នាង ជូលី ហ្គៃយ៉េ និងលោក ហ្វ្រង់ស៊័រ ហូឡង់។ (រូបថត ឯកសារ)

ប្រតិកម្មនឹងការបែកធ្លាយ - ពាក្យចចាមអារាម ទាក់ទងនឹងរឿងផ្ទាល់ខ្លួនរបស់លោក បានបង្ខំឲ្យលោក ហ្វ្រង់ស៊័រ ហូឡង់ ចេញមកធ្វើប្រតិកម្មដោយផ្ទាល់។ ក្នុងឱកាសនៃការទទួលទាន ជាមួយអ្នកការសែត នៅវិមានប្រធានាធិបតី អេលីហ្សេ ថ្ងៃទី២២ ខែកក្កដានេះ លោកបានថ្លែងថា៖ «ខ្ញុំមានដំណឹងមួយប្រាប់អ្នកទាំងអស់គ្នា។ ថ្ងៃទី១២ ខែសីហា ជាថ្ងៃបុណ្យខួបកំណើតរបស់ខ្ញុំ។ អ្នកទាំងអស់គ្នាអាចជូនពរឲ្យខ្ញុំបាន តែមិនបាច់ជូនអំណោយអ្វីខ្ញុំនោះទេ។ ថ្ងៃទី១២ ខែសីហា ជាថ្ងៃបុណ្យខួបកំណើតរបស់ខ្ញុំ ហើយគ្មានអ្វីទៀតទេ។»

ការថ្លែងបញ្ជាក់របស់លោក សំដៅបោសសម្អាតនូវពាក្យកេះកៀវ កៀនកោះ និយាយថាលោក នឹងចូលរោងការ​នៅ​ថ្ងៃនោះ។ លោកប្រធានាធិបតី បានចាត់ទុកថា ការបង្កើតហេតុការណ៍នេះឡើង ជារឿងចម្កួតសុទ្ធតែម្ដង។

ពាក្យចចាមអារ៉ាមនេះ ត្រូវបានសារព័ត៌មានអង់គ្លេស The Daily Mirror យកមកបើក​កកាយ​ ដោយលើក​យក​ប្រភព​ជាច្រើនស្និតនឹងប្រធានាធិបតី មកបញ្ជាក់។

បន្ទាប់ពីហេតុការណ៍ជាច្រើន ដែលបានផ្ទុះឡើងដោយ អតីតម្ចាស់ចិត្តរបស់លោក នាង វ៉ាឡេរី ទ្រីអ៊ើវៃល័រ (Valérie Trierweile) និងការបើកកកាយទំនាក់ទំនងសម្ងាត់ជាមួយនឹងតារាភាពយន្ដ នាង ជូលី ហ្គាយ៉េ នោះមក លោក​ប្រធានាធិបតីបារាំង បានខិតខំលាក់បាំងឲ្យបានជាអតិប្បរិមា នូវអ្វីៗក៏ដោយដែលទាក់ទងនឹងជីវិត​ឯកជនរបស់​លោក។ លោកហូឡង់ មិនដែលបានរៀបការទេ បើសូម្បីជាមួយលោកស្រី សេហ្គូឡែន រ៉ូយ៉ាល់ (Ségolène Royal) អតីតម្ចាស់ចិត្តពីវ័យសិក្សាដ៏យូរលង់ ហើយសព្វថ្ងៃជារដ្ឋមន្ត្រីក្រសួងបរិស្ថានរបស់លោក នោះក៏ដោយ។

ប៉ុន្តែអ្វីដែលគួឲ្យចាប់អារម្មណ៍ដែរនោះ គឺលោក ហូឡង់ មិនដែលបញ្ជាក់ទទួលស្គាល់ ឬបដិសេធ ពីទំនាក់​ទំនង​រវាង​លោក និងតារាភាពយន្ដ នាង ជូលី ហ្គៃយ៉េ នោះឡើយ៕