វីរៈភាព - តាំងពីជាង២០ឆ្នាំមកហើយ ដែលអតីតមន្ត្រីកម្មាភិបាលខ្មែរក្រហមមួយរូប លោក អាគី រ៉ា បានធ្វើការ​ដោះមីនប្រឆាំងមនុស្ស ប្រកបដោយចំណាប់អារម្មណ៍ខ្ពស់ សឹងតែនៅគ្រប់ទីកន្លែងទាំងអស់ ក្នុងប្រទេសកម្ពុជា។ គេហទំព័រ កូរើស (Koreus) របស់បារាំង បានយកវីដេអូមួយ ដែលថតផ្តិតយករូបភាព ដោយអ្នកសារព័ត៌មាន​របស់​ផងខ្លួននោះ មកចុះផ្សាយ ហើយបង្កឲ្យមានការចែករំលែកបន្តគ្នា នៅពាសពេញទ្វីបអ៊ឺរ៉ុប ស្ដីពីវីរៈភាពរបស់បុរស អាគី រ៉ា។

វីរៈភាពគួរឲ្យកោតស្ងប់ស្ងែង ព្រោះបុរសជាតិខ្មែររូបនេះ បានដោះមីនចេញពីដី និងរើរុះប្រអប់មីននោះ ដោយដៃទទេ ជាមួយតែកាំបិតចុងស្រួចមួយប៉ុណ្ណោះ និងគ្មានរបាំង ឬអាវការពារអ្វីទាំងអស់។ ការរើរុះប្រអប់មីនទាំងនោះ ត្រូវ​បានបុរសយើងធ្វើ ពោរពេញដោយជំនាញយ៉ាងប៉ិនប្រសព្វ និងមិនភ័យខ្លាចថា មីននេះអាចនឹងផ្ទុះឡើងនោះឡើយ។

យ៉ាងណាក៏ដោយ នៅក្នុងវីដេអូ លោក អាគី រ៉ា បាននិយាយថា ប្រការនេះទាមទារឲ្យយើងស្គាល់ពីសណ្ឋានមីន ឬគ្រាប់មិនទាន់ផ្ទុះនោះឲ្យច្បាស់ ហើយក៏មិនមែនចេះតែឆ្កឹសឆ្កៀល មិនមានរបៀបនោះដែរ។

របបកម្ពុជាប្រជាធិបតេយ្យ បានបិទបញ្ចប់កន្លងទៅ ជាង៣៥ឆ្នាំមកហើយ ហើយមន្ត្រីកម្មាភិបាល​សេសសល់របស់ របប​នេះ ក៏ទើបនឹងចុះចូលមករស់នៅក្នុងសង្គមជាតិវិញ ក្នុងរយៈពេលជាង១០ឆ្នាំចុងក្រោយនេះដែរ។

ប៉ុន្តែសង្គ្រាមបានបញ្ចប់ទៅហើយ ក្រុមខ្មែរក្រហមបានបាត់រូបរាងក៏មែនពិត តែប្រទេសកម្ពុជា​នៅសល់គ្រាប់មីន និង​គ្រាប់មិនទាន់ផ្ទុះ រាប់សិបម៉ឺនគ្រាប់ទៀត ដែលដាំបង្កប់ ឬធ្លាក់នៅក្នុងដីព្រៃភ្នំ និងនៅតំបន់ដាច់ស្រយ៉ាលនានា ហើយ​អាចបង្កជាសុបិន្ដដ៏អាក្រក់ ដល់ប្រជាជនស៊ីវិល ជាពិសេសដល់កុមារ។ នៅក្នុងរបាយការណ៍មួយ របស់អង្គការ​ស៊ីម៉ាក​កម្ពុជា បានឲ្យដឹងថា គ្រាប់មីនដែលមានបង្កប់នៅក្នុងប្រទេស បន្ទាប់ពីសង្គ្រាមនោះ មានប្រមាណជាង​៧​លានគ្រាប់។ ប៉ុន្តែមួយភាគធំពីក្នុងចំណោមនោះ ត្រូវបានដោះចេញរួចរាល់ហើយ៕

នេះជាវីដេអូ បង្ហាញពីវីរៈភាពរបស់ លោក អាគី រ៉ា៖