ពូទីន៖ រ៉ូស្ស៊ី មិនដេញនរណាម្នាក់ ដើម្បីតបទណ្ឌកម្មអាមេរិកទេ
- ដោយ: ឈូករ័ត្ន ([email protected]) - ប៉ារីស ថ្ងៃទី២៦ ធ្នូ ២០១៦
- កែប្រែចុងក្រោយ: December 30, 2016
- ប្រធានបទ: សង្គ្រាមត្រជាក់
- អត្ថបទ: មានបញ្ហា?
- មតិ-យោបល់
-
ប្រទេសរ៉ូស្ស៊ី នឹងមិនបណ្ដេញនរណាម្នាក់ ដើម្បីឆ្លើយតប ទៅនឹងទណ្ឌកម្មរបស់សហរដ្ឋអាេមរិក ធ្វើឡើងប្រឆាំងនឹងរដ្ឋាភិបាលក្រុងម៉ូស្គូ ដែលអាមេរិកអះអាងថា បានលូកដៃចូលជ្រៀតជ្រែក ចូលក្នុងការបោះឆ្នោត ប្រធានាធិបតីអាមេរិក កាលពីដើមខែវិច្ឆិកានោះឡើយ។ នេះបើតាមការប្រកាស របស់ប្រធានាធិបតីរ៉ូស្ស៊ី លោក វ្លាឌីមៀរ ពូទីន (Vladimir Poutine) នៅល្ងាចថ្ងៃសុកនេះ។
នៅមុននេះបន្តិច ប្រមុខការទូតរ៉ូស្ស៊ី លោក ស៊ែរហ្គៃ ឡាវ្រៅ (Sergeï Lavrov) បានស្នើសុំឲ្យមានការបណ្ដេញចេញ នូវមន្ត្រីការទូតអាមេរិកាំង ចំនួន៣៥នាក់ ក្នុងនោះមន្ត្រី៣១នាក់ ធ្វើការនៅក្នុងស្ថានទូតអាមេរិក នារដ្ឋធានីម៉ូស្គូ និងបួននាក់ទៀត នៅការិយាល័យការទូតអាមេរិក ប្រចាំនៅក្រុង «Saint-Pétersbourg»។ ប៉ុន្តែលោក វ្លាឌីមៀរ ពូទីន បានសម្រេចចិត្ត ផ្ទុយពីរដ្ឋមន្ត្រីការបរទេស របស់លោកទៅវិញ។ លោកប្រធានាធិបតីបានថ្លែងឡើងថា៖ «យើងមិនបណ្ដេញនរណាម្នាក់ទេ។ ក៏ប៉ុន្តែប្រទេសរ៉ូស្ស៊ី នៅតែរក្សាសិទ្ធិ ក្នុងការចាត់វិធានការតបតរវិញ និងសិទ្ធិ ក្នុងការផ្សះផ្សារ ចំណងទាក់ទងរវាងរ៉ូស្ស៊ី និងអាមេរិក នៅចំពោះនយោបាយថ្មី របស់ប្រធានាធិបតីទើបនឹងជាប់ឆ្នោត ដូណាល់ ត្រាំ (Donald Trump)។»។
យ៉ាងណា ក៏នៅក្នុងឱកាស នៃការថ្លែងរបស់លោកនេះ ប្រធានាធិបតីរ៉ូស្ស៊ី បានធ្វើការបរិហាចំណាត់ការ បែប«អមិត្ត»ថ្មី ដែលសំរេចឡើង ដោយរដ្ឋបាលរបស់ប្រធានាធិបតី ជិតផុតតំណែង លោក បារ៉ាក់ អូបាម៉ា (Barack Obama)។ លោកបានវាយតម្លៃចំណាត់ការនេះ ថាមានលក្ខណៈ«បង្ករឿង» និង«បង្កឲ្យមានចន្លោះប្រហោង» កាន់តែខ្លាំងឡើង សម្រាប់ចំណងទាក់ទង រវាងប្រទេសរ៉ូស្ស៊ី និងអាមេរិក។
នយោបាយការទូតមួយ ដែលគ្មានការទទួលខុសត្រូវ...
«យើងមិនបណ្ដោយខ្លួន ឲ្យធ្លាក់ទៅក្នុងកម្រិត នៃការធ្វើនយោបាយការទូតមួយ ដែលគ្មានការទទួលខុសត្រូវនោះទេ។ (...) យើងនឹងមិនបង្កើតបញ្ហា ដល់មន្ត្រីការទូតអាមេរិកឡើយ។» លោក វ្លាឌីមៀរ ពូទីន បានបញ្ជាក់ទៀតថា៖ «ជារឿងគួរឲ្យស្ដាយណាស់ ដែលរដ្ឋបាលរបស់លោកប្រធានាធិបតី បារ៉ាក់ អូបាម៉ា បានបញ្ចប់ការងាររបស់ខ្លួន ដោយរបៀបនេះ តែខ្ញុំនៅតែជូនពរឆ្នាំថ្មី ទៅជូនលោក (អូបាម៉ា) និងក្រុមគ្រួសារលោកទាំងអស់»។
នៅថ្ងៃសុក្រនេះ ប្រធានាធិបតីអាមេរិក លោក បារ៉ាក់ អូបាម៉ា បានបញ្ជាឲ្យបណ្ដេញមន្ត្រីការទូតរ៉ូស្ស៊ី ចំនួន៣៥នាក់ ចេញពីទឹកដីអាមេរិក និងបានដាក់ទណ្ឌកម្ម ប្រឆាំងនឹងភ្នាក់ងារស៊ើបអង្កេត ចំនួនពីរនាក់ ដែលសហរដ្ឋអាមេរិកសង្ស័យ ថាបានជាប់ពាក់ព័ន្ធ ក្នុងការប្លន់ព័ត៌មាន នៃការបោះឆ្នោតប្រធានាធិបតីអាមេរិក កាលពីថ្ងៃទី៨ ខែវិច្ឆិកា។
វិមានក្រឹមឡាំង (រដ្ឋាភិបាលរ៉ូស្ស៊ី) តាមរយៈរដ្ឋមន្ត្រីការបរទេស លោក ស៊ែរហ្គៃ ឡាវ្រៅ បានច្រានចោលសារជាថ្មី ក្នុងព្រឹកថ្ងៃដដែល នូវការចោទប្រកាន់នេះ និងបានហៅ ការចោទប្រកាន់អាមេរិក ថាគ្មានមូលដ្ឋានគ្រឹះអ្វីទាល់តែសោះ៕