ធ្លាក់​យន្ដហោះ​ដឹក​កីឡាករ​បាល់ទាត់​ប្រេស៊ីល៖ នៅ​រស់​៦នាក់

យន្ដហោះមួយគ្រឿង ដែលដឹកក្រុមកីឡាករបាល់ទាត់ «Chapecoense» របស់ប្រទេសប្រេស៊ីល បានធ្លាក់​នៅ​ក្នុង​ប្រទេស​កូឡំប៊ី នាយប់ថ្ងៃចន្ទនេះ។ បើតាមព័ត៌មានបឋម បានឲ្យដឹងថា យន្ដហោះនេះ ដឹកអ្នក​ដំណើរ​៧២នាក់ និង​បុគ្គលិក​បម្រើការ ៩នាក់ទៀត។ ព័ត៌មានបាន​បញ្ជាក់ដែរថា មកទល់នឹងវេលានេះ មាន​អ្នក​នៅ​រស់​៦នាក់។
ធ្លាក់​យន្ដហោះ​ដឹក​កីឡាករ​បាល់ទាត់​ប្រេស៊ីល៖ នៅ​រស់​៦នាក់
យន្ដហោះដែលដឹកក្រុមកីឡាបាល់ទាត់ «Chapecoense» តែបានធ្លាក់នៅក្នុងតំបន់ព្រៃភ្នំ នៃប្រទេសកូឡំប៊ី។ (រូបថតលើទ្វីសធើរ)
Loading...
  • ដោយ: ជ័យវិបុល ([email protected]) - ប៉ារីស ថ្ងៃទី២៩ វិច្ឆិកា ២០១៦
  • កែប្រែចុងក្រោយ: November 29, 2016
  • ប្រធានបទ: គ្រោះអាកាស
  • អត្ថបទ: មានបញ្ហា?
  • មតិ-យោបល់

ក្រុមកីឡាបាល់ទាត់មួយ របស់​ប្រទេស​ប្រេស៊ីល បានជិះ​នៅក្នុងយន្ដហោះមួយគ្រឿង ដែលបានជួប​គ្រោះ​អកុសល ធ្លាក់បោកខ្លួន នៅក្នុងប្រទេសកូឡំប៊ី ក្នុងយប់ថ្ងៃចន្ទនេះ។ ក្រុមកីឡាករនោះ មានឈ្មោះជាផ្លូវការ​​ថា «Associação Chapecoense de Futebol» ដែលត្រូវទៅប្រកួត ក្នុងវគ្គផ្ដាច់ព្រ័ត្រ នៃក្របខណ្ឌ«Copa Sud americana» ទល់​នឹងក្រុម «Atletico Nacional» នៅក្នុងប្រទេសកូឡំប៊ី នៅថ្ងៃពុធ​ស្អែក​នេះ។ បើតាម​ទីភ្នាក់ងារ​ព័ត៌មាន​បារាំង «AFP» បានរាយការណ៍ នូវដំណឹងបឋមថា មានមនុស្សនៅរស់រានមានជីវិត ៦នាក់។

យន្ដហោះបានធ្លាក់បោកខ្លួន នៅវេលាម៉ោង២២ជាង (ម៉ោងក្នុងស្រុក) នៅលើជ្រលងភ្នំ «Cerro Gordo» នៃ​ខេត្ត​«La Union» របស់ប្រទេសកូឡំបី ដែលជាតំបន់ភ្នំ ព័ទ្ធជុំជិតដោយព្រៃដ៏ក្រាស់។ យន្ដហោះ បាន​ហោះ​ចេញ​ពី​ព្រលាន​យន្ដហោះ «Santa Cruz» នៃប្រទេសបូឡូវី ហើយត្រូវទៅចុះ នៅព្រលានយន្ដហោះ​អន្តរជាតិ នៃ​ក្រុង «Medellin» ដែល​ស្ថិត​នៅ​ចំងាយ​ប្រមាណ​ជា ៥០គីឡូម៉ែត្រ ពីចំណុចដែលយន្ដហោះធ្លាក់។

អ្នកនាំពាក្យ​របស់​​អកាសចរណ៍ស៊ីវិល នៃប្រទេសកូឡំប៊ី បានថ្លែងប្រាប់ទីភ្នាក់ងារព័ត៌មានបារាំងថា៖ «បើ​តាម​របាយការណ៍ ដែលយើងទទួលបាន បានឲ្យដឹងថា យន្ដហោះ បានបាត់ខ្លួន ពីប្រព័ន្ធត្រួតពិនិត្យ​ផ្លូវ​អាកាស នៅ​ម៉ោង២១ និង៣០នាទី (ម៉ោងក្នុងស្រុក) ហើយគ្រោះថ្នាក់់ធ្លាក់យន្ដហោះ ត្រូវបានឲ្យដឹង នៅម៉ោង២២ និង​៣៤នាទី»។ អ្នកនាំពាក្យដដែល​បានបញ្ជាក់ថា គណៈកម្មការមួយ ត្រូវបានបង្កើតឡើង នៅព្រលាន​យន្ដហោះ «Medellin» ដើម្បីគ្រប់គ្រងស្ថានការណ៍ នៃគ្រោះធ្លាក់យន្ដហោះនេះ។

ខ្វះប្រេងឥន្ទនៈ?

ភ្លាមៗ ក្រោយការធ្លាក់យន្ដហោះ អាកាសចរណ៍ស៊ីវិលកូឡំប៊ី បានអះអាង នៅលើទំព័រទ្វីសធើររបស់ខ្លួនថា ដំណើរទៅកាន់តំបន់ ដែលយន្ដហោះបានធ្លាក់ អាចធ្វើទៅបាន តាមតែមធ្យោបាយផ្ទាល់ដីប៉ុណ្ណោះ ដោយ​ហេតុ​បណ្ដាល​មក​ពី​ស្ថានភាព​ឧត្តុនិយម ថាមានភាពអាក្រក់ខ្លាំង។

អភិបាលក្រុង «La Ceja» ដែលស្ថិតនៅក្បែរខេត្ត «La Union»បានថ្លែងប្រាប់ទីភ្នាក់ងារព័ត៌មាន «AFP» ថា៖ «តាមទំនងមើលទៅ យន្ដហោះ​បានជួបបញ្ហា​ភ្លាមៗ បណ្ដាលមកពីខ្វះប្រេងឥន្ទនៈ»។ បើតាម​អភិបាល​រូប​នេះ​ដដែល បានបញ្ជាក់​ទៀតថា ក្រុមអ្នកជួយសង្គ្រោះ បានទៅដល់កន្លែង​កើតហេតុរួចរាល់ ហើយ​មជ្ឈមណ្ឌល​សុខភាព ដែល​នៅក្នុងតំបន់ក្បែរនោះ ក៏បានត្រៀមខ្លួន​ជាស្រេចដែរ ក្នុងការទទួលព្យបាលអ្នករងរបួស៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...