យន្ដហោះដែលភ្ជាប់ជើងហោះហើរ អៀរ៉ង់ ១៤០ (IrAn-140) នៃក្រុមហ៊ុនអាកាសចរណ៍ សេប៉ាហាន អ៊ែរឡាញ (Sepahan Airlines) របស់ប្រទេសអៀរ៉ង់ ជាមួយនឹងអ្នកដំណើរ៤៨នាក់ បានធ្លាក់បោកខ្លួន នៅបន្ទាប់ពី​បានបង្ហើប​ខ្លួន ហោះងើបពីដីបានបន្តិច ពីព្រលានយន្ដហោះ មេរ៉ាបាដ (Mehrabad) នៃរដ្ឋធានីតេអៀរ៉ង់ នៅព្រឹកថ្ងៃទី១០ ខែ​សីហានេះ។ ទូរទស្សន៍ផ្លូវការរបស់រដ្ឋ បានបង្ហាញតុល្យភាពចុងក្រោយ ថាមានមនុស្ស៣៩នាក់ស្លាប់ និង៩នាក់​ផ្សេងទៀត នៅរស់រានមានជីវិត តែបានរងរបួសយ៉ាងធ្ងន់ធ្ងរ។

បំណែកខ្លួនមួយ របស់យន្ដហោះ បានធ្លាក់នៅលើផ្លូវថ្នល់។ (រូបថត AFP)

ធ្លាក់យន្ដហោះ - យន្ដហោះ ដែលភ្ជាប់ជើងហោះហើរ អៀរ៉ង់ ១៤០ (IrAn-140) បានធ្លាក់បោកខ្លួន នៅកណ្ដាល​សង្កាត់ ដែលសម្បូរទៅដោយប្រជាជនរស់នៅ ស្ថិតនៅមិនឆ្ងាយប៉ុន្មានពីព្រលានយន្ដហោះ ដែលយន្ដហោះទើប​នឹង​ងើបខ្លួនហោះចេញមកនោះ។ ទូរទស្សន៍រដ្ឋរបស់ប្រទេសអៀរ៉ង់ បានអះអាងថា កន្ទុយរបស់យន្ដហោះ ទំនងជា​បាន​ប៉ះជាមួយនឹងខ្សែភ្លើងរបស់អាគារមួយ ហើយបានធ្លាក់បោកខ្លួនភ្លាមៗ ទៅលើដីវិញ មុននឹងផ្ទុះឆេះជាអណ្ដាត​ភ្លើង​ឡើង។

តែមូលហេតុនៃការធ្លាក់យន្ដហោះនេះ ត្រូវបានភ្នាក់ងារសារព័ត៌មានក្នុងស្រុក អៀណា (IRNA) អះអាងផ្សេង​ទៅ​វិញ។ អៀណា បានរាយការណ៍ថា យន្ដហោះបានរងគ្រោះ នឹងបញ្ហាម៉ាស៊ីនប្រតិកម្ម ដែលធ្វើឲ្យយន្ដហោះបាន​បាត់​លំនឹង នៅពេលហោះឡើង។ ក្រុមឆ្មាំបដិវត្តរបស់ប្រទេសអៀរ៉ង់ ដែលគ្រប់គ្រង់សុវត្ថិភាព នៅក្នុងតំបន់ដែល​មាន​គ្រោះថ្នាក់យន្ដហោះ បាននិយាយថ្លែងថា យន្ដហោះបានដាច់ខ្លួនជាបំណែកៗ។ បំណែកខ្លួនមួយ របស់យន្ដហោះ បានធ្លាក់នៅលើផ្លូវថ្នល់ កណ្ដាលសង្កាត់ដែលសម្បូរទៅដោយប្រជាជនរស់នៅ។

ទូរទស្សន៍រដ្ឋរបស់ប្រទេសអៀរ៉ង់ បានរាយការណ៍ទៀតថា សាកសពជាច្រើនត្រូវបានឆេះខ្លោច ហើយពិបាកនឹង​កំណត់​អត្តសញ្ញាណ ប្រសិនបើគ្មានជំនួយ ពីការត្រួតពិនិត្យអាដេអ៊ិន (ADN)  ទេនោះ។

យន្ដហោះនេះ ជាប្រភេទយន្ដហោះ ដែលប្រើបច្ចេកវិទ្យារបស់ប្រទេសអ៊ុយក្រែន តែផលិតនៅក្នុងប្រទេស​អៀរ៉ង់​ខ្លួន​ឯង មានលក្ខណៈជាយន្ដហោះ អង់តូណូវ (Antonov An-140 ) ជាមួយនឹងសមត្ថភាពដឹកអ្នកដំណើរបាន ៥២នាក់។

ព្រលានយន្ដហោះ មេរ៉ាបាដ ជាព្រលានយន្ដហោះដែលសម្បូរអ្នកដំណើរឆ្លងកាត់ច្រើនជាងគេ ក្នុងចំណោម​ព្រលាន​យន្ដហោះពីរទៀត នៅក្បែររដ្ឋធានីនៃប្រទេសអៀរ៉ង់។ ប៉ុន្តែព្រលានយន្ដហោះនេះ បានកំណត់ជើងហោះហើរនានា តែនៅក្នុងស្រុកប៉ុណ្ណោះ ខណៈជើងហោះហើរអន្តរជាតិ ត្រូវបានប្រគល់ទៅឲ្យឲ្យព្រលានយន្ដហោះ អ៊ីម៉ាម ខូម៉ៃនី (Imam Khomeini) នៅចំងាយ៣០គីឡូមែត្រ ភាគខាងត្បូងនៃរដ្ឋធានី តេអៀរ៉ង់។

សូមរំលឹកដែរថា គ្រោះថ្នាក់យន្ដហោះមានចំនួនច្រើនគួរឲ្យកត់សម្គាល់ នៅប្រទេសអៀរ៉ង់ បង្កឲ្យមានជនរងគ្រោះ​ច្រើនជាង៩០០នាក់ តែក្នុងរយៈពេល១០ឆ្នាំចុងក្រោយនេះ។ មូលហេតុសំខាន់ ដោយសារតែតួយន្ដហោះជាច្រើន នៅប្រទេសនេះ មានលក្ខណៈចាស់ជរា និងមិនមានការត្រួតពិនិត្យច្បាស់លាស់ ទៅលើតួយន្ដហោះទាំង​នោះ​ឡើយ។ តួយន្ដហោះខ្លះ ដាក់ឲ្យប្រើប្រាស់តាំងពីឆ្នាំ១៩៨០ ដែលបើគិតមកទល់ពេលនេះ មានអាយុជាង៣០ឆ្នាំ​ទៅ​ហើយ៕