បន្ទាប់ពីមានការវាយដុំ ជាដំណំទៅលើអ្នកសារព័ត៌មាន កាលពីព្រឹកថ្ងៃទី២១ ខែមេសា នៅទីលានប្រជាធិបតេយ្យ​នោះមក មន្ត្រីអ្នកច្បាប់ និងជាតំណាងខាងអង្គការសង្គមស៊ីវិល បានសម្ដែងប្រតិកម្មថា គឺជារឿងមួយដែលមិនអាច​ទទួលយកបាន និងថាអ្នកប្រព្រឹត្តិត្រូវតែមានទោស។ មន្ត្រីរូបនោះ បានហៅអ្នកប្រព្រឹត្តិដៃដល់ទាំងនោះ ថាជាក្រុម​សន្ដិសុខ«បីសាច»។

សន្តិសុខ«បីសាច» បានបោចសក់ក្បាល រួចឡើងជង្គង់ ទៅលើនរណា ដែលនៅទើសមុខ នៅព្រឹកថ្ងៃទី២១ ខែមេសា ឆ្នាំ២០១៤។ (រូបថត ហ្វេសប៊ុក)

សិទ្ធិសារព័ត៌មាន - អនុប្រធានផ្នែកសិទ្ធិមនុស្ស និងជំនួយការផ្នែកច្បាប់ នៃអង្គការសិទ្ធិមនុស្សអាដហុក លោក ណៃ វ៉ង់ដា បានហៅការប្រើអំពើហិង្សា ទៅលើអ្នកសារព័ត៌មាននៅទីលានប្រជាធិបតេយ្យ នៅព្រឹកថ្ងៃទី២១ ខែមេសា ឆ្នាំ​២០១៤ នេះថា ជាអំពើមួយ«អសីលធម៌ និងខុសច្បាប់» ដោយសារតែប្រទេសកម្ពុជា ជាប្រទេសដែលមានច្បាប់​សារព័ត៌មានត្រឹមត្រូវ។

ការថ្លែងប្រតិកម្មរបស់លោក បានធ្វើឡើងបន្ទាប់ពីអ្នកសារព័ត៌មានមួយចំនួន និងយុវជនបីនាក់ ដែលអមដំណើរ​លោកស្រី មូរ សុខហួរ បេក្ខជនតំណាងរាស្ត្រជាប់ឆ្នោត របស់គណបក្សសង្គ្រោះជាតិ បានរងនូវការវាយដុំច្រំធាក់ ពីសំណាក់ក្រុមសន្តិសុខសាលាខណ្ឌដូនពេញ ប្រមាណជា៥០នាក់ ក្នុងការប៉ុនប៉ងបំបែកអ្នកទាំងនេះ មិនឲ្យចូល​ទៅកាន់ទីលានប្រជាធិបតេយ្យ។

លោក គង់ រៃយ៉ា ដែលបានអះអាងថា រូបលោកជាអ្នកយកពត៌មាន អោយសារព័ត៌មានកម្ពុជារីករាយនោះ ត្រូវបាន​ក្រុមសន្តិសុខ​«បិទមុខ»ជាច្រើននាក់ ចោមរោមវាយជាច្រើនដំបង ធាក់ទាត់ជាច្រើនជើង ចំដៃ ខ្លួន និងក្បាល។ តែ​ជាសំណាងល្អដែលលោកពាក់មួកសុវត្តិភាព មិនបណ្តាលអោយបែកក្បាល។ លោកបានរៀបរាប់ថា នៅទីលាន​ប្រជាធិបតេយ្យ ក្រុមសន្តិសុខដែលដឹកនាំ ដោយអភិបាលរងខណ្ឌដូនពេញ លោក សុខ ពេញវុធ បានហាមឃាត់​មិនអោយរូបលោក និងអ្នក​សារព័ត៌មានដទៃទៀត ឬនរណាម្នាក់ ឡើងលើទីលានប្រជាធិបតេយ្យឡើយ។ «មានមេ​បញ្ជាមកថា ឲ្យវាយ​ទាំងអស់» មិនថាអ្នកនោះមានកាន់កាមេរ៉ា ឬជាអ្នកកាសែតជាតិ អន្តរជាតិនោះទេ។

រីឯអ្នកសារព័ត៌មានផ្សេងទៀត ដែលនៅក្នុងព្រឹត្តិការណ៍នោះ ក៏បានអះអាងដែរថា ពួកគេមិនត្រូវបាន​អនុញ្ញាតឱ្យ​ថតយករូបភាព នៅពេលមានការបំបែកក្រុមលោកស្រី មូរ សុខហួរ ពីសំណាក់ក្រុមសន្តិសុខនោះឡើយ ព្រោះបើ​ចចេសចង់ថត នឹងត្រូវរងការវាយដុំដូចគ្នា។

លោក ណៃ វ៉ង់ដា បានថ្លែងថា «ខ្ញុំគិតថារឿងនេះ មិនអាចទទួលយកបានទេ ហើយអ្នកដែលប្រព្រឹត្តគួរតែមានការ​ដាក់ទោសទន្ត»។ លោកថា បើកាលណាសារព័ត៌មានណាមួយប្រព្រឹត្តខុស ទៅនឹងក្របខ័ណ្ឌច្បាប់ គឺដោះស្រាយ​តាម​ច្បាប់ មិនគួរប្រើអំពើហិង្សា ឬក៏អំពើឃោឃៅទៅលើអ្នកការសែតនោះទេ។

ក្រុមសន្តិសុខបីសាច...

«បើតាមផ្លូវច្បាប់ វាជាទោសកំរិតព្រហ្មទណ្ឌ»។ លោកបានសង្កត់ធ្ងន់ទៀតថា អី្វដែលពិបាកនោះគឺ ពិបាកដាក់​ទោសទន្តក្រុមសន្តិសុខទាំងនោះបានណាស់ ព្រោះជាក្រុមសន្តិសុខបីសាច ដែលមិនអាចកំណត់អត្តសញ្ញាណ​គាត់​បាន ព្រោះគាត់មានពាក់មួកឃ្លុបមិនឱ្យស្គាល់មុខ ហើយក៏អត់មានផ្លាក និងអ្វីដែលបញ្ជាក់ពីអត្តសញ្ញាណឡើយ។

កាលថ្ងៃទី១៨ ខែមេសា ឆ្នាំ២០១៤កន្លងទៅ ក្លឹបអ្នកកាសែតកម្ពុជា ក៏បានចេញសេចក្តីថ្លែងការណ៍មួយផងដែរ បង្ហាញការព្រួយបារម្ភអំពីសុវត្ថិភាពអ្នកសារព័ត៌មាន និងអំពីសេរីភាពបញ្ចេញមតិនៅកម្ពុជា។ ក្លឹបអ្នកកាសែតកម្ពុជា ចាត់ទុកសកម្មភាពរបស់សមត្ថកិច្ច ថាជាការគំរាមកំហែងយ៉ាងធ្ងន់ធ្ងរដល់ស្មារតី និងសុវត្ថិភាពអ្នកសារព័ត៌មាន ដែលកំពុងបំពេញបេសកម្មតាមវិជ្ជាជីវៈ និងជាចេតនារារាំងដល់ការអនុវត្តសិទ្ធិសេរីភាព នៃការបញ្ចេញមតិ រួមទាំង​បន្ទុចបង្អាក់ដោយផ្ទាល់ ដល់ដំណើរការអនុវត្ត លទ្ធិប្រជាធិបតេយ្យនៅកម្ពុជា៕

----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី២១ មេសា ២០១៤