កងទ័ពថៃ ដែលបានប្រកាសថា ខ្លួនទើបនឹងទទួលបានការគាំទ្រពីព្រះមហាក្សត្រ បន្ទាប់ពីបានធ្វើរដ្ឋប្រហារនោះ ទើបនឹងប្រកាសនៅព្រឹកថ្ងៃអង្គារនេះ ថាខ្លួននឹងរៀបចំកិច្ចប្រជុំការងារដ៏ធំមួយ នៅពេលខាងមុខនេះ។

កងទ័ពថៃ ដែលត្រូវបានគេបញ្ជូនចូលមកក្នុងរាជធានីបាងកក។ (រូបថត AFP)

នយោបាយថៃ - អ្នកនាំពាក្យរបស់របបដឹកនាំយោធា ដែលទើបនឹងធ្វើរដ្ឋប្រហារនៅក្នុងប្រទេសថៃ បានថ្លែង​ទៅ​កាន់អ្នកសារព័ត៌មានថា៖ «យើងនឹងអញ្ជើញគ្រប់តំណាងទាំងអស់ ពីខាងក្រសួងមន្ទីរនានា និងពីនាយកដ្ឋានផ្សេងៗ ដូចជានគរបាលជាតិជាដើម ដើម្បីជួបប្រជុំ និងចាប់ផ្ដើមធ្វើការងារ»។

អគ្គមេបញ្ជាការកងទ័ពថៃ និងជាមេដឹកនាំការធ្វើរដ្ឋប្រហារ កាលពីថ្ងៃព្រហស្បត្តិ៍កន្លងមក លោក ប្រាយុទ ចាន់អ៊ូចា បានប្រកាសដោយខ្លួនលោក កាលពីរសៀលថ្ងៃចន្ទថា ព្រះមហាក្សត្រថៃ បានយល់ស្របជាផ្លូវការ នូវការតែងតាំង​លោកជាប្រមុខដឹកនាំក្រុមប្រឹក្សា ដែលកងទ័ពបង្កើតឡើង ដើម្បីដឹកនាំប្រទេសថៃ។ ក្នុងពេលជាមួយគ្នានោះ លោក​បានព្រមានសារជាថ្មីថា លោកនឹងប្រើប្រាស់កម្លាំង ដើម្បីបង្ក្រាបទៅបាតុកម្មណាក៏ដោយ ដែលចង់ប្រមូលគ្នា​ធ្វើ​បន្ត​ទៀត។

លោក ប្រាយុទ បានអះអាងថា កម្មវត្ថុចំបងរបស់លោក គឺត្រូវតែរៀបចំការបោះឆ្នោតឡើងវិញ ឲ្យបានរហ័សបំផុត តែលោកមិនបានថ្លែងដល់ពីកាលវិភាគមួយ នៅឡើយ។

បាតុករជាច្រើនពាន់នាក់ ដែលមិនបានខ្វល់នឹងច្បាប់អាជ្ញាសិករបស់កងទ័ព បានប្រជុំគ្នាធ្វើបាតុកម្ម​កាលពីថ្ងៃ​ចន្ទ​ទី២៦ ខែឧសភានេះ នៅខាងមុខស្ដូបជ័យជំនះ កណ្ដាលរាជធានីបាងកក ដើម្បីបរិហាពីរដ្ឋប្រហារ ហើយបាន​អំពាវនាវ​ឲ្យមានការបោះឆ្នោត។ បាតុកម្មនេះ បានទទួលនូវការប៉ះទង្គិចស្រាលមួយ ជាមួយនឹងកងកម្លាំង​រៀបចំ​សណ្ដាប់ធ្នាប់ ប៉ុន្តែមិនមានអំពើហិង្សាកើតឡើងខ្លាំងក្លានោះទេ។

បាតុកម្មនេះបានបំបែកជួរនៅវេលាល្ងាច តែបាតុករបានសន្យាគ្នាថា នឹងវិលត្រឡប់មកវិញនៅថ្ងៃនេះទៀត។

កងទ័ពបានចេញច្បាប់អាជ្ញាសិក កាលពីថ្ងៃទី២០ ខែឧសភាកន្លងមក មុននឹងបានធ្វើរដ្ឋប្រហារនៅពីថ្ងៃក្រោយមក ដោយបានធ្វើការហាមប្រាមការប្រជុំជួបជុំគ្នា ចាប់ពី៥នាក់ឡើង និងបានបិទមិនឲ្យមានចរាចរណ៍ ចាប់ពីម៉ោង១០​យប់រហូតដល់ម៉ោង ៥ភ្លឺ៕