នៅក្នុងឈុតឆាកលើកទីបីនេះ អ្នកនាង ចន ច័ន្ទ ទំនងជាចង់ការពារសិទ្ធិនៃការបញ្ចេញមតិរបស់ខ្លួន និង​បន្ថយ​ទម្ងន់នៃ​ការ​រិះគន់ ដែលបណ្ដាលមក​ពីឈុតឆាកលើកទី១ និងលើកទីពីរ។ អ្នកនាងបានសរសេរ​បង្ហោះ នៅ​លើ​ទំព័រហ្វេសប៊ុក​​ផ្ទាល់ខ្លួន​ថា៖ «បងប្អូនណា ក៍មានសិទ្ធិបញ្ចេញមតិដែរ ប៉ុន្តែពិតហេីយ (ការបញ្ចេញមតិនោះ) នឹង​មាន​ការ​គាំទ្រ និង​ប្រឆាំង»។

» សូមអានអត្ថបទ ដែលទាក់ទងឡើងវិញ៖ ចលនា​​ប្រឆាំង ចន ច័ន្ទលក្ខិណា កក្រើក​ជា​ថ្មី​ ពេញ​ហ្វេសប៊ុក

បន្ទាប់មក តារាសម្ដែងវ័យជ្រេរូបនេះ បានក្លែមសំដីលេបខាយ ដាក់ត្រឡប់ទៅអ្នករិះគន់ថា៖ «ខ្ញុំ​មិន​ភ្ញាក់​ផេី្អល​ទេ សំរាប់​បង​ប្អូន ដែលគាំទ្រគណបក្សណាមួយផ្កាប់មុខ ហេីយខ្ញុំដឹងច្បាស់ថា ក្រុមអ្នកជេរអាជីពទាំងនោះ បេី​មិន​ជេរ គឺ​នឹង​ដាច់​អាជីព​ហេីយ»។

សារលើកទីបី របស់តារាបង្ហាញម៉ូដខាងលើនេះ នៅតែសរសេរភ្ជាប់មកជាសារថ្មី នឹងលិខិតរបស់​សាលា​ដំបូង ផ្ញើរ​ទៅ​ប្រធាន​រដ្ឋសភា លោក ហេង សំរិន ទាក់ទងនឹងចំណាត់ការរបស់តុលាការ ទៅលើលោក កឹម សុខា អនុ​ប្រធាន​ (សព្វថ្ងៃ​ជា​ប្រធាន​ស្ដីទី) គណបក្សសង្គ្រោះជាតិដដែល។ អ្នកនាង ចន ច័ន្ទលក្ខិណា បានសរសេរគាំទ្រ​ចំណាត់​ការ​នេះ របស់​តុលាការ​កម្ពុជា «ដើម្បីស្វែងរកយុត្តិធម៌ជូនកញ្ញា ខុម ចន្ទតារាទី ហៅ ស្រីមុំ» បន្ទាប់​ពី​ស្ត្រី​ជាង​ធ្វើ​សក់​រូប​នេះ បានរងនូវរឿងអាស្រូវស្នេហា ដ៏ចម្រូងចម្រាស់មួយ ដែលគេចោទថា មានជាប់ទាក់ទង​​នឹង​លោក កឹម សុខា។

ស្ថិតក្នុងភ្លើង ដែលកំពុងឆេះសន្ធោសន្ធៅ នៅមិនទាន់បាត់ស្រាប់នេះ អ្នកនាង ចន ច័ន្ទលក្ខិណា បាន​យក​សាំង​មក​ស្រោច​បន្តិចបន្ថែម​ដូច្នេះ៖ «សូមកុំភ្លេចថា ច្បាប់នឹងមិនអនុគ្រោះ ឲ្យអ្នកដែលប្រព្រឹត្តល្មេីសឡេីយ»។

សម្រាប់អ្នកប្រើប្រាស់ បណ្ដាញសង្គមជាច្រើន ជាពិសេសអ្នកគាំទ្រ គណបក្សសង្គ្រោះជាតិវិញ បាន​ចោទ​​តារា​​ស្រី ​ដែល​មាន​រាង​ខ្ពស់ស្រឡះរូបនេះ ថាមានការយល់ដឹង «ប្រកបដោយ»ភាពល្ងង់ខ្លៅ និង​អំពាវនាវ​​ឲ្យ​​អ្នក​​នាង ចន ច័ន្ទលក្ខិណា ដែលបានថ្លែងជួសមុខ ឲ្យស្ត្រី និងអ្នកសិល្បៈនោះ ត្រូវស្វែងរកយុត្តិធម៌ ឲ្យ​សិល្បៈការិនី​​ប៉ុន្មាន​​នាក់ ដែល​រង​អំពើ​អយុត្តិធម៌ តាំងពីច្រើនឆ្នាំមកហើយ តែនៅតែរកជនល្មើស មកផ្ដន្ទាទោស​មិន​បាន។ សិល្បៈការិនី​ទាំង​នោះ រួម​មាន​អ្នក​នាង ពិសិដ្ឋ ពិលីកា - អ្នកនាង តាត ម៉ារីណា - អ្នកនាង ទូច ស៊ុននិច និង​​អ្នកនាង ពៅ បញ្ញាពេជ្រ៕