ផៃ ស៊ីផាន ការពារ សុខ សូកាន ឡើងជាតំណាងរាស្ត្រ ថាជាជម្រើសរបស់ពលរដ្ឋ
- ដោយ: ប្រាថ្នា អត្ថបទ៖ ប្រាថ្នា ([email protected]) - ភ្នំពេញ ថ្ងៃទី០៣ កុម្ភៈ ២០១៥
- កែប្រែចុងក្រោយ: February 03, 2015
- ប្រធានបទ: បក្សពួក
- អត្ថបទ: មានបញ្ហា?
- មតិ-យោបល់
-
ខណៈដែលមានការរិះគន់ ចំពោះការផ្តល់តំណែងទៅលោក សុខ សូកាន កូនប្រុសលោក សុខ អាន ឱ្យក្លាយជាតំណាងរាស្រ្ត មកពីគណបក្សប្រជាជនកម្ពុជា ប្រចាំមណ្ឌលតាកែវ ជំនួសលោក សូ ឃុន អតីតរដ្ឋមន្រ្តីក្រសួងប្រៃសណីយ៍ និងទូរគមនាគមន៍ ដែលបានទទួលមរណភាព កាលពីពេលថ្មីៗនេះ លោកផៃ ស៊ីផាន បានចេញមុខការពារ និងបកស្រាយទល់នឹងរាល់ការរិះគន់ទាំងអស់ ដែលបានធ្វើយ៉ាងចាស់ដៃ ទៅលើលោក សុខ សូកាន។
លោក ផៃ ស៊ីផាន បានសរសេរ នៅលើទំព័រហ្វេសប៊ុករបស់លោកថា៖ «ក្នុងនាមខ្ញុំ ជាមន្ត្រីជាន់ខ្ពស់របស់ CPP សូមឆ្លើយតបទាក់ទិននឹងភាពជាតំណាងរាស្រ្តពេញលេញ នៅក្នុងរដ្ឋសភា របស់ឯកឧត្តម សុខ សូកាន គឺឆ្លើយតប និងនីតិវិធីគោលការណ៍ច្បាប់រដ្ឋ និងនីតិវិធីគោលការណ៍ របស់គណបក្សប្រជាជន ជាមួយនឹងលទ្ធផល ដែលកើតចេញពីគោលការណ៍ និងយន្តការផ្ទៃក្នុងរបស់ CPP ទាំងថ្នាក់ជាតិ និងថ្នាក់មូលដ្ឋាន ដែលរួមជាមួយ នឹងលទ្ធផលនៃស្វ័យសម្រេច ឯករាជ្យរបស់បេក្ខភាព ដែលមានលេខរៀងខាងលើ ជាបេក្ខជនតំណាងរាស្ត្រនេះ»។
លោក សុខ សូកាន ជាបេក្ខជនពេញសិទ្ធិដែលមានលេខរៀងទី៨ ក្នុងបញ្ជីឈ្មោះបោះឆ្នោត របស់គណបក្ស ប្រជាជនកម្ពុជានៅមណ្ឌលខេត្តតាកែវ។ ចំពោះការដែលគណបក្សប្រជាជនកម្ពុជា ដាក់ឱ្យកូនប្រុសឧបនាយករដ្ឋមន្រ្តី សុខ អាន អ្នកមានឥទ្ធិពលម្នាក់ នៅក្នុងជួរគណបក្សប្រជាជនកម្ពុជា ឡើងតំណាងរាស្ត្រថ្មីនៃមណ្ឌលតាកែវ ជំនួសលោក សូ ឃុន ត្រូវបានសាធារណៈជន និងអង្គការសង្គមស៊ីវិលលើកឡើងថា មានភាពមិនប្រក្រតី និងមិនមានតម្លាភាព ព្រោះនៅមណ្ឌលខេត្តតាខេត្តគណបក្សនេះមានបេក្ខជន៤រូប ជាប់ជាតំណាង ដូច្នេះការឡើងតំណែងរបស់លោកសុខ សូកាន ត្រូវផ្លោះតំណែងជំនួសអ្នកដែលមានលេខរៀងទី៥។
លោក ផៃ ស៊ីផាន បានសរសេរថា តំណាងរាស្ត្រវ័យក្មេង និងជាកូនប្រុសទី៣របស់លោក សុខ អានរូបនេះ ជាជម្រើសរបស់ប្រជាពលរដ្ឋនៅក្នុងមណ្ឌលតាកែវ និងឯកភាពជាសមូហភាពរបស់ គណបក្សប្រជាជនកម្ពុជា។ លទ្ធផលនេះ គឺមិនស្ថិតនៅក្រោមឥទ្ធិពលបុគ្គលណាម្នាក់ ជាអត្តនោម័តរបស់បុគ្គលណាម្នាក់នោះឡើយ គឺស្ថិតនៅក្នុងភាពសន្យានុម័ត ដែលមិនត្រូវរំខាន ដោយបុគ្គល ឬក្រុមណាមួយបានឡើយ។
មន្រ្តីរដ្ឋាភិបាល និងជាអ្នកនាំពាក្យរូបនេះបន្ថែមថា៖ «រាល់ការជ្រៀតជ្រែក នៅក្នុងរូបភាពណាមួយនោះ គឺចាត់ទុកថា ជាការប្រមាថ និងវាយប្រហារលើដែនអធិបតេយ្យភាព និងគោលការណ៍របស់គណបក្សប្រជាជនកម្ពុជា។ ស្វ័យសម្រេចរបស់ CPP ជាកម្មសិទ្ធិផ្តាច់មុខរបស់សមាជិក និងគណបក្សប្រជាជនសុទ្ធសាធ។»
លោកសុខ សូកាន ត្រូវបានគណៈកម្មាធិការអចិន្ត្រៃយ៍រដ្ឋសភា កាលពីថ្ងៃទី២ កុម្ភៈ ប្រជុំអនុម័តតាមសំណើររបស់គណបក្សប្រជាជនកម្ពុជាសុំប្រកាស ទទួលស្គាល់លោក សុខ សូកាន ជាតំណាងរាស្ត្រថ្មីនៃមណ្ឌលតាកែវ ជំនួសលោក សូ ឃុន ដែលបានទទួលមរណភាព កាលពីខែមករា កន្លងទៅ។ លោក សុខ សូកាន ជាសមាជិកគណៈកម្មការសាធារណការដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្មរ៉ែ ថាមពល ពាណិជ្ជកម្ម រៀបចំដែនដីនគរូបនីយកម្ម និងសំណង់៕