ពលរដ្ឋ​ដែល​មាន​ជម្លោះ បាន​និយាយ​ថា ដើម្បី​ឲ្យ​ការ​តវ៉ា​របស់​ពលរដ្ន​មក​ពី​ឃុំ​អូបីជាន់ កាល​ពី​ថ្ងែ​ទី​៣០ ខែ​មករា ឆ្នាំ​២០១៥​កន្លង​ទៅ នៅ​មុខ​សាលា​ខេត្ត​បន្ទាយ​មាន​ជ័យ​ឆាប់​បិទ​បញ្ចប់​នោះ អភិបាល​រង​ខេត្ត បាន​ជួប​តំណាង​ពលរដ្ឋ​ទាំង​ប្រាំ​នាក់ ដោយ​បាន​សន្យា​ប្រាប់​ថា នឹង​ដោះ​ស្រាយ​ជម្លោះ​ដី​ធ្លី ឲ្យ​ក្រុម​ពលរដ្ឋ​នៅ​បី​ថ្ងៃ​ទៀត។ ប៉ុន្តែ​អភិបាល​រង​ខេត្ត​ខាង​ជើង​មួយ​នេះ បាន​បដិសេធ​ថា​លោក​មិន​បាន​សន្យា​អ្វី​ឡើយ។

ការសន្យាដែល​បើ​គិត​ជា​ថ្ងៃ បាន​មក​ដល់​ថ្ងៃ​ចុង​ញ្ចប់​របស់​វា នៅ​ថ្ងៃទី​០៣ ខែ​កុម្ភៈ ឆ្នាំ​២០១៥​នេះ​ហើយ។

លោក ចុង ផែត អភិបាលរងខេត្តបន្ទាយមានជ័យ បានបញ្ជាក់ប្រាប់ជាមួយទស្សនាវដ្ដី​មនោរម្យ.អាំងហ្វូ​ថា លោកសូមបដិសេធទាំងស្រុង នូវអ្វីដែក្រុមពលរដ្ឋបានលើកឡើង។ លោកបញ្ជាក់ថា មិនបាននិយាយថា​បីថ្ងៃ​ទៀត ចុះទៅដោះស្រាយនោះទេ គឺលោកនឹងជួបប្រជុំជាមួយថ្នាក់ខេត្តសិន ទើបអាចសម្រេចកិច្ចការនេះបាន។ អភិបាលរងលោក ចុង ផែត បានបន្ថែមថា ដោយមួយរយៈនេះ លោកអភិបាលខេត្តរវល់ច្រើន ហេតុនេះហើយ ទើបមិនទាន់មានការចុះដំណើការ ប៉ុន្តែមិនអាចប្រាប់បានពីពេលវេលាណាមួយ ឲ្យបានច្បាស់លាស់​នោះ​ឡើយ។

» សូមអានអត្ថបទដែលទាក់ទង ដោយចុចនៅលើទីនេះ។

លោក ចុង ផែត បានថ្លែងបន្តថា រឿងនេះទុកឧកាស ឲ្យលោកពិភាក្សាជាមួយអភិបាលខេត្ត ដែលជាប្រធាន​គណៈ​កម្មការគ្រប់គ្រងផ្នែករដ្ឋ។ ដើម្បីបំពេញនិតិវិធីច្បាប់ឲ្យច្បាស់ គឺមានការពិនិត្យឲ្យបានត្រឹមត្រូវថា ពលរដ្ឋ​ណានៅទីណាពិតប្រាកដ។ ទាំងនេះហើយ ដែលលោកចង់ឲ្យប្រជាពលរដ្ឋទុកពេល ឲ្យក្រុមការងារលោក​នោះ។ លោកបានថ្លែងឲ្យដឹងទៀតថា៖ «ធ្វើអត្តសញ្ញាណកម្មប្រជាពលរដ្ឋពិតប្រាកដសិន»។

ដោយឡែក តំណាងអ្នកភូមិម្នាក់អ្នកស្រី ឡុង សុគន្ធី បានប្រាប់ទស្សនាវដ្តីមនោរម្យ.អាំងហ្វូថា នៅមិនទាន់​មានខាងសាលាណាមួយ ចុះមកធ្វើការដោះស្រាយជូនពួកគាត់ទេ។ ហើយពេលដែលគាត់ទាក់ទង ទៅក្រុម​ការងារទាំងនោះដែលធ្លាប់បានទទួលសំណើរបស់គាត់ ពួកគេបាននិយាយថា ជាប់រវល់ចូលរួមកាត់ខ្សែរបូរ​នៅឯខេត្តផ្សេង ម្យ៉ាងទៀតចាំឲ្យពេលបុណ្យមាឃបូជាចប់សិន។ អ្នកស្រីបានបន្ថែមទៀតថា ទោះបីជាការ​ផ្តល់ដំណឹងនេះ មិនមែនជាលើកទីមួយក៏ដោយ ក៏អ្នកស្រីនៅតែមានជំនឿថា ថ្ងៃណាមួយយ៉ាងឆាប់ខាងមុខ អភិបាលខេត្តលោក គោ ស៊ុំសារឿន នឹងដោះស្រាយឲ្យប្រជាពលដ្ឋ៕