តារា - លោក សុភ័ណ្ឌ ឡារី ដែលជាតារាសម្តែង ដែលល្បីមួយរូបនៅកម្ពុជា ដែលត្រូវបានផលិតកម្ម ក៏ដូចជា​ស្ថានីយ៍ទូរទស្សន៍មួយចំនួនក្នុងស្រុក បញ្ឈប់មិនឱ្យឡើយសម្តែង ក្នុងអំឡុងពេលដែលលោកបានចូលរួមហែរបក្ស និងក្នុងអំឡុងពេលដែលនយោបាយនៅក្នុងប្រទេស កំពុងជាប់គាំង។

ទើបតែក្នុងសប្តាហ៍នេះ ក្នុងកម្មវិធីរបស់ក្រុមហ៊ុនស្រាបៀរ ហ្គេនបើគ ក្នុងទូរទស្សន៍ស៊ីធីអិន វត្តមានរបស់តារារូបនេះ​លេចសារជាថ្មី។ ការដែលវត្តមានរបស់តារារូបនេះ ត្រូវបានស្ថានីយ៍ទូរទស្សន៍ខាងលើ ហៅឱ្យចូលលេងក្នុងកម្មវិធី​ខាងលើនេះ គេប្រាកដណាស់ថា មានជាប់ទាក់ទងនឹងហេតុផលនយោបាយ។ នោះគឺ បន្ទាប់ពីគណបក្សទាំងពីរ បាន​ចរចាត្រូវគ្នាវិញ កាលពីថ្ងៃទី២២ ខែកក្កដាថ្មីៗនេះ ដើម្បីបញ្ចប់វិបត្តិនយោបាយដ៏រ៉ាំរ៉ៃ។

កន្លងមកតារាសម្តែង ដែលអតីតជាកម្មករសំណង់រូបនេះ ធ្លាប់បានប្រាប់ទស្សនាវដ្ដីមនោរម្យ.អាំងហ្វូថា «តាំងពី​បាន​ចូលរួមហែរក្បួន ជាមួយគណបក្សសង្រ្គោះជាតិមក គេបានបញ្ឈប់ការសម្តែងរបស់ខ្ញុំ មួយសារហើយ។ ហើយកាល​ពី២អាទិត្យមុន គេបានចេញក្រដាសមួយមក គេហាមខ្ញុំម្តងទៀត ជាមួយនឹងសិស្សប្អូនជាសិល្បៈករ៦នាក់ទៀត។»

ជាមួយនឹងការថ្លែងអំណរគុណ តាមបណ្ដាញសង្គម ទៅដល់ស្ថានីយ៍ទូរទស្សន៍ស៊ីធីអ៊ិន និងម៉ាយធីវី ដែលបានហៅ​ខ្លួន ឱ្យបានឡើងធ្វើជាតារាកិត្តិយសសារជាថ្មី លោក សុភ័ណ្ឌ ឡារី បានបន្តក្ដីសង្ឃឹមទៀតថា ស្ថានីយ៍​ទូរទស្សន៍​ដ៏ទៃ នឹងប្រកាន់យកភាពយុត្តិធម៌ ជាពិសេសនោះមិនរើសអើងខាងផ្នែកនយោបាយនោះទេ។ ប៉ុន្តែអ្វីដែលសំខាន់ សម្រាប់តារារូបនេះ លោកបានថ្លែងដោយមោទនភាពថា លោកមិនខ្លាចការគាំរាមកំហែង ពីអ្នកមានអំណាចណា​ម្នាក់​ឡើយ៕