នៅកម្ពុជាយ៉ាងហោចណាស់ គេឃើញមានលោក កឹម គុណវឌ្ឍន៍ មន្ត្រីជាន់ខ្ពស់ដ៏កម្រមួយរូប ដែលបានដឹងពី​កំហុសរបស់ខ្លួន ទាក់ទងនឹងការអាក់ខានការផ្សាយបន្តផ្ទាល់ ពីរាជពិធីច្រត់ព្រះនង្គ័ល ហើយបានប្រកាសលាលែង ពីតំណែង។ ប៉ុន្តែក្រៅពីនេះ គេមិនដែលឃើញមន្ត្រីណាម្នាក់ ចេញមុខទទួលខុសត្រូវ ទទួលស្គាល់កំហុស ឬសុំ​ទោសជាសាធារណៈ សូម្បីតែម្ដងនោះឡើយ។ តែបើវាពិបាកណាស់ សូមមើលគំរូរបស់តំណាងរាស្ត្រមួយរូប របស់​ប្រទេសជប៉ុន ដែលបង្ហាញពីរបៀប«សុំទោស»យ៉ាងពិសេស ដូចខាងក្រោម (មានវីដេអូ)។

តំណាងរាស្ត្រជប៉ុន សុំទោស។ (រូបថតផ្តិតចេញពីវីដេអូ)

ពីនេះពីនោះ - កាលពីថ្ងៃអង្គារម្សិលម៉ិញ លោក រីអ៊ូតារ៉ូ ណូរ៉ូមៀរ៉ា (Ryutaro Nonomura) អាយុ៤៧ឆ្នាំ អ្នក​តំណាង​រាស្ត្រជប៉ុន ក្នុងខេត្តមួយផ្នែកខាងលិចនៃប្រទេស បានបង្ហាញមុខនៅក្នុងសន្និសីទសារព័ត៌មានមួយ នៅទីក្រុងកូបេ (Kobe) ដើម្បីបកស្រាយពីបញ្ហា សង្ស័យលួចបង្វិលមូលនិធិ ប្រមាណជា៥ម៉ឺនដុល្លា យកទៅធ្វើដំណើកំសាន្ត និង​ទៅស្នាក់ក្នុងគ្រឹស្ថានងូតទឹក។ ដំណើរទាំងអស់នេះ មិនមានឃើញវិក័យប័ត្រ ត្រូវបានបង្ហាញមកជាមួយទេ។

ជាទូទៅ បើមន្ត្រីជាន់ខ្ពស់ជប៉ុនណាម្នាក់ ចង់បង្ហាញកាយវិការឲ្យគេយោគយល់ពីអ្វីមួយ មន្ត្រីនោះត្រូវ​ស្លៀកពាក់​ត្រឹមត្រូវ ហើយអោនក្បាល់គោរព នៅចំពោះក្រុមអ្នកសារព័ត៌មាន ដើម្បីអាចយករូបភាពនេះទៅចុះផ្សាយ។

តែសម្រាប់លើកនេះ លោក រីអ៊ូតារ៉ូ ណូរ៉ូមៀរ៉ា បានបង្កើតឲ្យមានជា«ឈុតឆាក»យ៉ាងពិសេស នោះគឺគាត់​យំផង​ស្រែកផង បោកខ្លួនទៅនឹងតុផង ដោយចេញទាំងទឹកភ្នែក ហូរហៀយ៉ាងសស្រាក់សស្រាំថែមទៀត។ លោកបាន​ច្រានចោល នូវការសុំទោស ហើយបានបកស្រាយនូវហេតុផលយល់ច្រឡំទាំងឡាយ ដោយស្រែកខ្លាំងៗ នៅពី​មុខម៉ាស៊ីនថតរបស់ក្រុមអ្នកយកព័ត៌មាន។

លោកស្រែកថា៖ «... ខ្ញុំក្លាយជាសមាជិករដ្ឋសភា ... (យំ) ... ខ្ញុំគិតតែម្យ៉ាងគត់ គឺផ្លាស់ប្ដូរសង្គម ... ប្រទេស​ជប៉ុន​នេះ ... (យំ) ... ខ្ញុំបានប្រថុយជីវិតរបស់ខ្ញុំ ... (យំហើយស្រែក) ... តើអ្នកឯងយល់ឬទេ ?!»

ឈុតឆាកនេះ បានបន្តធ្វើនៅក្នុងរយៈពេល ជិត៣ម៉ោង ជាមួយនឹងភាពស្រឡាំងកាំង និងភាពទប់សំណើច សឹងមិន​បានរបស់​អ្នក​សារព័ត៌មាន។ ប៉ុន្តែយ៉ាងណាក៏ដោយ អ្នកតំណាងរាស្ត្ររូបនេះ ត្រូវបានគេទទួលស្គាល់ថា ជា​មន្ត្រី​ម្នាក់ នៅក្នុងចំណោមមន្ត្រីស្អាតស្អំល្អៗ ជាច្រើនរបស់ប្រទេសជប៉ុន។ វីដេអូរបស់លោក ដែលដាក់ផ្សាយនៅលើទំព័រវីដេអូ យូធូប ត្រូវបានគេចុចចូលទៅទស្សនាប្រមាណជា ជិត២លានដងរួចមកហើយ៕

សូមទស្សនាការនិយាយឲ្យគេយោគយល់គាត់ ដូចតទៅ៖