យុទ្ធនាការធម្មជាតិនៃក្តីស្រលាញ់នេះ ត្រូវបានក្រុមយុវជនទាំងនោះ ចំណាយពេលវេលាផ្ទាល់ខ្លួន ក្នុងថ្ងៃ​ឈប់​សំរាកពីកាសិក្សា និងថ្ងៃដែលពួកគេ ធ្លាប់តែសប្បាយបំផុតជាមួយគូរស្នេហ៍ ជារៀងរាល់ឆ្នាំនោះ មកចូលរួម​បំបែក​កូនឈើ រាប់ពាន់ដើមនៅក្នុងវត្តបទមវតី យ៉ាងសប្បាយរីករាយ និងដោយពេញចិត្តទៅវិញ។

ក្រុមយុវជនទាំងនោះ បាននាំចាប់ផ្តើមបំបែកកូនឈើ តាំង ពីម៉ោង៨:៣០ ព្រឹកមកម្លេះ ហើយពួកគេ ធ្វើវាយ៉ាង​សប្បាយរីករាយសើចក្អាកក្អាយ មិនរវល់ជាមួយនឹងថ្ងៃបុណ្យ នៃក្តីស្រលាញ់ឡើយ។ ពួកគេបានកំណត់ថា ក្នុង​រយៈពេលមួយព្រឹកនេះ ពួកគេនឹងបំបែកឲ្យបាន ១០០០ដើម ទុកសំរាប់ចែកចាយដល់យុវជនណា ឫអង្គការ​ណា​មួយ ចង់បានកូនឈើនោះទៅដាំ នៅក្នុងតំបន់ណាមួយក្នុងប្រទេសកម្ពុជា។ ប្រភេទកូនឈើ ដែលពួកគេបាន​បំបែកនេះ មានតែមួយប្រភេទប៉ុណ្ណោះ គឺដើមរាំងភ្នំ ដោយកូនឈើដទៃទៀត មិនទាន់លូតលាស់អាចបំបែក​បាន​នៅឡើយ។

យុវជន ឡាទីន បាននិយាយប្រាប់ ទស្សនាវដ្តីមនោរម្យ.អាំងហ្វូ ថា ថ្ងៃបុណ្យនៃសេចក្តីស្រលាញ់ វាជាថ្ងៃធម្មតា​ប៉ុណ្ណោះ ព្រោះវាមិនមែនជាថ្ងៃបុណ្យជាតិរបស់ខ្មែរនោះទេ ដូច្នេះហើយបានជា ឡាទីន មកចូលរួមបំបែកកូន​ឈើ​វិញ។ យុវជនរូបនេះបន្តថា ប្រសិនបើរូបគេ មិនបានចូលរួមសកម្មភាពដាំដើមឈើ យបានច្រើនក៍ដោយ ក៍គេ​បានចូលរួមបំបែក និងបណ្តុះដែរ ដែលធ្វើទៅតាមពេលវេលា ដែលអាចធ្វើទៅបាន។ ម្យ៉ាងវិញទៀត ដើមឈើ​មានសារៈប្រយោជន៍ច្រើនណាស់ សំរាប់បរិស្ថាន និងអាកាសធាតុ។ ឡាទីន ថា នឹងបន្ត​សកម្មភាពទាំង​នេះបន្ត​ទៀត បន្ទាប់ពីសម្រាកពីការសិក្សា ដើម្បីកម្ពុជាក្លាយជាប្រទេស ដែលសំបូទៅដោយដើមឈើ។

ដៃកំពុងបំបែកកូនឈើ យុវតី ម៉ៅ នាថ វិញ បានប្រាប់ទស្សនាវដ្តី ទាំងសើចក្អាកក្អាយថា ថ្ងៃបុណ្យនៃក្តី​ស្រលាញ់​សំរាប់កញ្ញា ជាថ្ងៃធម្មតាដូចថ្ងៃដទៃទៀតដែរ ហើយកញ្ញាក៍មិនទុកថ្ងៃនេះ ទំនេចោលឥតប្រយោជន៍នោះដែរ ដែល​កញ្ញាយកថ្ងៃនេះ មកផ្តល់ក្តីស្រលាញ់ឲ្យកូនឈើវិញ ព្រោះកញ្ញាគិតវាជាសកម្មភាពមួយ ដែលធ្វើឲ្យយើង​សប្បាយចិត្ត។ ហើយម្យ៉ាងទៀតកញ្ញាគិតថា ការដាំដើមឈើឡើងវិញ អាចជួយប្រទេសកម្ពុជា អាចកាត់បន្ថយ​ការកើន​ឡើងកំដៅ ឫការប្រែប្រួលអាកាសធាតុបាន។

កញ្ញ ម៉ៅ នាថ សន្យានឹងគៀងគរយុវជនដទៃទៀត ឲ្យមកចូលរួមដាំដើមឈើឡើងវិញ ដូចកញ្ញាដែរ និងអូស​ទាញ​ពួកគេ ឲ្យឈប់ប្រព្រឹត្តអំពើ ដែលនាំឲ្យមានការអាប់ឱនកិត្តិយស នៅថ្ងៃបុណ្យនៃក្តីស្រលាញ់នេះ។

កូនឈើទាំងអស់ យុវជនទាំងនោះបានបំបែក នឹងត្រូវបានមើលថែដោយលោក ណៅ សុខ ដែលជាអ្នកដើរ​រើស​គ្រាប់ពូជឈើគ្រប់ប្រភេទ ក្នុងប្រទេសកម្ពុជាមកបណ្តុះទុក ឲ្យអ្នកចង់ដាំកូនឈើ ឫអ្នកដែលស្រលាញ់បរិស្ថាន យកវាទៅដាំ។ គ្រាប់ពូជដែលលោក ណៅ សុខ យកមកបណ្តុះ សុទ្ធសឹងតែជាប្រភេទឈើកម្រ ដែលស្ទើតែផុត​ពូជអស់ ពីប្រទេសមួយនេះទៅហើយ។ លោក ណៅ សុខ ដែលបានចំណាយពេលវេលារបស់លោក ក្នុងរឿង​នេះ ស្ទើតែកន្លះជីវិតទៅហើយ បានព្យាយាមធ្វើសកម្មភាពបណ្ដុះកូនឈើ ដោយលោកចង់ឲ្យប្រទេសកម្ពុជា ក្លាយជាប្រទេសដែលមានព័ណ៌បៃតងវិញ៕