តារាកំប្លែងវ័យក្មេង វ៉ាន់ នីឡា សិក្សាឲ្យបានខ្ពស់ដើម្បីប្ដូរអាជីព
- ដោយ: ក. សោភណ្ឌ ([email protected]) - ភ្នំពេញ ថ្ងៃទី០៨ ធ្នូ ២០១៤
- កែប្រែចុងក្រោយ: December 08, 2014
- ប្រធានបទ: តារា
- អត្ថបទ: មានបញ្ហា?
- មតិ-យោបល់
-
បើទោះជារវល់យ៉ាងណាក៏ដោយ ក៏តារាកំប្លែងស្រីវ័យក្មេងអាយុ ១៤ឆ្នាំ វ៉ាន់ នីឡា ដែលកំពុងសិក្សានៅថ្នាក់ ទី៨ ក្នុងសាលា ប៊ែលធីអន្តរជាតិ មិនខ្ជីខ្ជាក្នុងការសិក្សារបស់នាងឡើយ។ តារាកំប្លែងវ័យក្មេងរូបនេះ ថែមទាំងបានបែងចែកយ៉ាងច្បាស់ នូវពេលវេលាសិក្សារបស់នាង ជាមួយនឹងការងារសម្ដែងផងទៀត។ នេះជាការថ្លែងឲ្យដឹង នៅក្នុងកិច្ចសម្ភាសផ្ទាល់មួយរបស់នាង ជាមួយទូរទស្សន៍ ស៊ីអិនស៊ី (CNC) កាលពីថ្ងៃទី០៥ ខែធ្នូនេះ។
តារាវ័យក្មេងនៅទូរទស្សន៍ CTN រូបនេះបានពន្យល់ ពីការបែងចែកពេលវេលាសិក្សារបស់នាងថា នាងមិនដែលអវត្តមានលើសពីបីថ្ងៃនោះទេ នៅក្នុងថ្នាក់រៀន បើទោះជាមានភាពមមាញឹក ក្នុងការថតរឿងកំប្លែងក៏ដោយ។ ហើយនាងតែងតែយកចិត្តទុកដាក់រៀនជានិច្ច មិនដែលប្រហែសសូម្បីបន្តិច។ នាងមានមហិច្ឆតារបស់ខ្លួនមួយថា នៅពេលអនាគត នាងចង់ប្តូរអាជីពពីតារាកំប្លែង ទៅជាពិធីការិនី និងតារាបង្ហាញម៉ូដ ជាមួយនឹងសុទិដ្ឋិនិយមថា នាងអាចធ្វើបាន ១០០ ភាគរយ។
ការសិក្សាខ្ជាប់ខ្ពួនមែន តែមិនមានន័យថា នីឡា មិនពេញចិត្តនឹងការសម្ដែងជាតារាកំប្លែងនោះឡើយ។ តារាក្មេងវ័យ បានឲ្យដឹងទៀតថា រូបនាងពិតជាមានភាពរីករាយណាស់ នៅក្នុងអាជីពជាតារាកំប្លែងនេះ។ មិនត្រឹមតែការសម្ដែងតែមួយមុខ តែតារារាងតូចច្រឡឹង បានបញ្ជាក់ទាំងភាពប្រាកដប្រជាថា៖ «សព្វថ្ងៃនេះ ខ្ញុំក៏ជាពិធីការិនីជាមួយបង ចឺម នៅក្នុងកម្មវិធីកុមារនៅពេលព្រឹកៗផងដែរ ហើយខ្ញុំនឹងកាន់កម្មវិធីធំៗនៅពេលខ្ញុំមានអាយុ ១៧ ឬ ១៨ឆ្នាំ»។
បន្ថែមពីទេពកោសល្យ ដែលនាងមានពីក្មេងមកស្រាប់ផង តារាកំប្លែងដែលធ្លាប់មានឈ្មោះ ជាតារាទឹកភ្នែកតាំងពីថ្ងៃដំបូងក្នុងវ័យ៩ឆ្នាំដែររូបនេះ បានរំលឹកពីការបណ្តុះបណ្តាលរបស់ឪពុកនាង លោក សុវណ្ណ ឫទ្ធី ហៅតា វ៉ិចទ័រ ដែលជាប្រធានផលិតកម្មវិធីកម្សាន្ត របស់ទូរទស្សន៍ ស៊ីធីអិន (CTN) សព្វថ្ងៃ ដូចជា កម្មវិធីរាត្រីកម្សាន្ត សំណើចតាមភូមិ និងផ្ទះលោកតាជាដើម។ តារាកំប្លែង បាននិយាយបែបចង់ក្លាយជាកំសត់វិញថា៖ «កូនមិនធ្វើឲ្យលោកប៉ាខកបំណងនោះទេ។ កូនអរគុណខ្លាំងណាស់ដែល លោកប៉ាអនុញ្ញាតឲ្យកូនមានថ្ងៃនេះ។»៕