ជីវិត​ជា​អ្នក​សិល្បៈ​ក្នុង​ប្រទេស​កម្ពុជា មិន​មាន​ភាព​រុង​រឿង​ទេ បើ​សូម្បី​តែ​ប្រាក់ សម្រាប់​ព្យាបាល​ជំងឺ​របស់​ខ្លួន​ក៏​ដោយ។ ជា​ពិសេស បើ​គ្រាន់​តែ​អវត្តមាន​​មិន​បាន​ចេញ​ច្រៀង​ទៀត បាន​ធ្វើ​ឲ្យ​លោក នូ ស៊ិប វ័យ ៦៧ ឆ្នាំ ដែល​រង​របួស​ដោយ​សារ​គ្រោះថ្នាក់​ចរាចរណ៍ ប្រឈម​នឹង​កង្វះ​ខាត​ផ្នែក​ថវិកា សម្រាប់​ព្យាបាល​ជំងឺ ហើយ​កំពុង​ស្ថិត​ក្នុង​សភាព​កាន់​តែ​ដុន​ដាប​ទៅៗ។ បច្ចុប្បន្ន​នេះ លោក​កំពុង​ស្នាក់ និង​ស្ថិត​ក្រោម​ការ​ពឹង​អាស្រ័យ លើ​ក្មួយ​ម្នាក់​ក្នុង​ផ្ទះ​ជួល​មួយ នា​រាជធានី​ភ្នំពេញ។

តាមរយៈវីដេអូមួយ ដែលត្រូវបានយកមកបង្ហោះ នៅលើបណ្ដាញសង្គម លោក នូ ស៊ិប បានរៀបរាប់ថា លោក​មិនបានស្វែងរកការព្យាបាល ពីមន្ទីរពេទ្យណាមួយឡើយ ដោយគ្រាន់តែឲ្យក្មួយរស់នៅជាមួយ ទិញ​ថ្នាំ​យក​មក​ព្យាបាលខ្លួនឯង ព្រោះតែលោកធ្លាប់ចេះវិជ្ជាពេទ្យខ្លះៗ​ដែរ និងពិសេសជាងនេះនោះ ក៏ព្រោះ​តែ​លោក​មិន​មានថវិកាគ្រប់គ្រាន់ ក្នុងការព្យាបាល។ រីឯថវិការក្នុងអាជីព​ចម្រៀងនាពេល​កន្លង​មក បាន​ត្រឹម​តែ​ទប់ទល់​ជីវភាព​ប្រចាំថ្ងៃប៉ុណ្នោះ។

អ្នកចម្រៀងជើងចាស់ បានរាប់រាប់ទៀតថា៖ «ពេលជួបគ្រោះថ្នាក់អីចឹងទៅ ឥឡូវកាន់តែយ៉ាប់ហើយ។ ហើយ​គេហៅខ្ញុំទៅច្រៀង ក៏មិនបានទៅដែរ។ ច្រៀងបានត្រឹមតែម៉ារស់ បើផ្អែកលើប្រាក់របបសោធននិវត្តន៍នោះ មិនអាចគ្រប់គ្រាន់នោះទេ សម្រាប់ការចំណាយរាល់ប្រចាំថ្ងៃ។»

ក្នុងទេពកោសល្យសិល្បៈពីកំណើត អ្នកចម្រៀងល្បីឈ្មោះ ដែលមានដើមកំណើតពីខេត្តកំពង់ធំរូបនេះ អាច​ច្រៀង បានទាំងបទសម័យ និងបុរាណរួមមាន បទ​យីកេ, បទបាសាក់ និងមហោរីកជាដើម។ មុនមានគ្រោះ​ថ្នាក់ចរាចរណ៍នេះ លោក​បានច្រៀងតាមភោជនីយដ្ឋានពេលរាត្រី ដើម្បីចិញ្ចឹមជីវិត។ តែដោយសារវ័យ​របស់​លោក កាន់តែជ្រេ និង​ស្រប​ពេលដែលអ្នកចំរៀងវ័យក្មេងកាន់តែច្រើន បានធ្វើឲ្យផលិតកម្មមួយចំនួន​ផ្អាក ឬ​លែង​ត្រូវការ។

តាមបណ្តាញសង្គមរបស់លោក អ៊ឹម ជីវ៉ា បានបង្ហាញថា លោកជាមួយនឹងសិល្បករមួយចំនួនទៀត បាននាំ​យកថវិកាមួយចំនួនទៅជូនលោក នូ ស៊ិប។ សិល្បករជំនាន់ថ្មីរូបនេះ បានសម្ដែងភាពតក់ស្លុតឡើងថា៖ «ពិត​ជាគួអោយ​សង្វេកចិត្តពន់ពេកខ្លាំងណាស់ នៅពេលដែលបានឃើញទិដ្ឋភាពជាក់ស្តែង នៃការរស់នៅរបស់​តារា​​ចម្រៀង​ជើងចាស់ ដ៏ល្បីឈ្មោះម្នាក់»។

លោក ជីវ៉ា បានសរសេររៀបរាប់ថា៖ «ពួកខ្ញុំមិនមែនជាអ្នកមានទ្រព្យសម្បត្តិច្រើនហូរហៀរ និងជីវភាពធូរធា​ដូចគេទេ។ បើទោះបីជាថវិកាដែលយកទៅជូននោះ វាមិនច្រើនជាដុំកំភួន មិនស្មើនឹងអ្នកមានមួយចំនួន យក​ទៅចូលច្រៀងខារាអូខេមួយយប់ពិតមែន ប៉ុន្តែអ្វីដែលពួកខ្ញុំធ្វើ គឺផុសចេញពីទឹកចិត្តដ៏ជ្រះថ្លា នៃបេះដូង​ពិតៗ។»

ក្នុងនាមជាសិល្បករដូចគ្នា លោក អ៊ឹម ជីវ៉ា បានបន្តទៀតថា៖ «ខ្ញុំបាទក៏សូមសំណូមពរទៅដលក្រសួងមន្ទីរ ស្ថាប័ន​​ពាក់ព័ន្ធនានា មេត្តាជួយឧបត្ថម្ភដល់ពួកគាត់ផង។ ជាពិសេសខ្ញុំសុំបងៗពូៗ ឯកឧត្តម ឧកញ៉ាមួយចំនួន​ដែល​សំបូរលុយចាយ ចូលចិត្តចូលខារ៉ាអូខេ និងចូលចិត្តកន្លែងកម្សាន្តនានានោះ មេត្តាបរិច្ចាគថវិកាខ្លះៗ ដល់​គាត់​ផង កុំចាំដល់មនុស្សស្លាប់ ឬទាល់តែមានកាសែតទូរទស្សន៍មកថត ទើបបានមានមុខនោះ។»

សូមរំលឹកថា លោក នូ ស៊ិប បានធ្លាក់ខ្លួនឈឺ ដោយសារគ្រោះថ្នាក់ចរាចរណ៍មួយ នៅតាមបណ្ដោយផ្លូវ ម៉ៅសេងទុង ក្នុងរាជធានីភ្នំពេញ កាលពីពេលថ្មីៗនេះ។ លោកបានចាប់ផ្តើមក្នុងអាជីពជាអ្នកចម្រៀង តាំង​ពី​ឆ្នាំ១៩៨៧មក។ លោកជាអតីតទាហានស័ក្តមួយ នៅខេត្តកំពង់ធំ និងបានមករស់នៅរាជធានីភ្នំពេញ ក្នុងឆ្នាំ​១៩៩០ជាង៕