ស្របពេលដែលសមាហរណកម្ម អាស៊ាន កាន់តែខិតជិតចូលមកដល់ នាពេលខាងមុខនេះ យុវជននិងប្រជា​ពលរដ្ឋ​ភាគច្រើន សុទ្ធតែសម្តែងការព្រួយបារម្ភ ខ្លាចត្រូវបានគេដណ្តើមការងារល្អៗ។ ការព្រួយបារម្ភនេះ ខណៈពេលដែលមានមតិភាគច្រើន បានលើកឡើងថា ដោយសារតែប្រព័ន្ធអប់រំនៅកម្ពុជានៅមានកំរិត ការយល់ដឹងរបស់យុវជនខ្សោយ ជាពិសេសនោះគឺភាសា ដែលជាកត្តាធ្វើឱ្យសិស្សនិស្សិតកម្ពុជា ពិបាក​នឹង​ប្រកួតប្រជែងឱកាសការងារល្អ ពីនិស្សិតរបស់ប្រទេស ដែលជាសមាជិកអាស៊ានផ្សេងទៀត។

ឆ្លើយតប និងបញ្ហានៃការលើកឡើងខាងលើនេះ លោកឃីម សុខហេង នាយកនៃវិទ្យាស្ថានសិក្សា​ដើម្បី​ជោគ​ជ័យ បានបញ្ជាក់អះអាងថា និស្សិតកម្ពុជា មានសក្តានុពលខ្ពស់ ដែលអាចប្រកួតប្រជែងបាន ជាមួយ​និស្សិត នៃប្រទេសដែលជាសមាជិកអាស៊ាន។ លោកបន្តថា៖ «ជាឧទាហរណ៍ដែលយើងមើលឃើញ ការ​ប្រជុំ​សន្និសិទយុវជនថ្នាក់ដឹកនាំវ័យក្មេងរបស់អាស៊ាន ឃើញថា កម្ពុជាយើងមានសកម្មភាពជាច្រើន ដែល​យើងឈានមុខគេ។ ជាបទពិសោធន៍ ក្នុងពេលដែលខ្ញុំចូលរួមប្រជុំ ក្នុងកម្មវិធីអាស៊ានបូកជប៉ុនជាដើម គឺថា យើងមានមុខមានមាត់ ដោយសារទទួលការវាយតម្លៃ ពីគណៈកម្មការរៀបចំកម្មវិធីពីប្រទេសជប៉ុនដែរ។»

លោកពន្យល់បន្ថែមថា សម្រាប់ប្រព័ន្ធអប់រំ លោកមើលឃើញថា នៅក្នុងប្រទេសអាស៊ានទាំង១០ ដកតែ​ប្រទេសសាំងហ្គាពួរចេញ ដែលជាប្រទេសមួយ ទទួលស្គាល់គុណភាពអប់រំ ពីប្រទេសអភិវឌ្ឍជាច្រើននោះ គុណភាពនៃការអប់រំនៅប្រទេសដ៏ទៃទៀត សុទ្ធតែមានលក្ខណៈប្រដុំប្រសងគ្នា។

លោកបន្តថា៖ «នៅពេលដែលយើងប្រជុំ និយាយពីគុណភាពអប់រំ មានប្រទេសអាស៊ានមួយចំនួនហ្នឹង ឃើញ​ថាការអប់រំរបស់គាត់ ដែលបានលើកឡើងហ្នឹង គឺពិបាកជាងយើងផង។ ចំណែកឯភាសាវិញ ភាសា​គឺ​ថា និស្សិតខ្មែរយើង ប្រជាជនខ្មែរគឺគាត់ពូកែខាងភាសា សម្រាប់ប្រទេសអាស៊ានពីរទៀត ភាសា​បច្ចេក​ទេស​នៅទាបជាងយើងដែរទេ។»

ជាការអំពាវនាវរបស់លោក លោកសូមឱ្យសិស្សនិស្សិតកម្ពុជា ប្រឹងប្រែងទាំងអស់គ្នា រួមទាំងអ្នកពាក់ព័ន្ថដូច​ជាក្រុមគ្រួសារ សាលារៀន ក៏ដូចជានិស្សិតខ្លួនត្រូវតែខំប្រឹងប្រែងតទៅទៀត៕