យ៉ាងហោចណាស់ មានបុរសពីរនាក់ដែលអះអាងជាពលរដ្ឋធម្មតា កំពុងជិះម៉ូតូធ្វើដំណើរនៅតាមដងផ្លូវ តែស្រាប់​តែ​ត្រូវបានក្រុមសន្តិសុខបិទមុខ ព្រួតគ្នាវាយដោយគ្មានមូលហេតុ។

ក្រុមសន្តិសុខបិទមុខ ត្រូវបានយកមកពង្រាយ នៅក្បែរទីលានប្រជាធិបតេយ្យ ថ្ងៃទី០១ ខែឧសភា ឆ្នាំ២០១៤។ (រូបថត MONOROOM.info/ C. Nita)

ហិង្សា - បុរសអ្នកដំណើរយ៉ាងហោចពីរនាក់ ត្រូវបានកងកម្លាំងសន្តិសុខចម្រុះ ព្រួតគ្នាវាយយ៉ាងដំណំ នៅព្រឹក​ថ្ងៃ​ទី១ ខែឧសភា ឆ្នាំ២០១៤នេះ។

លោក អ៊ំ រ៉ូលី ដែល​អះ​អាង​ថាជាប្រជាពលរដ្ឋធម្មតា ខណៈពេលដែលជិះម៉ូចេញពីផ្លូវភ្លោះក្រមូនស ទៅដល់ចំនុច​ក្បែរមន្ទីរ​ពេទ្យអង្គឌួង ស្រាប់​តែ​ក្រុម​សន្តិសុខទាំងនោះ បានស្ទុះនាំគ្នាដេញវាយ រហូតម៉ូតូរបស់លោកដួល។ បន្ទាប់​ពីម៉ូតូដួល លោកបានព្យាយាមរត់ចេញ ដើម្បីគេចចេញពីការវាយតប់របស់ក្រុមសន្តិសុខ ប៉ុន្តែបានត្រូវក្រុមសន្ដិសុខ ទាំងនោះរត់ដេញតាមពីក្រោយ ជាច្រើនសិបម៉ែត្រ និងបានគប់ដំបងរបស់ពួកគេ ទៅលើរូបលោកបណ្តាលឱ្យដួល។

សាក្សីនៅនឹងកន្លែង បានថ្លែងរៀបរាប់ប្រាប់ថា ឆ្លៀតឱកាសដែលពលរដ្ឋរូបនេះដួលនោះ ក្រុមសន្តិសុខដែល​ពាក់​មួកសុវត្ថិភាព បានព្រួតគ្នាវាយទាត់ធាក់ និង​ប្រើ​ដំបងឆក់វាយយ៉ាងដំណំ ជាមួយនឹងសម្រែកឡើងថា៖ «វ៉ៃវា​ឱ្យងាប់​អាក្រុមយុវជន»។

ពលរដ្ឋត្រូវក្រុមសន្តិសុខបិទមុខ វាយ នៅក្បែរទីលានប្រជាធិបតេយ្យ ថ្ងៃទី០១ ខែឧសភា ឆ្នាំ២០១៤។ (រូបថត MONOROOM.info/ C. Nita)

ជាលទ្ធផល លោក អ៊ំ រ៉ូលី មានរាងកាយរងរបួសជាំលើខ្លួនជាច្រើនកន្លែង ជាពិសេសត្រង់កែងដៃ មានស្នាមជាំ​ហើម​ខ្លាំង និងត្រូវបានក្រុមគ្រូពេទ្យរបស់អង្គការការពារសិទ្ធិមនុស្ស លីកាដូ ទទួលជួយព្យាបាល។

លោក អ៊ំ រ៉ូលី បានបញ្ជាក់ថា លោកមិនបានប្រើពាក្យសម្តីមិនសមរម្យណាមួយ ទៅលើក្រុមសន្តិសុខទាំងនោះទេ លោកគ្រាន់តែជិះម៉ូតូមកដល់ត្រង់ចំនុចនោះ ក៏ត្រូវសន្តិសុខព្រួតគ្នាវាតែម្តង។

នៅក្នុងព្រឹត្តិការណ៍នោះដែរ ពលរដ្ឋចំណាក់ម្នាក់ទៀត ឈ្មោះ ផល អាយុ ៦២ ឆ្នាំ ជាអ្នក​រត់ម៉ូតូឌុបមួយរូប​ក៏ត្រូវបាន​ក្រុមសន្តិសុខបិទមុខទាំងនោះ ទះឡើងហើមមុខដែរ។

លោកអំ សំអាត ដែលនៅក្នុងហេតុការណ៍ផ្ទាល់ និងបានជួយហាមឃាត់ មិនឱ្យក្រុមសន្តិសុខទាំងនោះ ប្រើអំពើ​ហឹង្សា​លើពលរដ្ឋ បានចាត់ទុករូបភាពនៃការវាយដំលើបុរសរូបនេះ ថាជាទង្វើយ៉ាងសាហាវឃោឃៅ។ លោកបន្តថា ការដែរក្រុមសន្តិសុខ តែងតែប្រើអំពើហិង្សាទៅលើប្រជាពលរដ្ឋនេះ វាជាទម្លាប់ និងជាជាការញៀននឹងការវាយដំ ដោយសាតែការវាយដំរបស់សន្តិសុខទាំងនោះ មិនទទួលបានការផ្ដន្ទាទោស។

លោកបញ្ជាក់យ៉ាងដូច្នេះថា៖ «យើងដាច់ខាតត្រូវតែថ្កោលទោស ចំពោះទង្វើអមនុស្សធម៌ ឃោឃៅរបៀបនេះ ព្រោះ​សម័យនេះហើយ វាមិនគួរណាមានរឿងដែលប្រើប្រាស់នូវអំពើហឹង្សា តាមអំពើចិត្ត ដែលប្រៀបបីដូច​ជា​ប្រទេសមួយ​ដែលគ្មានច្បាប់ គ្មានទម្លាប់ប្រៀបដូចជាប្រទេសផ្តាច់ការ និងគ្មានអ្នកទទួលខុសត្រូវនោះទេ»។

លោក អ៊ំ វ៉ូលី បន្ទាប់ពីត្រូវបានក្រុមសន្តិសុខវាយ ថ្ងៃទី០១ ខែឧសភា ឆ្នាំ២០១៤។ (រូបថត MONOROOM.info/ C. Nita)

អ្នកនាំពាក្យសាលារាជធានី នៅមិនទាន់អាចទាក់ទងបាន ដើម្បីសុំការបំភ្លឺទាក់ទងនឹងការវាយតប់នេះនៅឡើយ។

ជារឿយៗ គេតែងសង្កេតឃើញថា នៅពេលដែលមានការជួបជុំគ្នារបស់ពលរដ្ឋ តែងតែមានការប្រើអំពើហិង្សា​ជា​ញឹកញាប់ពីសំណាក់ក្រុមសន្តិសុខបិទមុខទាំងនោះ។ ដោយឡែក គ្រាន់តែនៅព្រឹកថ្ងៃទី០១ ខែឧសភានេះ  យ៉ាង​ហោចណាស់ មានមនុស្ស៥នាក់ដែលរងរបួស ពីការប្រើអំពើហិង្សារបស់ក្រុមសន្តិសុខទាំងនោះ។

ហេតុការណ៍ដើម្បីជាការស្វាគមន៍ ទិវាពលកម្មអន្តរជាតិនេះ បានកើតឡើងបន្ទាប់ពីប្រធាន និងអនុប្រធាន​គណបក្ស​សង្រ្គោះជាតិ បានថ្លែងទៅកាន់អ្នកចូលរួមជាកម្មករ និងប្រជាពលរដ្ឋចប់។ នៅពេលនោះ ក្រុមសន្តិសុខចម្រុះ មាន​ស្លៀកឈុត ខៀវ ខ្មៅ ខ្លះទៀតស្លៀកពាក់អាវនគរបាល និងខ្លះស៊ីវិល កាន់ដំបងដែក ឈើ ជ័រ គ្រប់ដៃ បានដើរចេញ​ពីសួន​ច្បារ​​មុខធនាគារកាណាឌីយ៉ា សំដៅទៅស្ពាននាគ ដើម្បីបំបែកកម្មករ អ្នកជួបជុំណាដែលបន្តនៅលើស្ពាននាគ និងលើ​សួនច្បារក្បែរនោះ។ សកម្មភាព នៃការវាយតប់របស់ក្រុមសន្តិសុខ បានបង្ហាញនូវរូបភាព រត់ដេញវាយគ្នា​យ៉ាងប្រសាចពេញផ្លូវ លើកំណាត់ផ្លូវ​នរោត្តម ដែលមើលទៅហាក់ដូចជាក្មេង«ស្ទាវ»កំពុងរត់ដេញវាយគ្នា៕

-----------------------------------------------
ដោយ ក.ចាន់នីតា (ទំនាក់ទំនង៖ [email protected] ) -ភ្នំពេញ ថ្ងៃទី០១ ឧសភា ២០១៤