ដើម្បីបង្ហាញពីប្រជាប្រិយភាព ជាមួយអ្នកគាំទ្រ និងស្រឡាញ់ខ្លួន តើអ្នកនយោបាយខ្មែរ​ប្រើប្រាស់​វិធី​សាស្ត្រ​អ្វីខ្លះ? ថតរូបរបស់ខ្លួន នៅជាមួយអ្នកគាំទ្រ ឬអ្នកដែលមកសុំថតជាមួយ ដើម្បីយកមកចុះផ្សាយ ក្នុងទំព័រ​ហ្វេសប៊ុកដ៏ពេញនិយម។ ករណីនេះ គេមិនចាំបាច់និយាយដល់លោក ហ៊ុន សែន ដែលមានប្រព័ន្ធ​ផ្សព្វ​ផ្សាយ​​របស់ខ្លួនយ៉ាងសន្ធឹកសន្ធាប់នោះទេ ព្រោះចង់មិនចង់ រូបភាពរបស់លោកនាយករដ្ឋមន្ត្រី ត្រូវបានក្រុម​អ្នកគាំទ្រ ឬបរិវា ចុះ​ផ្សាយ​ទាំងក្នុងការសែត ទាំងក្នុងទូរទស្សន៍ ឬតាមបណ្ដាញសង្គម​ ហូរដូចទឹកធ្លាក់ ដោយ​​មិន​ចាំ​បាច់​ខំប្រឹងឡើយ។

ដោយឡែក ដើម្បីបង្ហាញពីប្រជាប្រិយភាពរបស់ខ្លួន លោក សម រង្ស៊ី ប្រធានគណបក្សសង្គ្រោះជាតិ បាន​ថតរូបជាមួយបណ្ដាជន គ្រប់ទីកន្លែងដែលលោកបានទៅដល់ ហើយយករូបនោះ មកចុះផ្សាយ​ដើម្បី​បង្អួត​គេឯង​ ក្នុងទំព័រ​ហ្វេសប៊ុករបស់លោក។ ហេតុអ្វីបានជាប្រើពាក្យ«ដើម្បីបង្អួត»? ព្រោះបើរូបថតទាំងនោះ ត្រូវ​បានអ្នក​ផ្សេងជាអ្នកចុះផ្សាយ ប្រហែលជាទំនងជាង តែនេះខ្លួនឯងជាអ្នកថត ហើយខ្លួនឯងជាអ្នក​ចុះ​ផ្សាយ ... បើម្ដង​ឬពីរដង ក៏អ្នកសារព័ត៌មានមិនសូវជាចាប់អារម្មណ៍ប៉ុន្មានដែរ តែនេះរាប់សិបដង! រាប់ភ្លេច!

ប៉ុន្តែដើម្បីកុំឲ្យអន់ជាងគេ លោក ខឹម វាសនា ឯណេះ ដែលជាប្រធាន (ឬជាប្រមុខ) គណបក្សសម្ព័ន្ធដើម្បី​ប្រជាធិបតេយ្យ​នោះ ក៏បានធ្វើឲ្យគេឃើញ ថាលោកបានចុះផ្សាយនូវរូបថត ដែលលោកបានថត​ជាមួយ​អ្នក​គាំទ្រ ឬសកម្មជនគណបក្ស យកមកដាក់ក្នុងទំព័រហ្វេសប៊ុកដែរ។​ តែអ្វីដែលវាចម្លែកនោះ រាល់រូបថតដែល​លោកប្រធាន (ឬប្រមុខ) បានថតជាមួយអ្នកគាំទ្រជាបុរសភេទ គេ«កម្រ»ឃើញលោក ខឹម វាសនា ប្រើដៃ​«អោប»ឬក្រៀក«ស្មារ»​យកមកផ្អឹបនឹងដើមទ្រូងខ្លួនណាស់ ដែលផ្ទុយពីអ្នកគាំទ្រជាស្ត្រីភេទ ក្មេងៗ ដែល​មើលទៅ លោក ខឹម វាសនា ដូចជាបានបង្ហាញពីភាពស្និតស្នាលខ្លាំងសម្បើមជាង។

យើងទុកឲ្យមិត្តអ្នកអាន​ធ្វើការវិន្និច្ឆ័យដោយផ្ទាល់ខ្លួន ជាមួយនឹងរូបថតខាងក្រោម ដែលសុទ្ធតែជារូប ដែល​យើងដកស្រង់ ពីគណនីហ្វេសប៊ុករបស់លោក ខឹម វាសនា។