បេក្ខជនជាប់ឆ្នោតរបស់គណបក្សសង្រ្គោះជាតិ លោកស្រី មូរ សុខហួរ និងក្រុមសកម្មជនទាមទារតវ៉ាជាច្រើន បាន​ប្រតិកម្មទៅនឹងការកាត់ទោស របស់សាលាដំបូងរាជធានី ទៅលើជនជាប់ចោទទាំង២៣នាក់ ដោយបានដាក់ការ​ទទួលខុសត្រូវទៅលើ ភាពលំអៀងរបស់តុលាការមួយនេះ។

ក្រុមអ្នកតវ៉ានៅមុខសាលាដំបូងរាជធានី។ (រូបថត សហការី)

សិទ្ធិ - សាលាដំបូងរាជធានីភ្នំពេញ នៅព្រឹកថ្ងៃទី២៥ ខែមេសា ឆ្នាំ២០១៤ នេះ បានបើកសវនាការកាត់ទោស ជន​ទាំង២៣នាក់ ទាំងប្រទាំងប្រទើស ជាមួយនឹងការបិទផ្លូវគ្រប់ច្រក ក៏ព្រោះតែមានសកម្មជនដីធ្លី សកម្មជនសិទ្ធិមនុស្ស និងកម្មករច្រើនរយនាក់បានព្យាយាម ទៅកាន់មុខសាលាដំបូងរាជធានីភ្នំពេញ ដើម្បីទាមទារឲ្យតុលាការ​ដោះលែង​ជនទាំង២៣នាក់នោះ។

លោកស្រី មូរ សុខហួរ បេក្ខជនជាប់ឆ្នោតរបស់គណបក្សសង្រ្គោះជាតិ ដែលបានចូលរួមទាមទារឲ្យមាន ការដោះ​លែងជនទាំង២៣នាក់ នៅក្បែរសាលាតំបូងរាជធានីភ្នំពេញ បានថ្លែងប្រតិកម្មទៅនឹងការកាត់ទោសនេះថា៖ «ច្បាប់​និងរដ្ឋធម្មនុញ្ញ បានកំណត់ហើយថាសវនាការ ត្រូវធ្វើឡើងជាសាធារណៈ តែឥឡូវគេបានបិទផ្លូវទាំងអស់ នេះជា​ការ​បង្ហាញឲ្យសហគមន៍ជាតិ និងអន្តរជាតិមើលឃើញថា តុលាការកម្ពុជាខ្សោយ និងគ្មានភាពយុត្តិធម៌»។

អស់រយៈពេលជាង៣ខែមកហើយដែលលោកវន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅ​ប្រព័ន្ធ និងមនុស្ស២២នាក់ទៀត ត្រូវបានឃុំខ្លួននៅពន្ធនាគារត្រពាំងផ្លុងខេត្តកំពង់ចាម បើគិតពីពេលចាប់ខ្លួន​រហូតមកដល់ថ្ងៃបើកសវនាការទី២៥មេសា។សវនាការថ្ងៃទី២៥មេសានេះ ដែលត្រូវបានគេមើលឃើញ ថាមានការ​ឃ្លាំមើលយ៉ាងយកចិត្តទុកដាក់ពីសំណាក់ មន្រ្តីសិទ្ធិមនុស្ស អ្នកសារព័ត៌មាន និងគណបក្សជំទាស់ ចំពោះសំណុំ​រឿងដ៏ចម្រូងចម្រាសនេះ។

ក្រុមអ្នកគាំទ្រដែលរួមមាន ក្រុមសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ក្រុមបណ្ដាញព្រះសង្ឃ​ឯករាជ្យ ក្រុមកម្មករ ក្រុមអ្នកមានជម្លោះដីធ្លីរ៉ាំរ៉ៃនៅភ្នំពេញ បុរីកីឡា បឹងកក់ ថ្មគោលជាដើម ដែលសរុបទៅប្រមាណ​ជាជាងមួយពាន់នាក់ បាននាំគ្នាមកតវ៉ា ដើម្បីទាមទារឲ្យមានការដោះលែង លោកវន់ ពៅ និងមនុស្ស២២នាក់​ផ្សេង​ទៀត។ ព្រះសង្ឃ ប៊ុត ប៊ុនតិញ បានមានសង្ឃដីការរិះគន់ថា៖ «ចៅក្រម ព្រះរាជអាជ្ញា ក្រឡាបញ្ជី ជាមនុស្សអាក្រក់ ដែលមិនអាចការពារយុត្តិធម៌ ជូនខ្មែរអ្នកស្នេហាជាតិបាន។»

បើទោះជាមានគណបក្សជំទាស់ អង្គការសង្គមស៊ីវិលជាតិ និងអន្តរជាតិ បានអះអាងថាជនទាំង២៣នាក់គ្នានទោស និងទទូចដល់តុលាការឲ្យដោះលែងលោកវន់ ពៅ និងជនទាំង២២នាក់ជាបន្តបន្ទាប់ ក៏ដោយ ក៏សមត្ថកិច្ច និង​តុលាការកម្ពុជាដែលផ្អែកលើសំអាងច្បាប់ នៅតែបន្តឃុំខ្លួនលោកវន់ ពៅ និងជនទាំង២០នាក់ រហូតដល់ថ្ងៃបើក​សវនាការនេះ។

គួររម្លឹកថាលោក វន់ ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ និងកម្មករ២២នាក់ផ្សេង​ទៀត ត្រូវបានកម្លាំងសមត្ថកិច្ចចម្រុះចាប់ខ្លួន ក្នុងហេតុការណ៍ប៉ះទង្គិចគ្នារវាងកម្មករ និងកម្លាំងសមត្ថកិច្ចចម្រុះ នៅ​ពេលដែលកម្មករធ្វើបាតុកម្មទាមទារដំឡើងប្រាក់ឈ្នួលគោលដល់កម្មករ ១៦០ដុល្លារ កាលពីដើមខែមករា ឆ្នាំ​២០១៤ នៅមុខរោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង៕

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី២៥ មេសា ២០១៤