កម្ពុជា៖ ក្រសួង​មហា​ផ្ទៃ​ព្រមាន​មន្ត្រី​ពន្ធនាគារ អំពី​ការធ្វើ​ទារុណ្ឌកម្ម​លើ​ទណ្ឌិត

នៅថ្ងៃទី២៣ ខែសីហា ឆ្នាំ២០១៣ នេះក្រសួងមហាផ្ទៃបានធ្វើការ ព្រមានចាត់វិធានការតាមផ្លូវច្បាប់ ចំពោះមន្រ្តី​ពន្ធនាគារ​រូបណា ដែលហ៊ានប្រើអំណាចធ្វើទារុណកម្មលើទណ្ឌិត។
Loading...
  • ដោយ: អ៊ុំ បូរី
  • កែប្រែចុងក្រោយ: August 23, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

នៅថ្ងៃទី២៣ ខែសីហា ឆ្នាំ២០១៣ នេះក្រសួងមហាផ្ទៃបានធ្វើការ ព្រមានចាត់វិធានការតាមផ្លូវច្បាប់ ចំពោះមន្រ្តី​ពន្ធនាគារ​រូបណា ដែលហ៊ានប្រើអំណាចធ្វើទារុណកម្មលើទណ្ឌិត។


អ្នកទោសដែលត្រូវបានមន្ត្រីពាក់ខ្នោះដៃ មុននឹងបណ្ដើរចេញទៅក្រៅ។ (រូបថត MONOROOM.info/ O.Vary)

គេហទំព័ររបស់ក្រសួងមហាផ្ទៃ ផ្សាយនៅថ្ងៃទី២៣ ខែសីហា ឆ្នាំ២០១៣ បានបង្ហាញឲ្យដឹងថា លោក នុត សាអាន រដ្ឋ​លេខាធិការក្រសួងមហាផ្ទៃ ដែលបានចូលរួមក្នុងពិធីផ្លាស់ប្តូរ មុខតំណែងមន្រ្តីពន្ធនាគារចំនួន១៨នាក់ បានថ្លែងទៅកាន់​មន្រ្តីទាំងនោះថា៖ «ក្រសួងមហាផ្ទៃ នឹងចាត់វិធានការអនុវត្តតាមច្បាប់ ចំពោះមន្ត្រីពន្ធនាគារណា ដែលចូលចិត្តប្រើ​អំណាចធ្វើទារុណកម្មទៅលើទណ្ឌិត»។

រដ្ឋលេខាធិការក្រសួងមហាផ្ទៃរូបនេះបន្ថែមថា ពន្ធនាគារមិនមែនជាកន្លែង សម្រាប់ធ្វើទារុណកម្មណាមួយទៅលើទណ្ឌិត ជាប់ពន្ធនាគារនោះទេ ប៉ុន្តែពន្ធនាគារជាកន្លែង សម្រាប់អប់រំកែប្រែទណ្ឌិត ដែលធ្លាប់តែប្រព្រឹត្តអំពើខុសច្បាប់ ទៅធ្វើ​អំពើ​ស្របច្បាប់វិញ ហើយពន្ធនាគារ ក៏ជាកន្លែងសម្រាប់បណ្តុះបណ្តាលទណ្ឌិត ឲ្យមានជំនាញចំណេះដឹងផ្សេងៗ ដើម្បីឲ្យពួក​ងាយស្រួលស្វែងរកការងារស្របច្បាប់ នៅបន្ទាប់ពីការអនុវត្តន៍ទោសចប់។

សូមរម្លឹកថាបើយោងលើគេហទំព័រពន្ធនាគារ បង្ហាញថា គិតត្រឹមថ្ងៃទី១៥ ខែកក្កដា ឆ្នាំ២០១៣ នេះ ជនជាប់ឃុំសរុបនៅ​ពន្ធនាគារទូទាំងប្រទេស មានចំនួន ១៤.៨៩៤នាក់ ក្នុងនោះទណ្ឌិតជាស្រី មានចំនួន១.១៧២នាក់។

លោក គឺម សារិន ប្រធាននាយកដ្ឋានអប់រំកែប្រែ នៃក្រសួងមហាផ្ទៃបានថ្លែងប្រាប់ទស្សនាវដ្តីមនោរម្យព័ងអាំងហ្វូ នៅថ្ងៃ​ទី២៣ ខែសីហា ឆ្នាំ២០១៣នេះថា៖ «ការលើកឡើងរបស់លោករដ្ឋលេខាធិការនៅពេលនេះ គឺគ្រាន់តែជាព្រួយបារម្ភ និង​ផ្តាំផ្ញើរតែប៉ុនណ្ណោះ»។ ប្រធាននាយកដ្ឋានអប់រំកែប្រែរូបនេះពន្យល់ថា ករណីធ្វើទារុណ្ឌកម្មលើអ្នកទោស គឺបានកើត​ឡើង​តិចតួច និងវាជារឿងរវាងបុគ្គល និងបុគ្គល ហើយវាបានកន្លងហួសច្រើនឆ្នាំមកហើយ។ លោកបន្តថា ចំពោះស្ថានភាព​បច្ចុប្បន្នក្នុងពន្ធនាគារ មិនមានការធ្វើទារុណកម្មនោះទេ។

កន្លងមកអង្គការសង្គមស៊ិវិល ដែលធ្វើការទាក់ទងនឹងវិស័យពន្ធនាគារ បានអះអាងថាពន្ធនាគារនៅកម្ពុជា មិនទាន់មាន​លក្ខខណ្ឌល្អប្រសើរនៅឡើយទេ។ ពួកគេពន្យល់ថាពន្ធនាគារ មានលក្ខណៈតូចចង្អៀត គ្នានអនាម័យ និងលក្ខខណ្ឌ​ផ្សេងៗទៀត បង្ករការលំបាកដល់ការរស់នៅ របស់ទណ្ឌិតជាស្រ្តីដែលមានកូនតូចៗ។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្ស លីកាដូ បានអះអាងថា លោកសារទរ​ចំពោះ​គោលជំហររបស់ក្រសួងមហាផ្ទៃ ដែលមានចំណាត់ការលើមន្រ្តីពន្ធនាគារ ក្នុងករណីដែលពួកគេធ្វើទង្វើខុសច្បាប់។ តែ លោកមានការ​ព្រួយ​បារម្ភចំពោះសុវត្ថិភាពជនសង្ស័យដែលត្រូវបានឃាត់ខ្លួន និងឃុំខ្លួនដោយសមត្ថកិច្ចនៅ​កន្លែងឃុំ​ខ្លួន​បណ្តោះអាសន្ន រង់ចាំបញ្ជូនទៅតុលាការ។

ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្ស លីកាដូរូបនេះ បានបញ្ចាក់បន្ថែមថា៖ «កន្លងមកយើងធ្លាប់​ទទួល​របាយ​ការណ៍មកថា មានការធ្វើទារុណកម្មជនសង្ស័យ ក្នុងកំឡុងពេលឃុំខ្លួនបណ្តោះអាសន្ធ»។ លោក​សំណូមពរ​ដល់​ក្រសួង​មហាផ្ទៃ ត្រូវរឹងបន្តឹងច្បាប់ទាំងផ្នែកពន្ធនាគារ និងនិងទាំងផ្នែកនគរបាលយុត្តិធម៌។

តែបើទោះជាមានរបាយការណ៍ ដូចការលើកឡើងរបស់មន្ត្រីសិទ្ធិមនុស្សយ៉ាងដូច្នេះក៏ដោយ តែរហូតមកដល់ថ្ងៃនេះ មិន​មានមន្ត្រីពន្ធនាគារណាម្នាក់ ត្រូវបានក្រសួងមហាផ្ទៃចាប់ឲ្យមកទទួលទណ្ឌកម្មនោះនៅឡើយ៕

--------------------------------------------------------

ដោយៈ អ៊ុំ បូរី - ភ្នំពេញថ្ងៃទី២៣ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...