AirAsia៖ បំណែកចំនួន៤របស់យន្ដហោះ ត្រូវបានរកឃើញនៅបាតសមុទ្រ
- ដោយ: សេក មនោរកុមារ អត្ថបទ៖ សេក មនោរកុមារ ([email protected]) - ប៉ារីស ថ្ងៃទី០៣ មករា ២០១៥
- កែប្រែចុងក្រោយ: January 04, 2015
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
បន្ទាប់ពីយុទ្ធនាការរុករក ប្រើពេលអស់៧ថ្ងៃមកហើយនោះ នៅពេលនេះក្រុមអ្នកស្វែងរកយន្ដហោះ បានរកឃើញបំណែករបស់យន្ដហោះ អ៊ែរប៊ូស (Airbus A320-200) ចំនួនបួនផ្នែកដ៏សំខាន់។ បំណែកចំនួនពីរ ត្រូវបានរកឃើញក្នុងថ្ងៃសៅរ៍នេះ ខណៈបំណែកចំនួនពីរទៀត ត្រូវបានស្រង់ឡើងតាំងពីយប់ថ្ងៃសុក្រ។ នេះជាការអះអាងរបស់លោក ប៊ំបង សេលីស្ទីអូ (Bambang Soelistyo) នាយកទីភ្នាក់ងារជាតិ ខាងការរុករក និងជួយសង្គ្រោះរបស់ប្រទេសឥណ្ឌូនេស៊ី។
លោក ប៊ំបង បានបដិសេធមិនបញ្ចាក់ឲ្យច្បាស់ថា តើបំណែកទាំងបួននេះ ជាផ្នែកអ្វីរបស់យន្ដហោះឲ្យប្រាកដនោះទេ។ ប៉ុន្តែបំណែកមួយ ត្រូវបានប្រភពស្និតនឹងការរុករកបង្ហើបប្រាប់ថា ទំនងជាកន្ទុយរបស់យន្ដហោះ។
យុទ្ធនាការរុករកនៅតែបន្តទៅមុខទៀត ដោយមានការចូលរួមពីច្រើនប្រទេស ដោយប្រើទាំងនាវា និងយន្ដហោះ។ កាលពីថ្ងៃសៅរ៍នេះ នាវាជប៉ុនពីរគ្រឿង អាមេរិកាំងមួយគ្រឿង និងសាំងហ្គាពួរមួយគ្រឿង បានចូលរួមក្នុងយុទ្ធនាការ ខណៈប្រទេសរ៉ូស្សីបានប្រញាប់ប្រញាល បញ្ជូនយន្ដហោះចំនួនពីរគ្រឿង និងអ្នកជំនាញរបស់ខ្លួន ចំនួន៧០នាក់ ក្នុងនោះមាន២២នាក់ ជាអ្នកជំនាញខាងជ្រមុជទឹក ឲ្យមកចូលរួមស្វែងរកនឹងគេដែរ។
យន្ដហោះដែលបានភ្ជាប់ជើងហោះហើរលេខ QZ8501 របស់ក្រុមហ៊ុនអាកាសចរណ៍ អ៊ែរអេសៀ បានបាត់ពីការត្រួតពិនិត្យដែនអាកាស នៅម៉ោង៧និង៥៥នាទី ម៉ោងក្នុងស្រុក ព្រឹកថ្ងៃទី២៨ ខែធ្នូ ជាមួយនឹងមនុស្ស១៦២នាក់ បន្ទាប់ពីយន្ដហោះបានងើបខ្លួនហោះចេញ ពីព្រលានយន្ដហោះអន្តរជាតិក្រុង ស៊ូរ៉ាបាយ៉ា (Surabaya) បានរយៈពេល៤២នាទី ហោះឆ្ពោះទៅកាន់ប្រទេសសាំងហ្គាពួរ។
បើតាមនាយកទីភ្នាក់ងារជាតិ ខាងការរុករក និងជួយសង្គ្រោះដដែល បានថ្លែងឲ្យដឹងទៀតថា រហូតមកដល់ពេលនេះ មិនទាន់មានសាកសពណាផ្សេង ត្រូវបានស្រង់បានទៀតទេ រាប់តាំងពីថ្ងៃសុក្រមក ដោយមកពីមូលហេតុរលកធំៗពេក នៅកណ្ដាលសមុទ្រ ដែលរំខានមិនឲ្យអ្នកជ្រមុជទឹកមិនអាចធ្វើការងាររបស់ខ្លួនបាន។
ដោយឡែកនាយកការិយាល័យអាកាសចរណ៍ស៊ីវិល លោក ចូកូ មៀចាតម៉ូចូ (Djoko Murjatmodjo) បានបង្ហើបថា ក្រុមហ៊ុនអ៊ែរអេសៀ បានរំលោភលើអាជ្ញាប័ណ្ណហោះហើរ និងពេលវេលាហោះហើរ អនុញ្ញាតិដោយអាជ្ញាធរឥណ្ឌូនេស៊ី។ លោកអះអាងទៀតថា បញ្ហានេះនឹងតម្រូវ ឲ្យមានការស៊ើបអង្កេតមួយឡើង ប្រឆាំងក្រុមហ៊ុនអាកាសចរណ៍ អ៊ែរអេសៀ។
ទស្សនាវដ្ដីនឹងជម្រាបជូន ពីការលើកឡើងរបស់លោក ចូកូ មៀចាតម៉ូចូ នៅក្នុងអត្ថបទលើកក្រោយ៕