គ្មានទេ ជំនួបចរចារវាង ហ៊ុន សែន - សម រង្ស៊ី នៅលើទឹកដី នៃលោកខាងលិច ជាពិសេសនៅក្នុងអំឡុងពេល ដែលលោក ហ៊ុន សែន ធ្វើដំណើរទៅកាន់សហភាពអ៊ឺរ៉ុប និងសហរដ្ឋអាមេរិក ក្នុងប៉ុន្មានសប្ដាហ៍ខាងមុខ។ នេះ ជាការអះអាង របស់លោក ហ៊ុន សែន ដោយប្រើភាសាខ្លាំងៗ ហៅអ្នកវិភាគបញ្ហាសង្គម និងនយោបាយ លោក មាស នី ដែលចង់ឃើញការចរចាបែបនេះ ថាជាមនុស្ស«ឆ្កួត - ល្ងង់» និងឲ្យឈប់ធ្វើ​ជា «អ្នកវិភាគ» តទៅទៀត។

នៅក្នុងកិច្ចសម្ភាសមួយ ផ្ដល់ទៅឲ្យប្រព័ន្ធឃោសនារបស់លោក នាយករដ្ឋមន្ត្រីចាំផ្ទះកម្ពុជា បានអះអាងថា គ្មានការចរចាណាមួយ រវាងរូបលោក និងដៃគូបដិបក្ខផ្នែកនយោបាយ លោក សម រង្ស៊ី ទេ ហើយកម្ពុជា ក៏គ្មានវិបត្តិនយោបាយ អ្វីនោះដែរ។

លោក ហ៊ុន សែន បានថ្លែងឡើងថា៖ «គ្មានការចរចាណាមួយរវាងខ្ញុំ ជាមួយនឹងទណ្ឌិត សម រង្ស៊ី នោះឡើយ ក្នុងដំណើរទស្សនកិច្ចរបស់ខ្ញុំ ទៅក្រៅប្រទេសទាំងអាមេរិក និងនៅអឺរ៉ុប។ ខ្ញុំសូមប្រាប់ថា កម្ពុជាគ្មានវិបត្តិនយោបាយ ដូចការវិភាគឆ្កួតលេលា ដូច មាស នី នោះឡើយ មានតែអ្នកនយោបាយ អនុវត្តន៍ទោស តាមច្បាប់របស់កម្ពុជា តែប៉ុណ្ណោះ។»។

កាលពីថ្ងៃអាទិត្យ ទី២ ខែកញ្ញា ឆ្នាំ២០១៨នេះ ​លោក មាស នី បានផ្តល់ប​ទសម្ភាសន៍មួយ ​ដល់សារព័ត៌មាន ​ភ្នំពេញប៉ុស្តិ៍ ដោយ​​បង្ហាញ​ឆន្ទៈ​ចង់​ឃើញ​លោក​ ហ៊ុន សែន ជួប​ចរចា​ជាមួយ​លោក​ សម រង្ស៊ី នៅលើ​ទឹកដី​លោក​ខាង​លិច ដោយ​មាន​ការសម្របសម្រួល​ ពី​អន្តរជាតិ​ ស្រប​ពេល​ដែល​មេដឹកនាំ​នយោបាយ​កំពូល​ ទាំង ២ ​មាន​វត្តមាន​ នៅ​សហរដ្ឋអាមេរិក និង​នៅក្នុងទ្វីប​អឺរ៉ុប ​នា​ចុង​ខែ​កញ្ញា​នេះ ឬ​អំឡុង​ខែ​តុលា​។

បុរសខ្លាំងកម្ពុជា បានបន្តប្រើពាក្យសំដីធ្ងន់ៗ តបទៅអ្នកវិភាគថា៖ «មាស នី បើឆ្កួត ឆ្កួតតែឯងទៅ កុំមកនាំគេឆ្កួតជាមួយ។ បើ មាស នី ឯងល្ងង់មិនយល់ផ្នែកនយោបាយទេ កុំមកធ្វើជាអ្នកវិភាគបន្តទៅទៀត។»។

ប៉ុន្តែលោក មាស នី មិនបានឆ្លើយតប ទៅនឹងភាសាគ្រោតគ្រាតខាងលើទេ។ លោកបានបន្ធូរបរិយាកាសមកវិញ ដោយចាត់ទុកប្រតិកម្មរបស់លោក ហ៊ុន សែន ថាគ្រាន់តែជារឿងធម្មតា។

អ្នកវិភាគ​បានលើកឡើង​យ៉ាងខ្លីមួយ តាមរយៈសារព័ត៌មាន ភ្នំពេញប៉ុស្តិ៍ ដដែលថា៖ «​ជួនកាល ​ការវិភាគ​ហ្នឹង វា​តែងតែ​មាន​ ភាព​ចន្លោះប្រហោង​ខ្លះ​។ សម្រាប់​ខ្ញុំ ខ្ញុំ​មិន​គិត​ថា​ អាហ្នឹង​វា​ជា​រឿង​អី ​ដែល​ធំធេង​ទេ​។ សម្រាប់​ខ្ញុំ​ មិនមែន​ជា​អ្នក ​ដែល​ត្រូវ​តែ​ចេះ​អី ​ក្នុង​រឿង​ [នយោបាយ] ​ហ្នឹង​ទេ ​ខ្ញុំ​គ្រាន់​តែ​បន្ត​ធ្វើ​អី ដែល​ខ្ញុំ​អាច​ធ្វើ​បាន ហើយ​ខ្ញុំ​នឹង​ព្យាយាម ​មិន​ធ្វើ​អី​ឲ្យ​ប៉ះពាល់​ ដល់​ប្រយោជន៍​ជាតិ ឬ​ប៉ះពាល់​ដល់​កិតិ្តយស​បុគ្គល ​ណា​មួយ​ទេ។​»៕