ជន​ទាំង​២១ ធ្លាក់​ខ្លួន​ឈឺ​ជា​បន្ត​បន្ទាប់ និង​រង​ការ​រើស​អើង​ក្នុង​ពន្ធនាគារ

លោក វ៉ន ពៅ និងជនជាប់ឃុំ២នាក់ ក្នុងចំណោម២១នាក់ នៅក្នុងពន្ធនាគារត្រពាំងផ្លុង ខេត្តកំពង់ចាម ដែលបាន​ឃាត់ខ្លួននៅក្នុងហេតុការណ៍ប៉ះទង្គិចគ្នារវាងកម្មករនិងសមត្ថកិច្ច នៅមុខរោងចក្រយ៉ាកជីង និងសួនឧស្សាហកម្ម​កាណាឌីយ៉ា ផ្លូវវ៉េងស្រេង បានកំពុងធ្លាក់ខ្លួនឈឺដោយសារពុំមានថ្នាំព្យាបាលជំងឺគ្រាប់គ្រាន់។
Loading...
  • ដោយ: លោក គិន
  • កែប្រែចុងក្រោយ: April 22, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

លោក វ៉ន ពៅ និងជនជាប់ឃុំ២នាក់ ក្នុងចំណោម២១នាក់ នៅក្នុងពន្ធនាគារត្រពាំងផ្លុង ខេត្តកំពង់ចាម ដែលបាន​ឃាត់ខ្លួននៅក្នុងហេតុការណ៍ប៉ះទង្គិចគ្នារវាងកម្មករនិងសមត្ថកិច្ច នៅមុខរោងចក្រយ៉ាកជីង និងសួនឧស្សាហកម្ម​កាណាឌីយ៉ា ផ្លូវវ៉េងស្រេង បានកំពុងធ្លាក់ខ្លួនឈឺដោយសារពុំមានថ្នាំព្យាបាលជំងឺគ្រាប់គ្រាន់។


ការជួបគ្នាដាក់ញត្តិរបស់ក្រុមអង្គការសង្គមស៊ីវិល និងពលរដ្ឋនៅថ្ងៃទី២៩ ខែមករា ឆ្នាំ២០១៤។ (រូបថត ហ្វេសប៊ុក)

សិទ្ធិ - លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា បានថ្លែងចេញពីពន្ធនាគារ ថា ជន​ជាប់ឃុំ ៣នាក់ក្នុងចំណោម២១ នាក់នោះ មានរូបលោក ដែលរាគរុះ វិលមុខ និង រលាកបំពងក, លោក ចាន់ ពុទ្ធិស័ក្ត តំណាងប្រជាសហគមន៍បឹងកក់ ហើមនិងស្ពឹក និងលោក វ៉ន ពៅ ប្រធានសមាគមប្រជាធិតេយ្យឯករាជ្យ​នៃ​សេដ្ឋកិច្ច​ក្រៅប្រព័ន្ធ ញាក់ដៃ ញាក់ជើង ចុកក្នុងមុខរបួសដែលធ្លាប់វះកាត់ និងអស់កម្លាំងវិលមុខ ដែលធ្វើឲ្យគាត់ពុំអាច​ទទួល​ទានអាហារបាន។ លោកបានថ្លែងថា៖ «បងពៅឈឺធ្ងន់ជាងគេ ហើយមូលហេតុដែលបង្កឲ្យជំងឺកាន់តែដុនដាបនោះ ដោយសារកង្វះថ្នាំព្យាបាល បន្ទប់តូចចង្អៀត អាកាសធាតុក្តៅ»។

លោកបានថ្លែងឲ្យដឹងទៀតថា ពួកគាត់ទទួលបានថ្នាំព្យាបាលពីពេទ្យរបស់អង្គការលីកាដូដែរ បន្តែពុំមានថ្នាំ​គ្រប់​គ្រាន់ទេ។ កាលពីថ្ងៃអាទិត្យ នៅពេលដែលលោកវ៉ន ពៅ ធ្វើទុកខ្លាំងនោះ ខាងពន្ធនាគារក៏បានយកស៊ឺរ៉ូមមកចាក់​ព្យូរឲ្យគាត់ដែរ តែមិនអាចទប់ស្កាត់នូវជម្ងឺចាស់របស់គាត់បាននោះទេ។ លោកបានថ្លែងឲ្យដឹងទៀតថា៖ «បន្ទប់​ទំហំ៦ម៉ែត្រ គុណនិង ១០ ម៉ែត្រ ដាក់អ្នកទោសពី១១៥នាក់ទៅ១២០នាក់ ហើយថ្ងៃខ្លះពួកយើងពុំមានទឹកងួត និង សម្រាប់ចូលបន្ទប់ទឹកនោះទេ។ ពួកយើងរស់នៅក្នុងពន្ធនាគារនេះ គេមានការរើសអើងជាងអ្នកទោសដទៃ»។

លោកបានថ្លែងឲ្យដឹងថា លោកសុំអំពាវនាវ ទៅដល់រដ្ឋាភិបាល បណ្តាអង្គការសង្គមស៊ីវិលជាតិ និងអន្តរជាតិ​មេត្តា​ជួយអន្តរាគមន៍ ឲ្យពួកលោកបាននៅក្រៅឃុំ ដើម្បីបានទៅព្យាបាលជម្ងឺ ជាពិសេសលោកវ៉ន ពៅ តែម្តង ពីព្រោះ​ស្ថានភាពជំងឺរបស់គាត់កំពុងតែធ្ងន់ធ្ងរ។ លោកបានថ្លែងឲ្យដឹងទៀតថា៖ «ខ្ញុំសូមអំពាវនាវ ទៅរដ្ឋាភិបាល​មេត្តា​កុំ​យកពួកយើងជាល្បែងនយោបាយ ពួកយើងធ្វើការឯករាជ្យ មិនបំរើឲ្យគណបក្សនយោបាយណាមួយនោះទេ។ ពួក​ខ្ញុំជាជនរងគ្រោះ ក្នុងការបង្ក្រាបរបស់សមត្ថកិច្ច ដូច្នេះខ្ញុំសង្ឃឹមថាតុលាការនឹងផ្តល់យុត្តិធម៌ ដល់ពួកខ្ញុំនៅថ្ងៃទី២៥ ខាងមុខនេះ»។

លោក វន់ ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ និងជនជាប់ចោទទាំង ២២នាក់ ត្រូវ​បានអាជ្ញាធរចាប់ខ្លួនក្នុងហេតុការណ៍ប៉ះទង្គិចរវាងកម្មករ និងសមត្ថកិច្ច កាលពីថ្ងៃទី០២ និងទី០៣ ខែមករា នៅមុខ​រោងចក្រយ៉ាកជីង និងសួនឧស្សាហកម្មកាណាឌីយ៉ា ផ្លូវវ៉េងស្រេង នៅពេលដែលកម្មករធ្វើបាតុកម្មទាមទារ​ដំឡើង​ប្រាក់ឈ្នួលកម្មករ ១៦០ដុល្លារក្នុងមួយខែ។ អ្នកទាំងអស់ត្រូវបានចោទប្រកាន់ពីបទញុះញង់​ឲ្យប្រព្រឹត្តអំពើបង្ក​ឲ្យ​មានភាព​វឹកវរធ្ងន់ធ្ងរ ដល់សន្តិសុខសង្គម។

លោក គៀ សុវណ្ណា ប្រធានពន្ធនាគារត្រពាំងផ្លុង អះអាងថា លោក វន់ ពៅ ពិតជាមានអាការៈបែបនេះមែន ប៉ុន្តែ​នៅពេលនេះ អាការៈរបស់គាត់បានធូរស្រាលហើយ។ លោកបានថ្លែងឲ្យដឹងទៀតថា៖​ «គាត់រលឹកគ្រួសាររបស់គាត់ ទើបគាត់គិតច្រើន»។

លោក អំ សំអាត អ្នកគ្រប់គ្រងបច្ចេកទេសឃ្លាំមើល ការរំលោភសិទ្ធិមនុស្សអង្គការលីកាដូ បានមានប្រសាសន៍ថា អង្គការរបស់លោក តែងតែបញ្ជូនគ្រូពេទ្យឲ្យទៅព្យាបាលអ្នកទាំង២១នាក់ និងទណ្ឌិតផ្សេងៗទៀត ព្រមទាំងមន្ត្រី​ពន្ធនាគារ រៀងរាល់សប្តាហ៍ ចំណែកឯអាការៈរបស់លោក វន់ ពៅ មិនមានស្ថានភាពធូរស្រាលទេ។ លោកបាន​ថ្លែង​ឲ្យដឹងទៀតថា៖ «បើយើងមើលពីផ្លូវច្បាប់ ពួកគាត់នោះមិនត្រូវជាប់គុកនោះទេ គឺគួរតែកំលាំងសមត្ថកិច្ច និងអ្នក​ដែលបាញ់សម្លាប់កម្មករ និងធ្វើឲ្យរបួសនោះវិញទេ ដែលត្រូវជាប់គុក ប៉ុន្តែដោយសារពួកគាត់ទាំង២១នាក់នេះ ត្រូវ​បានគេយកជាឧបករណ៍នយោបាយ ទើបពួកគាត់ជាប់ឃុំបែបនេះ»។

សូមរម្លឹកផងដែរថា លោក វ៉ន ពៅ ត្រូវបានតុលាការបើកសវនាការលើបណ្តឹងសុំនៅក្រៅឃុំចំនួន ៤ លើករួចមក​ហើយ គឺនៅសាលាដំបូងរាជធានី ចំនួនពីរលើក និងនៅសាលាឧទ្ធរណ៍ចំនួនពីរលើក ដោយពុំមានវត្តមាន​ជនជាប់​ចោទ ហើយតុលាការក៏បានបដិសេធបណ្តឹងសុំនៅក្រៅឃុំនោះទាំងបួនលើកផងដែរ។ អ្នកទាំងអស់នោះសាលា​ដំបូង​រាជធានីភ្នំពេញ គ្រោងនឹងបើកសវនាការនៅថ្ងៃទី២៥ ខែមេសា ឆ្នាំ២០១៤ខាងមុខនេះ។

កាពីថ្ងៃទី ១៩ ខែមេសា សម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (C.CAWDU) ប្រកាសបើកយុទ្ធនាការ នៅដើមខែក្រោយនេះ ដើម្បីជំរុញឲ្យស្ថាប័នពាក់ព័ន្ធ ឈប់យកប្រព័ន្ធតុលាការ មកគំរាមកំហែង សកម្មជនសហជីព និងរកការដោះលែងកម្មករ និងសកម្មជនសិទ្ធិមនុស្ស២១នាក់៕

------------------------------
ដោយ គិន ង៉ុយ (ទំនាក់ទំនង [email protected]) - ភ្នំពេញ ថ្ងៃទី២២ មេសា ២០១៤

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...