ក្នុងរយៈពេលជាងពីរម៉ោង នៃកិច្ចប្រជុំបច្ចេកទេស នៃតំណាងគណបក្រប្រជាជនកម្ពុជា និងគណបក្សសង្គ្រោះជាតិ កាលពីព្រឹកថ្ងៃទី១៨ ខែកុម្ភៈនេះ បានបង្ហាញនូលទ្ធផលចំបងមួយគឺ ការដាក់ឲ្យមានការត្រួតពិនិត្យ និងយន្តការ​គ្រប់​គ្រងនៃដំណើរការលើប្រព័ន្ធបោះឆ្នោត តាមរយៈការ«បង្កើតឲ្យមានគណៈកម្មការចម្រុះ» ដែលមាន​សមាសភាព​ស្មើគ្នា។

លោក ព្រំ សុខា (ខាងឆ្វេង) និងលោក សុន ឆៃ ថ្លែងទៅកាន់អ្នកសារព័ត៌មាន បន្ទាប់បីកិច្ចប្រជុំថ្ងៃទី១៨ ខែកុម្ភៈ ឆ្នាំ២០១៤។ (រូបថត MONOROOM.info/ O. Vary)

កិច្ចប្រជុំបច្ចេកទេស -ការបង្កើតឲ្យមានគណៈកម្មការចម្រុះសម្រាប់សិក្សា និងរៀបចំក្របខណ្ឌកែទម្រង់​ការ​បោះ​ឆ្នោតនាពេលខាងមុខ នឹងមានរូបរាង ដោយឈរលើគោលការលិទ្ធិប្រជាធិបតេយ្យ និងនីតិរដ្ឋ ធានាបាននូវភាពសេរី ត្រឹមត្រូវ និងយុត្តិធម៌។

កិច្ចប្រជុំសម្ងាត់«ទ្វេរបក្ស» ដែលផ្តោតសម្ខាន់លើ ការដាក់ឲ្យមានការត្រួតពិនិត្យ យន្តការគ្រប់គ្រង និងដំណើរ​ការ​ប្រព័ន្ធបោះឆ្នោត ដោយចាំបាច់បង្កើតឲ្យមានគណៈកម្មការចម្រុះ ដោយឈរលើកិច្ចស្រុះស្រួលបីយ៉ាងដូចជា «ទី១- ស្នើបង្កើតគណៈកម្មការចម្រុះកំណែទម្រង់ការបោះឆ្នោត។ (…) ទី២- រៀបចំឱ្យមានសិក្ខាសាលាជាតិ ដើម្បីបើក​ទូលាយ ឱ្យមានការចូលរួមយោបល់និងអនុសាសន៍នានាពីភាគីពាក់ព័ន្ធទាំងជាតិ និងអន្តរជាតិ។ (…) ទី៣- កិច្ច​ដំណើរ​ការកំណែទម្រង់ការបោះឆ្នោតនេះ ត្រូវបង្កលក្ខណៈឱ្យមានការគាំទ្របច្ចេកទេស និងហិរញ្ញវត្ថុពីដៃគូ អភិវឌ្ឍន៍​អង្គការជាតិ និងអន្តរជាតិ។» នេះបើយោងតាមសេចក្តីប្រកាសរួម នៃកិច្ចប្រជុំចុះថ្ងៃទី១៨ ខែកុម្ភៈ។

ក្រោយកិច្ចជំនួប ក្នុងសន្និសិទសារព័ត៌មានលោក សុន ឆ័យ មន្រ្តីជាន់ខ្ពស់ និងជាតំណាងគណបក្សសង្គ្រោះជាតិ បានលើកឡើងថា «ជំនួបប្រជុំនេះដោយយោងតាមកិច្ចប្រជុំកំពូលកាលពីថ្ងៃទី១៦ ខែកញ្ញា ឆ្នាំ២០១៣ នាពេល​កន្លងទៅ ក្នុងការរៀបចំយន្តការ ក្នុងការកែទម្រង់ការងារបោះឆ្នោតទៅថ្ងៃមុខ»។ ទោះយ៉ាងណាក៏ដោយលោក ឆុន ឆ័យ តំណាងគណបក្សសង្ក្រោះជាតិ ទទួលស្គាល់ភាពជោគជ័យនៃជំនួបនេះ។ ហើយលោកក៏សង្ឃឹមដែរថា «អាច​នឹងឈានទៅដល់ការដោះស្រាយបញ្ហានយោបាយ ដែលមិនទាន់បានដោះស្រាយ។ ទោះយ៉ាណាក៏ដោយ ក្នុងនាម​តំណាងឲ្យគណបក្សទាំងពីរ យកសេចក្តីនៃការមូលមាត់គ្នា ទៅរាយការជូនថ្នាក់ដឹកនាំរៀងៗខ្លួន ជម្រុញឲ្យ​មាន​ការ​តែងតាំងសមាជិក នៃគណកម្មការចម្រុះនោះជាផ្លូវការ។»

ដោយឡែកលោក ព្រុំ សុខា រដ្ឋលេខាធិការក្រសួងមហាផ្ទៃ តំណាងមកពីគណបក្សប្រជាជនកម្ពុជា បានបញ្ជាក់ថា ក្រោយពីកិច្ចប្រជុំបចេ្ចកទេសចុងក្រោយ កាលពីថ្ងៃទី៥ ខែធ្នូកន្លងមក។ លោកបានលើកឡើងថា គណបក្សទាំងពីរ​មាននូចចំណុចរួមគ្នាមួយ ដែលជាលទ្ធិផលជោគជ័យ នៃលទ្ធផលកិច្ចប្រជុំថ្ងៃទី១៨ ខែកុម្ភៈនេះគឺ «ការបង្កើតឲ្យមាន​គណៈកម្មការចម្រុះសម្រាប់សិក្សា និងរៀបចំក្របខណ្ឌកែទម្រង់ការបោះឆ្នោត»។ លោកបានបន្ថែមថា នេះជាគោល​នយោបាយរួមមួយនៃការបោះឆ្នោត ដែលមានស្ទើរគ្រប់ផ្នែកទាំងអស់ ក្នុងរឿងនយោបាយ តែមិនមានការ​ពិភាក្សា​គ្នាលើបញ្ហានៃការបោះឆ្នោរ«ឡើង»វិញនោះទេ។

ក្នុងសេចក្ដីប្រកាសរួមនៃកិច្ចប្រជុំ ដែលចុះហត្ថលេខាដោយលោក ព្រុំ សុខា តំណាងគណ បក្សប្រជាជនកម្ពុជា និង​លោក សុន ឆ័យ តំណាងក្រុមការងារ របស់គណបក្សសង្គ្រោះជាតិ ព្រមព្រៀងគ្នាជាថ្មីនៃការរាយការណ៍​អំពី​លទ្ធផល នៃកិច្ចប្រជុំនេះទៅថ្នាក់ដឹករបស់ខ្លួន។ និងបានឯកភាពគ្នាជាបន្ដ ក្នុងការជួបលើកក្រោយៗទៀត ដើម្បី​ឆ្ពោះទៅរកជំនួបកំពូល រវាងថ្នាក់កំពូលនៃគណបក្សទាំងពីរ។

សូមរម្លឹកថា ជំនួបរវាងគណបក្សប្រជាជនកម្ពុជា និងគណបក្សសង្គ្រោះជាតិព្រឹកថ្ងៃទី១៨ ខែកុម្ភៈ ឆ្នាំ២០១៤ នៅ​វិមានព្រឹទ្ធសភាមានសមាសភាពចូលរួម មកពីគណបក្សប្រជាជនកម្ពុជា រួមមានលោកព្រុំ សុខា រដ្ឋលេខាធិការ​ក្រសួងមហាផ្ទៃ លោកសក់ សេដ្ឋា រដ្ឋលេខាធិការក្រសួងមហាផ្ទៃ និងលោកកើត រិទ្ធ អនុរដ្ឋលេខាធិការ​ក្រសួង​យុត្តិធម៌។

ឯតំណាងគណបក្សគណបក្សសង្គ្រោះជាតិ រួមមានលោកសុន ឆ័យ សមាជិកសភាពបក្សសង្រ្គោះជាតិ លោកយ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ និងលោកគួយ ប៊ុនរឿន មន្រ្តីជាន់ខ្ពស់របស់​គណបក្សសង្រ្គោះជាតិ​ទទួលបន្ទុកកិច្ចការបោះឆ្នោត៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី១៨ ខែកុម្ភៈ ឆ្នាំ២០១៤