ។

ដោយឡែក ពាក្យបណ្តឹងមួយ ដែលអ្នកសារព័ត៌មាន នៃវិទ្យុសម្លេងប្រជាធិបតេយ្យ បានប្តឹងក្រុមសន្តិសុខ​ទាំង​នោះ ទៅកាន់សាលាដំបូងរាជធានី មកទល់នឹងពេលនេះ នៅមិនទាន់ឃើញខាងតុលាការ មានចំណាត់ការ​នៅ​ឡើយ។ លោក ឃួន ឌីណា (Dyna Khuon) ដែលប្រកាសខ្លួន ថាជាបុគ្គលិកម្នាក់ (ឬអាចមាន​ឈ្មោះ​លើ​បណ្ដាញ​សង្គម ខុសពីឈ្មោះពិត) ប្រចាំនៅវិទ្យុ​សម្លេង​ប្រជាធិបតេយ្យ ហៅកាត់ជាភាសាអង់គ្លេសថា VOD​ បាន​បង្ហាញនូវចម្ងល់របស់ខ្លួន ដោយបាន​ចោទ​សួរ ទៅកាន់លោក គឹម សន្តិភាព អ្នកនាំពាក្យក្រសួងយុត្តិធម៌ តាម​បណ្តាញសង្គមថា ក្រុមការងាររបស់លោក ក៏កំពុងរងនូវភាព​អយុត្តិធម៌​ដែរ។

លោក ឃួន ឌីណា បានរៀបរាប់ថា ការព្យាយាមស្វែងរកយុត្តិធម៌ តាមរយៈការដាក់ពាក្យបណ្តឹង ទៅសាលា​ដំបូងរាជធានីភ្នំពេញ ទាក់ទងនឹងអំពើហិង្សា កាលពីថ្ងៃទី២ ខែឧសភា ឆ្នាំ២០១៤ ដែលបង្កឡើង ដោយក្រុម​សន្តិសុខរបស់រដ្ឋាភិបាល តែផ្ទុយទៅវិញ ហាក់ដូចជាគ្មានពន្លឺអ្វីឡើយ។ បុគ្គលិករូបនេះ បានថ្លែង​ឡើង​ថា៖ «ខ្ញុំឆ្ងល់ថា សហការីខ្ញុំ លោក ឡាយ សាមាន ដែលត្រូវសន្តិសុខសាលាក្រុងវាយ រហូតសន្លប់ និងបាក់ឆ្អឹង​ក្រោមភ្នែក។ ខាងស្ថាប័នខ្ញុំ បានដាក់ពាក្យបណ្ដឹង តែតុលាការ មិនទាន់បើកសវនាការនៅឡើយ។ តើមាន​មូល​ហេតុ​អីទៅ? តើអាចជួយឆ្លើយតប បានទេ?»

យ៉ាងណាក៏ដោយ លោក គឹម សន្តិភាព បានសរសេរ មានលក្ខណៈជាទូទៅថា៖ «មិនមែនជាការឆ្លើយតប តែ​ជាការចង់បញ្ជាក់ អោយយល់ច្បាស់!»។ អ្នកនាំពាក្យក្រសួងយុត្តិធម៌រូបនេះ បានបន្តតាមគណនី​ហ្វេសប៊ុក ​របស់ខ្លួនថា៖ «ការចាប់ខ្លួន និងការកោះហៅ អ្នកពាក់ព័ន្ធនឹងសំណុំរឿងព្រហ្មទណ្ឌ ជាចំណាត់ការធម្មតា ក្នុង​ដំណាក់ការស៊ើបសួររបស់តុលាការ លើសំណុំរឿងព្រហ្មទណ្ឌ ដែលស្ថិតក្នុងដៃតុលាការ រយ:ពេលជាង​មួយ​ឆ្នាំ កន្លងមកហើយ។»

លោក សន្តិភាព បានបន្តថា ក្នុងដំណាក់កាលនេះ ចៅក្រមស៊ើបសួរ ត្រូវស្វែងរកទាំងភស្តុតាងដាក់បន្ទុក និង​ដោះបន្ទុក។ ហើយចំណាត់ការលើនីតិវិធីនីមួយៗ ត្រូវអនុវត្តន៏តាមដំណាក់កាលជាក់ស្តែង នឹងស្របតាមការ​កំណត់ ក្នុងក្រមនីតិវិធីព្រហ្មទណ្ឌជាធរមាន។ ព្រោះសំណុំរឿងព្រហ្មទណ្ឌនីមួយៗ មានភាពស្មុគស្មាញ ខុសៗ​គ្នា​ក្នុងការស៊ើបអង្កេត។ មន្ត្រីអ្នកនាំពាក្យ បានបញ្ជាក់បន្ថែមថា៖ «ហេតុដូចនេះ គួរភាគីពាក់ព័ន្ធ នឹងសំណុំ​រឿង​ចូលរួម ផ្តល់សក្ខីកម្មបន្ថែម ក្នុងដំណាក់កាលនេះ ប្រសើរជាជាងការអង្គុយរិះគន់ ចំណាត់ការរបស់តុលាការ ឬ​បំភ្លៃថាករណីនេះ ជារឿងនយោបាយ ទាំងល្ងិតល្ងង់។»៕