បំណែកយន្ដហោះ រកឃើញនៅឆ្នេរនៃកោះ រ៉េអ៊ុយញ៉ុង (ទឹកដីបារាំង ក្នុងមហាសមុទ្រឥណ្ឌា ខាងលិច) នឹង​ត្រូវ​ដឹកមកដល់ក្រុង ទូលូស៍ នៅថ្ងៃសៅរ៍ខាងមុខ ដើម្បីអនុញ្ញាត ឲ្យនាយកដ្ឋានភស្តុភារបារាំង «DGA» អាច​ធ្វើ​ការ​ពិនិត្យ និងស្រាវជ្រាវ។ ប៉ុន្តែប្រភពជាច្រើន ដែលស្និតនឹងការស៊ើបអង្កេត បានបង្ហើបឲ្យដឹងថា បំណែក​ស្លាប​យន្ដហោះនោះ ពិតជារបស់យន្ដហោះ ប៊ូអ៊ីង (Boeing 777) ដែលទំនងជាយន្ដហោះ ដែលប្រើប្រាស់ ដោយ​ក្រុមហ៊ុន ម៉ាឡេស៊ីអ៊ែរឡាញ យកមកធ្វើការហោះហើរ ភ្ជាប់ជើងហោះហើរ MH370 ហើយបានបាត់ខ្លួន កាល​ពីថ្ងៃទី៨ ខែមីនា ឆ្នាំ២០១៤កន្លងទៅ ជាមួយនឹងអ្នកដំណើរ ២៣៩នាក់។

» សូមអានអត្ថបទដែលទាក់ទងឡើងវិញ ដោយចុចនៅលើទីនេះ។

ការសង្ស័យ របស់ក្រុមអ្នកស៊ើបអង្កេត កាន់តែគិតថា បំណែកនេះ ជារបស់យន្ដហោះ​ MH370 ដែលហោះចេញ ពីរដ្ឋធានី កូឡាឡំពួរ ប្រទេសម៉ាឡេស៊ី ដើម្បីហោះឆ្ពោះ ទៅកាន់រដ្ឋធានី ប៉េកាំង ប្រទេសចិន។ អ្នកជំនាញ​ជា​ច្រើន បានអះអាងថា បំណែកនេះ ជាផ្លិតនៅជាប់ស្លាបយន្ដហោះ ដែលអាចបង្ហើបចុះឡើង ដើម្បីអាចឲ្យ​យន្ដហោះ ចុះចត ឬហោះឡើង។

នាយកដ្ឋានភស្ដុភារបារាំង ដែលហៅកាត់ថា «DGA» នឹងធ្វើការសិក្សាលំអិត ទៅលើបំណែកស្លាបយន្ដហោះ នេះ នៅក្នុងសប្ដាហ៍ក្រោយ។ មន្ទីរពិសោធន៍ របស់នាយកដ្ឋា ដែលសិក្សាទៅលើបំណែក ប្រវែងជាង២ម៉ែត្រ​នេះ មិនស្ថិតនៅក្រោម ក្រសួងការពារជាតិ របស់បារាំងទេ និងមានជំនាញ នៅក្នុងការសិក្សាស្រាវជ្រាវ ផ្នែក​គ្រោះថ្នាក់យន្ដហោះ។ នាយកដ្ឋាន DGA ធ្លាប់បានសិក្សាស្រាវជ្រាវ ទៅលើបំណែកជាង ៦៥០ របស់​យន្ដហោះ​អ៊ែរហ្វ្រង់ AF447 ដែលជួបគ្រោះថ្នាក់ កណ្ដាលមហាសមុទ្រអាត្លង់ទីក កាលពីថ្ងៃទី១​ ខែមិថុនា ឆ្នាំ២០០៩ កន្លង​មក។

ការស៊ើបអង្កេត របស់បារាំង និងការស៊ើបអង្កេត ជាលក្ខណៈអន្តរជាតិ ទៅលើការបាត់យន្ដហោះ MH370 នេះ ត្រូវបានសម្របសម្រួល នៅខណៈនេះ ដោយការិយាល័យស៊ើបអង្កេតមួយទៀត របស់បារាំង ហៅកាត់ថា «BEA»។ ការិយាល័យនេះ ជាស្ថាប័នតែមួយ ស្ថិតក្រោមក្រសួងដឹកជញ្ជូន របស់ប្រទេសបារាំង ដែលមាន​ជំនាញ​ខាងការកំណត់ ពីមូលហេតុ នៃគ្រោះថ្នាក់យន្ដហោះ។ អ្នកជំនាញ ធ្វើការនៅក្នុងការិយល័យនេះ មាន​ប្រមាណ​ជាង ៥០នាក់ ហើយធ្លាប់បានបំបែក រកមូលហេតុ នៃការធ្លាក់យន្ដហោះ ជាច្រើនរួចមកហើយ៕