រថភ្លើងបុករថយន្ដផ្ទុះឆេះនៅរដ្ឋញ៉ូយក ស្លាប់៦នាក់ (vdo)
- ដោយ: សុបិន្ដ អត្ថបទ និងយកការណ៍៖ សុបិន្ត ([email protected]) - ម៉ុងរ៉េអាល់ ថ្ងៃទី០៤ កុម្ភៈ ២០១៥
- កែប្រែចុងក្រោយ: February 04, 2015
- ប្រធានបទ: គ្រោះផ្លូវដែក
- អត្ថបទ: មានបញ្ហា?
- មតិ-យោបល់
-
រថភ្លើងដែលរត់នៅតាមតំបន់ជាយក្រុង បានបុករថយន្ដ ហ្សីប ឆារ៉ូគី (Jeep Cherokee) មួយគ្រឿង នៅលើផ្លូវរបស់ខ្លួន នៅក្នុងរដ្ឋញ៉ូយកសហរដ្ឋអាមេរិក។ គ្រោះថ្នាក់បានកើតឡើង នៅយប់ថ្ងៃអង្គារទី២ ចូលមកថ្ងៃពុធទី៤ ខែកុម្ភៈនេះ ដែលជាពេលវេលាដែលសម្បូរទៅដោយអ្នកដំណើរ នៅក្បែរទីក្រុង វ៉ាឡាយ៉ា (Valhalla) ចំងាយប្រមាណជាង៣០គីឡូម៉ែត្រ ពីភាគខាងជើងនៃទីក្រុងញ៉ូយក។
អភិបាលរដ្ឋញ៉ូយក លោក អេនឌ្រូ គូអូម៉ូ (Andrew Cuomo) បានថ្លែងឲ្យដឹងពីតុល្យភាពចុងក្រោយថា មានមនុស្ស៦នាក់បានស្លាប់ ក្នុងនោះមានអ្នកបើកបររថភ្លើងជាស្ត្រីម្នាក់ និងអ្នកដំណើរប្រាំនាក់ ដែលធ្វើដំណើរចេញពីចំណត (Grand Central) នៃសង្កាត់ម៉ាណាតាន់ (Manhattan របស់ទីក្រុងញ៉ូយក)។
គ្រោះថ្នាក់ដែលបង្កឲ្យមានការផ្ទុះឆេះជាភ្លើង និងហុយជាផ្សែងយ៉ាងខ្មួលខ្មាញនេះ ក៏បានបង្កឲ្យមានមនុស្សរបួស១៥នាក់ដែរ ក្នុងនោះ៧នាក់ ស្ថិតក្នុងសភាពធ្ងន់ធ្ងរ។
មកទល់នឹងពេលនេះ គេនៅមិនទាន់ដឹងពីមូលហេតុដែលធ្វើរថយន្ដ ហ្សីប ខាងលើ មកឈប់គាំងនៅកណ្ដាលផ្លូវរថភ្លើងដូច្នេះឡើយ។ ការស៊ើបអង្កេតមួយ ត្រូវបានបើកធ្វើ ដើម្បីកំណត់ពីមូលហេតុ នៃគ្រោះថ្នាក់នេះ ខណៈចរាចរណ៍រថភ្លើង នៅលើបណ្ដាញផ្លូវដែក ទៅកាន់តំបន់ខាងជើងនោះ ត្រូវបានផ្អាករហូតដល់មានបញ្ជាជាថ្មី។
គ្រោះថ្នាក់រថភ្លើងនេះ ជាគ្រោះថ្នាក់ដ៏អាក្រក់ជាងគេ នៅក្នុងប្រវត្តិរថភ្លើងក្រោមដី នៅក្នុងតំបន់ខាងជើងនៃក្រុងញ៉ូយកនេះ ហើយជាគ្រោះថ្នាក់លើកទីបីដែរ សម្រាប់រយៈពេលត្រឹមតែពីរឆ្នាំនេះ៕
