ថ្នាក់ដឹកនាំកំពូលនៃគណបក្សនយោបាយធំៗទាំងពីរ នឹងដឹកដៃគ្នាឡើងគាល់ព្រះមហាក្សត្រ នាល្ងាចថ្ងៃទី២៤ ខែ​កក្កដានេះ ដើម្បីបង្ហាញពីកិច្ចព្រមព្រៀង ក្រោយជំនួបប្រជុំកាលពីថ្ងៃទី២២ ខែកក្កដា។ កិច្ចការបន្ទាប់មក នៅក្នុង​គម្រោងនោះ នឹងមានការស្បថធ្វើសច្ចាប្រណិធាន នៅថ្ងៃបន្ទាប់ ថ្ងៃទី២៥ ខែកក្កដា ឆ្នាំ២០១២។

ព្រះមហាក្សត្រ នរោត្តម សី ហមុនី យាងព្រះកោដ្ឋព្រះបរមរតនកោដ្ឋ ចូលព្រះរាជវាំង។ (រូបថត MONOROOM.info/ O.Vary)

នយោបាយ - ថ្នាក់ដឹកនាំកំពូលគណបក្សប្រជាជនកម្ពុជា និងគណបក្សសង្គ្រោះជាតិ ចូលគាល់អង្គ​ព្រះមហាក្សត្រ​នាល្លាចថ្ងៃទី២៤ ខែកក្កដានេះ ដើម្បីទូលថ្វាយព្រះមហាក្សត្រ នូវលទ្ធផលក្រោយជំនួបចរចា ដោះស្រាយវិបត្ត​នយោបាយ ជាងមួយឆ្នាំមកនេះ។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ ក្នុងកិច្ចសម្ភាសជាមួយវិទ្យុអាស៊ីសេរី ក៏ដូចជា លោក អេង ឆៃអ៊ាង តំណាងរាស្ត្រជាប់ឆ្នោតមណ្ឌលខេត្តកណ្តាល គណបក្សសង្គ្រោះជាតិ បានអះអាងថា ក្រោយបញ្ចប់​កិច្ច​ចចារទ្វេភាគី នាវិមានព្រឹទ្ធសភាមក មន្រ្តីថ្នាក់កំពូលនៃគណបក្សទាំងពីរ និងចូលគាត់អង្គព្រះមហាក្សត្រ ព្រះបាទ​នរោត្តម សីហមុនី ទូលថ្វាយពីលទ្ធផលជាវិជ្ជមាន ក្នុងការទម្លាយភាពទាល់ច្រកនៃនយោបាយកម្ពុជា។

មន្រ្តីគណបក្សរូបនេះបន្តថា ការចូលគាល់អង្គព្រះមហាក្សត្រ នៃព្រះរាជាណាចក្រកម្ពុជា វេលាម៉ោង៤រសៀលនេះ។ ហើយសមាសភាពប្រាំមួយរូប បីរូបមកពីគណបក្សប្រជាជនកម្ពុជា និងបីរូបទៀតមកពីគណបក្សសង្គ្រោះជាតិ។

សមាសភាពមកពីគណបក្សសង្គ្រោះជាតិ រួមមានលោក សម រង្ស៊ី, លោក កឹម សុខា និងលោក ប៉ុល ហំម។ ឯ​សមាស​ភាព មកពីគណបក្សប្រជាជនកម្ពុជា មានលោកនាយករដ្ឋមន្រ្តី ហ៊ុន សែន, លោក ស ខេង និងលោក សាយ ឈុំ។

លោកបានបន្តថា ថ្ងៃបន្ទាប់នៃការចូលស្បថ ដើម្បីក្លាយជាសមាជិករដ្ឋសភាពេញសិទ្ធិនោះ នឹងត្រូវធ្វើឡើងនៅ​ថ្ងៃ​បន្ទាប់ ក្រោយការទូលថ្វាយពីកិច្ចព្រមព្រៀងគណបក្សទាំងពីរ ដែលត្រូវចំថ្ងៃទី២៥ ខែកក្កដា ឆ្នាំ២០១៤ស្អែកនេះ។ ការចូលស្បថនេះ មានតែសមាជិកនៃគណបក្សសង្គ្រោះជាតិ តែ៥៥រូបប៉ុណ្ណោះ។

លោក អ៊ូ វីរៈ អតីតប្រធានមជ្ឈមណ្ឌលសិទ្ធិមនុស្សកម្ពុជា ដែលធ្លាប់បានលើកពីរឿងរើសអើងពូជសាសន៍ ប្រឆាំង​គណបក្សសង្គ្រោះជាតិនាពេលកន្លងមក បានបញ្ចេញនូវមតិផ្ទាល់ខ្លួនយ៉ាងខ្លី តាមបណ្ដាញសង្គមក្នុងពេលនេះថា៖ «សន្តិភាព ការបង្រួបបង្រួមជាតិ ឯកភាពជាតិខ្មែរ និង ការកសាងអភិវឌ្ឍន៍ប្រទេស ដើម្បីជាតិយើងរុងរឿងថ្កុំថ្កើង នៅក្រោម​ម្លប់ដ៏ត្រជាក់របស់ព្រះមហាក្សត្រ នៃព្រះរាជាណាចក្រកម្ពុជា»។

យ៉ាងណាក៏ដោយ ការសម្រេចចិត្តចូលសភា និងទទូលយកការសម្របសម្រួលផ្នែកនយោបាយ ដែលបានជាប់​គាំង​ជាងមួយឆ្នាំមកនេះ គណបក្សសង្គ្រោះជាតិ ក៏ដូចជាបក្សប្រជាជនកម្ពុជា ត្រូវបានមតិជាតិ និងអន្តរជាតិសាទរ និង​រីករាយ​ក្នុងការស្វែងរកដំណោះស្រាយ ដោយសន្តិវិធី គ្មានហិង្សា តាមរយៈនៃការចូលរួមក្នុងសភា៕