«យន្ដហោះ AirAsia ទំនងជាលិចបាត់ ទៅបាតសមុទ្រហើយ!»
- ដោយ: សុបិន្ដ អត្ថបទ៖ សុបិន្ត ([email protected]) - ម៉ុងរ៉េអាល់ ថ្ងៃទី២៩ ធ្នូ ២០១៤
- កែប្រែចុងក្រោយ: December 29, 2014
- ប្រធានបទ: គ្រោះអាកាស
- អត្ថបទ: មានបញ្ហា?
- មតិ-យោបល់
-
យន្ដហោះអ៊ែរប៊ូស (AirBus) ដែលហោះចេញពីព្រលានយន្ដហោះអន្តរជាតិក្រុង ស៊ូរ៉ាប៉ាយ៉ា (Surabaya) ប្រទេសឥណ្ឌូនេស៊ី ឆ្ពោះមកកាន់ប្រទេសសាំងហ្គាពួរ ជាមួយនឹងអ្នកនៅលើយន្ដហោះចំនួន១៦២នាក់ ទំនងជាបានលិចចុះទៅបាតសមុទ្រ ហ្សាវ៉ា បាត់ទៅហើយ។ នេះបើតាមការថ្លែងឲ្យដឹង របស់លោក ប៊ំបង សេលីស្ទីអូ (Bambang Soelistyo) នាយកទីភ្នាក់ងារជាតិខាងរុករក និងជួយសង្គ្រោះ របស់ប្រទេសឥណ្ឌូនេស៊ី។
លោក ប៊ំបង សេលីស្ទីអូ បានថ្លែងនៅក្នុងសន្និសីទសារព័ត៌មានថា៖ «បើតាមព័ត៌មានដែលយើងមាននៅពេលនេះ និងការវាយតម្លៃ ទៅតាមកន្លែងដែលយន្ដហោះបានបាត់ខ្លួន ឬធ្លាក់នោះ សេចក្ដីសន្និដ្ឋាននៅពេលនេះ អាចឲ្យយើងនិយាយថា យន្ដហោះទំនងជាលិចចុះទៅបាតសមុទ្របាត់ទៅហើយ។ ជាការគិតក្នុងជំហានដំបូង ដែលអាចនឹងមានការផ្លាស់ប្ដូរ ជាមួយនឹងលទ្ធផលនៃការរុករក។»
មន្ត្រីរូបនោះ បានបញ្ជាក់ទៀតថា ប្រទេសឥណ្ឌូនេស៊ីរបស់លោក មិនមានសម្ភារៈគ្រប់គ្រាន់ ក្នុងយុទ្ធនាការរុករកបែបនេះទេ ជាពិសេសចាំបាច់ត្រូវមាននាវាមុជទឹក ដើម្បីទាញតួយន្ដហោះចេញពីបាតសមុទ្រ ហើយថាប្រទេសលោក នឹងអំពាវនាវទៅប្រទេសដទៃទៀត ក្នុងករណីចាំបាច់។ លោកបានពន្យល់ថា៖ «ដោយកង្វះខាតខាងបច្ចេកទេស ខ្ញុំបានធ្វើការជាមួយក្រសួងការបរទេស ដើម្បីអាចខ្ចីមធ្យោបាយ ពីប្រទេសផ្សេងទៀត ដើម្បីជាជំនួយ។ ប្រទេសនោះ មានអង់គ្លេស បារាំង និងសហរដ្ឋអាមេរិក។»
យុទ្ធនាការរុករកយន្ដហោះ នៅក្នុងលំហរសមុទ្រ បានចាប់ផ្ដើមឡើងវិញ តាំងពីព្រលឹមថ្ងៃចន្ទនេះ បន្ទាប់ពីត្រូវបានផ្អាកក្នុងយប់ថ្ងៃអាទិត្យ ដោយមកពីស្ថានភាពឧត្តុនិយម មិនអំណោយផល នៅពេលស្បៃរាត្រីបានធ្លាក់មកដល់។ ប្រទេសជិតខាងទាំងពីរ មានម៉ាឡេស៊ី និងសាំងហ្គាពួរ បានប្រញាប់ប្រញាល់បញ្ចេញនាវា និងយន្ដហោះរបស់ផងខ្លួន ដើម្បីជួយប្រទេសឥណ្ឌូនេស៊ីក្នុងការរុករកតួយន្ដហោះ ដែលទំនងជាស្ថិតនៅកណ្ដាលសមុទ្រហ្សាវ៉ា។ សហរដ្ឋអាមេរិក ក៏បានឆ្លើយតបថា ខ្លួនបានត្រៀមខ្លួនរួចជាស្រេចដែរ ក្នុងករណីដែលប្រទេសឥណ្ឌូនេស៊ី ស្នើរសុំឲ្យជួយ។
យន្ដហោះធុនអ៊ែរប៊ូស ៣២០-២០០ (Airbus 320-200) ដែលបានភ្ជាប់ជើងហោះហើរលេខ QZ8501 បានបាត់ពីការត្រួតពិនិត្យដែនអាកាស នៅម៉ោង៧និង៥៥នាទី ម៉ោងក្នុងស្រុក ព្រឹកថ្ងៃទី២៨ ខែធ្នូ បន្ទាប់ពីវាបានងើបខ្លួនហោះចេញពីដី បានរយៈពេល៤២នាទី៕