រដ្ឋមន្រ្តីក្រសួងការបរទេសជប៉ុន លោក ហ្វូមីអូ គីស៊ីដា (FUMIO KISHIDA) បានជំរុញឲ្យគណបក្សសង្រ្គោះជាតិ និងគណបក្សប្រជាជនកម្ពុជា គម្បីមានឆន្ទៈពិតប្រាកដ លើការកែទម្រង់គណៈកម្មាធិការជាតិរៀបការបោះឆ្នោត គ.ជ.ប និងការដោះស្រាយបញ្ហានយោបាយកម្ពុជា។

លោក ហ្វូមីអូ គីស៊ីដា រដ្ឋមន្រ្តីក្រសួងការបរទេសជប៉ុន។ (រូបថត scmp.com)

ការបោះឆ្នោត - ក្នុងសន្និសីទការសែត នៅចំពោះមុខរដ្ឋមន្រ្តីក្រសួងការបរទេសកម្ពុជា លោក ហោ ណាំហុង នៅថ្ងៃ​ទី៣០ ខែកក្កដា ឆ្នាំ២០១៤ នេះលោក ហ្វូមីអូ គីស៊ីដា រដ្ឋមន្រ្តីក្រសួងការបរទេសជប៉ុន បានថ្លែងថា ប្រទេសជប៉ុន​បន្ត​គាំទ្រ​ប្រទេសកម្ពុជាលើគ្រប់វិស័យ ពិសេសការកែទម្រង់ ដែលអាចនាំប្រទេសកម្ពុជា ឲ្យមានលិទ្ធិប្រជាធិបតេយ្យ​រឹងមាំ។

បញ្ហាប្រេះឆាគ្នា រវាងគណបក្សប្រជាជនកម្ពុជា និងគណបក្សសង្រ្គោះជាតិ តាំងពីក្រោយការបោះឆ្នោតសកល​ឆ្នាំ​២០១៣ ត្រូវលោក ហ្វូមីអូ គីស៊ីដា ( FUMIO KISHIDA ) ប្រមុខការទូតរបស់ប្រទេសជប៉ុន ដែលកំពុងបំពេញ​ទស្សនកិច្ច​នៅកម្ពុជា បានសង្កត់ធ្ងន់តាមរយៈអ្នកបកប្រែថា៖ «ខ្ញុំសង្ឃឹមយ៉ាងមុតមាំថា គណបក្សទាំងពីរ មានទិស​ដៅច្បាស់លាស់ សម្រាប់កំណែទម្រង់នៅក្នុងរបៀបមួយ ដែលគណបក្សកាន់អំណាច និងគណបក្សប្រឆាំង អាច​ឯកភាពគ្នាបាន។»

រហូតមកដល់ពេលនេះ សម្រាប់គណបក្សសង្រ្គោះជាតិនៅតែប្រកាន់គោលជំហរថា សមាសភាពនៃ​គណៈកម្មាធិការ​ជាតិរៀបការបោះឆ្នោត​ ត្រូវតែអនុម័តដោយសំលេងពីរភាគបី នៃសមាជិកសភា។ សំឡេងពីរភាគបី ដែលគណបក្ស​ជំទាស់នេះអះអាងថា នឹងអាចធានាបានថា គ.ជ.ប មានឯករាជ្យភាពពិតប្រាកដ ដើម្បីគ្រប់គ្រងការបោះឆ្នោត។

តែសម្រាប់គណបក្សប្រជាជនកម្ពុជា ដែលច្រានចោលការទាមទារលក្ខខណ្ឌស្នូល របស់គណបក្សសង្រ្គោះជាតិ បានលើកឡើងថា សមាសភាព នៃគណៈកម្មាធិការជាតិរៀបការបោះឆ្នោត គ.ជ.ប ត្រូវតែអនុម័តដោយ​សំឡេង​ហាសិបបូកមួយ នៃសមាជិកសភា។ បើតាមគណបក្សដែលកំពុងគ្រប់គ្រងអំណាចមួយនេះ បានពន្យល់ថាសំឡេង​ពីរភាគបី នឹងនាំឲ្យមានការជាប់គាំង ដល់ការបង្កើតគណៈកម្មាធិការជាតិរៀបចំការបោះឆ្នោត គ.ជ.ប និង​ស្ថាប័ន​ផ្សេងទៀត៕