មាជ សុវណ្ណារ៉ា៖ កុំ​យក​ខ្ញុំ ជា​ចំណាប់​ខ្មាំង​នយោបាយ

ក្នុងលិខិតមួយសរសេរដោយផ្ទាល់ដៃ របស់លោក មាជ សុវណ្ណរ៉ា ចេញពីពន្ធនាគារព្រៃសរ បានព្រមានកុំឲ្យយករូប​លោក ជាចំណាប់ខ្មាំងនយោបាយ ក្នុងការចរចាបញ្ហា គ.ជ.ប។ ទស្សនាវដ្ដីមនោរម្យ.អាំងហ្វូ សូមបញ្ជាក់ជូនពីសំបុត្រនោះ ដូច​ខាង​ក្រោម។
មាជ សុវណ្ណារ៉ា៖ កុំ​យក​ខ្ញុំ ជា​ចំណាប់​ខ្មាំង​នយោបាយ
លោក មាជ សុវណ្ណរ៉ា និងកូនស្រីរបស់លោក។ (រូបថត ហ្វេសប៊ុក)
Loading...
  • ដោយ: កេសរ កូល ដោយ កេសរកូល (ទាក់ទង៖ info@monoroom.info) - ភ្នំពេញ ថ្ងៃទី១៧ វិច្ឆិកា ២០១៤
  • កែប្រែចុងក្រោយ: November 17, 2014
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

នៅក្នុងលិខិតមួយ សរសេរ​ដោយ​ដៃ​របស់​លោក មាជ សុវណ្ណារ៉ា ចេញ​ពី​ពន្ធនាគារ​ព្រៃ​សរ ដែល​ទស្សនាវដ្ដី​មនោរម្យ.អាំងហ្វូ ​ទើប​នឹង​ទទួល​បាន​ក្នុង​យប់​ថ្ងៃ​ទី១៧ ខែ​វិច្ឆិកា​នេះ បាន​បញ្ជាក់​ថា សុំ​កុំ​ឲ្យ​យក​រូប​លោក ទៅ​ធ្វើ​ជា​ចំណាប់​ខ្មាំង​នយោបាយ នៃ​ការ​ចរចា ជុំ​វិញ​បញ្ហា​គណៈ​កម្មាធិការ​ជាតិ​រៀបចំ​ការ​បោះ​ឆ្នោត ដែល​ហៅ​កាត់​ថា គ.ជ.ប។ លោក​បាន​សរសេរ​ថា៖ «ខ្ញុំ​សុខ​ចិត្ត​ជាប់​គុក រស់​នៅ​ក្នុង​គុក​អស់​មួយ​ជីវិត ឲ្យ​តែ​គ.ជ.ប ឯករាជ្យ»។

លោក មាជ សុវណ្ណរ៉ា ប្រធាន​​នាយក​ដ្ឋាន​​ព័ត៌មាន​​គណបក្ស​​សង្គ្រោះ​​ជាតិ ត្រូវ​បាន​​ចាប់​​ខ្លួន ដោយ​អាជ្ញាធរ​បញ្ជា​ដោយ​រដ្ឋាភិបាល នៅ​ត្រង់​ចំណុច​ផ្លូវ​ភ្លោះ ទល់​មុខ​មន្ទីរ​ពេទ្យ ព្រះ​អង្គ​ឌួង ខណៈ​លោក​កំពុង​ធ្វើ​ដំណើរ​តាម​រថយន្ត នា​វេលា​ម៉ោង​១០ និង​៤០នាទី​ព្រឹក ថ្ងៃ​ទី១១ ខែ​វិច្ឆិកា។ ក្នុង​ថ្ងៃ​ដដែល​នោះ លោក​ត្រូវ​បាន​តុលាការ​សាលា​ដំបូង​រាជធានី​ភ្នំពេញ សម្រេច​​ឃុំ​​ខ្លួន​​នៅ​មន្ទីរ​​អប់រំ​​កែ​ប្រែ​​ម១ ព្រៃ​​សរ​ ក្រោម​​បទ​​ចោទ​«ញុះញង់ ឲ្យ​ប្រព្រឹត្តិ​​អំពើ​​កុប្បកម្ម ការ​​ប្រើ​អំពើ​ហិង្សា និង​ការ​ប្រឆាំង​មន្ត្រី​រាជការ​សាធារណៈ» នៅ​ក្នុង​ព្រឹត្តិការណ៍​វាយ​តប់​គ្នា ដោយ​ហិង្សា កាល​​ពី​ថ្ងៃ​ទី១៥ ខែ​កក្កដា ឆ្នាំ​២០១៤កន្លងទៅ។

នៅក្នុងលិខិតសរសេរដោយដៃ លោក មាជ សុវណ្ណារ៉ា បានបញ្ជាក់ទៀតថា រូបលោកមិនសំខាន់ទេ។ ផ្ទុយ​ទៅ​វិញ លោកត្រូវការឲ្យពលរដ្ឋបានសុខ នយោបាយមានដំណើរការ មិនជាប់គាំង និងប្រព័ន្ធបោះឆ្នោតឯករាជ្យ សេរី ត្រឹមត្រូវ យុត្តិធម៌។

ករណីចាប់ខ្លួនរបស់លោក ត្រូវបានមតិសាធារណៈមួយចំនួន បូករួមទាំងគណបក្សសង្គ្រោះជាតិ និងក្រុម​អង្គការសង្គមស៊ីវិល ដែលធ្វើការឃ្លាំមើលវិស័យសិទ្ធិមនុស្ស នៅកម្ពុជាផង និយាយថា ជាការប្រើប្រាស់ប្រព័ន្ធ​យុត្តិធម៌ជាខែល ដើម្បីអនុវត្តនូវនយោបាយ«ចាប់ចងមុន ដើម្បីស្រាយនៅក្រោយការចរចា» របស់​រដ្ឋាភិបាល​គណបក្សប្រជាជនកម្ពុជា ក្នុងបញ្ហាដ៏ចម្រូងចម្រាស នៃការបង្កើតគណៈកម្មាធិការជាតិ រៀបចំការបោះឆ្នោត «ឯករាជ្យថ្មី»មួយ។

តែនៅក្នុងសេចក្ដីថ្លែងការណ៍មួយ ចុះថ្ងៃ​ទី​១២ ខែ​វិច្ឆិកា គណបក្សប្រជាជនកម្ពុជាបានបញ្ជាក់ថា ការចាប់​ចង​មនុស្សច្រើននាក់ ក្នុងប៉ុន្មានថ្ងៃចុងក្រោយនេះ ជាការអនុវត្តច្បាប់ របស់អាជ្ញាធរមានសមត្ថកិច្ច ក្នុងសំណុំរឿង​ដែលពាក់ព័ន្ធ នឹងអំពើ​ប្រព្រឹត្តបទល្មើសធ្ងន់ធ្ងរ របស់បុគ្គលទាំងនោះ។

លោកមេធាវី ចាន់ ចេន ការពាក្ដីឲ្យលោក មាជ សុវណ្ណារ៉ា បានថ្លែងប្រាប់ទស្សនាវដ្ដីមនោរម្យ.អាំងហ្វូ ក្នុងថ្ងៃ​ទី១៧ ខែវិច្ឆិកានេះថា ការចាប់ឃុំខ្លួនកូនក្ដីលោក ជាបណ្ដោះអាសន្ននោះ គឺជាការរំលោភបំពានទៅលើសិទ្ធិ​បុគ្គល។ គ្មានការសង្ស័យពីតុលាការទេ តែតុលាការបានសម្រេចឃុំខ្លួន ដើម្បី«ការស៊ើបអង្កេត» ខណៈលោក មាជ សុវណ្ណរ៉ា មានអាស័យដ្ឋាន ទីលំនៅ និងការងាច្បាស់លាស់ អាចផ្ដល់កិច្ចសហការដល់ការស៊ើបអង្កេត របស់តុលាការបានគ្រប់ពេល។ លោកមេធាវី ចាន់ ចេន បានបញ្ជាក់ទៀថា៖ «ការពិតចំណុចនេះ វាមិនមែន​ជា​ការសង្ស័យទេ។ បើសង្ស័យ សង្ស័យថាកូនក្តីគាត់ប្រព្រឹត្តិ ឬមិនប្រព្តឹត្តិ។ តែផ្ទុយទៅវិញ មានភស្តុតាងជា​ច្រើន ដែលកូនក្តីរបស់ខ្ញុំលោក មាជ សុវណ្ណារ៉ា គាត់ឥតមានបានប្រព្រឹត្តិ ដូច​ការចោទប្រកាន់។»

មិនអាចទាក់មន្ត្រីតុលាការសាលាដំបូងរាជធានីភ្នំពេញ ដើម្បីធ្វើការបកស្រាយ ជុំវិញការលើកឡើងខាង​លើ​នេះ​បានទេ នៅពេលនេះ៕

លិខិតចារដោយដៃ របស់លោក មាជ សុវណ្ណរ៉ា៖

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ contact@monoroom.info
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...