មនុស្ស​១៥​នាក់ បាន​រួច​រស់​មាន​ជីវិត ពី​ហេតុការណ៍​ធ្លាក់​យន្ដហោះ​នេះ ដែល​ទើប​តែ​ហោះ​ងើប​ខ្លួន បាន​បន្តិច​ពី​ព្រលាន​យន្ដហោះ នៅ​​វេលា​​ម៉ោង ១០ និង​​៥៥​នាទី ព្រឹក​ថ្ងៃ​ពុធ ទី​០៤ ខែ​កុម្ភៈ​នេះ។ បើ​តាម​អាជ្ញាធរ​ផ្នែក​អាកាសចរណ៍​ស៊ីវិលរបស់​កោះ​តៃវ៉ាន់ បាន​ឲ្យ​ដឹង​ថា មាន​មនុស្ស​១៧នាក់​ទៀត កំពុង​បាត់​ខ្លួន​នៅ​ឡើយ។

វីដេអូ​មួយ​ដែល​ថត​ដោយ អ្នក​បើកបរ​រថយន្ដ​ម្នាក់ បាន​បង្ហាញ​ថា យន្ដហោះធុន ATR 72-600​ បាន​ធ្លាក់​ក្នុង​សភាព​ផ្អៀង​ខ្លួន​​ទៅ​មួយ​ចំហៀង នៅ​លើផ្លូវ​ស្ពាន​មួយ ដែល​ស្ថិត​នៅមិន​ឆ្ងាយ​ប៉ុន្មាន​ពី​ព្រលាន​យន្ដហោះ។ បន្ទាប់​មក​យន្ដហោះ ដែល​ទំនង​ជា​បាន​គេច​ខ្លួន​រួច ចេញ​ពី​ការ​ប៉ះ​ទង្គិច​ជា​មួយ​អាគារ​ធំៗ​នោះ បាន​បញ្ចប់​វាសនា​របស់​ខ្លួន នៅ​ក្នុងស្ទឹង​។

អ្នកដំណើរមួយចំនួនដែលមានពាក់អាវការពារ បានបណ្ដោះខ្លួនចេញម្ដងម្នាក់ ពីតួបាក់បែកនៃយន្ដហោះ និង​ពីទឹក ខណៈពេលដែលក្រុមអ្នកជួយសង្គ្រោះ បានជិះកាណូតផ្លុំខ្យល់របស់ពួកគេមកដល់។

បើតាមការថតសម្លេងបានរវាងការិយាល័យត្រួតពិនិត្យការហោះហើរ និងយន្ដហោះ បានឲ្យដឹងពីសម្លេងចុង​ក្រោយរបស់អ្នកបើកបរយន្ដហោះថា៖ «សុំជំនួយ ៗ ម៉ាស៊ីនប្រតិកម្មយន្ដហោះរលត់!»។

ប្រសិនបើយន្ដហោះប្រភេទ ATR 72-600 អាចហោះរួចជាមួយនឹងម៉ាស៊ីនប្រតិកម្មយន្ដហោះតែមួយចំហៀង ប៉ុន្តែហេតុការណ៍នេះ ទំនងជាមិនអាចទៅរួចទេ នៅពេលដែលយន្ដហោះទើបនឹងហោះងើបពីដី ដែលទាមទារ​ឲ្យមានកម្លាំងធាក់រួម របស់ម៉ាស៊ីនប្រតិកម្មទាំងពីរ។

អាជ្ញាធរបានបញ្ជាក់ទៀតថា ពីក្នុងចំណោមអ្នកដំណើរទាំង៥៨នាក់ មាន៣១នាក់ ជាទេសចរណ៍មកពីប្រទេស​ចិនដីគោក។ ពីប្រទេសចិន នាយករដ្ឋមន្ត្រីរបស់ប្រទេសកុម្មុយនីស លោក លី កេកៀន (Li Keqiang) បានថ្លែង​ថាក្រុងប៉េកាំង មានបំណងចង់ជួយឈឺឆ្អាល ក្នុងករណីនេះ។

ក្រុមហ៊ុនអាកាសចរណ៍ តេនអេសៀ ជាក្រុមហ៊ុនទីបីនៅកោះតៃវ៉ាន់។ កាលពីខែកក្កដាកន្លងទៅ យន្ដហោះធុន​ដដែល (ATR 72-500) នេះ បានធ្លាក់នៅលើកោះប៉េនហ្គូ (Penghu) បង្កឲ្យមនុស្ស៤៨នាក់ ពីក្នុងអ្នកដំណើរ​ទាំង៥៨​នាក់ បានស្លាប់។

នាយកក្រុមហ៊ុនអាកាសចរណ៍នេះ លោក ឆេន ស៊ីនដេ (Chen Xinde) បានថ្លែងសុំទោសទៅដល់​ក្រុមគ្រួសារ​នៃជនរងគ្រោះ នៅក្នុងសន្និសីទការសែតមួយផ្សាយបន្តផ្ទាល់ តាមកញ្ចក់ទូរទស្សន៍។ បើតាមអាជ្ញាធរ បាន​ថ្លែង​​បញ្ជាក់ដែរថា យន្ដហោះដែលទើបនឹងធ្លាក់នេះ បានទទួលការត្រួតពិនិត្យ កាលពីថ្ងៃទី២៦ ខែមករា​កន្លង​ទៅនេះ រីឯអ្នកបើកបរយន្ដហោះវិញមានបទពិសោធន៍ក្នុងការហោះហើរ ចំនួន៤៩១៦ម៉ោង ខណៈឯជំនួយការ​បើកបរយន្ដហោះ មានបទពិសោធន៍ក្នុងការហោះហើរ ចំនួន ៦៩២២ម៉ោង៕