អ្នកវិភាគ៖ គ្រោះថ្នាក់ចរាចរណ៍កើនឡើង ព្រោះវិធានការអាជ្ញាធរខ្សោយ
បូកផ្សំនឹងមូលហេតុមួយចំនួន ដែលបង្កឡើងដោយការបើកបរ មិនគោរពច្បាប់ចរាចរណ៍នោះផង តែចំពោះអាជ្ញាធរវិញហាក់មិនបានចាប់អារម្មណ៍ និងចាត់វិធានការឲ្យបានម៉ត់ចត់ទៅលើ អ្នកមិនគោរពច្បាប់ទាំងនោះទេ។ លោក យ៉ង់ គីមអេង អ្នកវិភាគឯករាជ្យខាងបញ្ហាសង្គម និងជាប្រធានមជ្ឍមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព បានបញ្ជាក់នៅក្នុងកិច្ចសម្ភាសជាមួយទស្សនាវដ្ដីមនោរម្យ.អាំងហ្វូ ថាត្រូវតែធ្វើការផាកពិន័យ ឬក៏ដាក់ទោសទណ្ឌកម្មទៅតាមច្បាប់ដែលបានកំណត់។
គ្រោះថ្នាក់ចរាចរណ៍មួយ នៅថ្ងៃ១០ ខែមេសា ឆ្នាំ២០១៤។ (រូបថតហ្វេសប៊ុក)
គ្រោះថ្នាក់ចរាចរណ៍ - តាមរបាយការណ៍បឋមបានបង្ហាញឲ្យដឹងថា គិតចាប់ពីថ្ងៃទី១៣ ដល់ថ្ងៃទី ១៦មេសា មានគ្រោះថ្នាក់ចរាចរណ៍ចំនួន១៤៨ករណីកើតឡើង ក្នុងនោះបានបណ្តាលឲ្យមនុស្ស៣៨នាក់បានស្លាប់ និង៣០៦នាក់ផ្សេងទៀតរងរបួស។ ខេត្តដែលកើតមានគ្រោះថ្នាក់ចរាចរណ៍ច្រើនជាងគេ គឺខេត្តបន្ទាយមានជ័យ តាកែវ កំពង់ចាម កំពង់ឆ្នាំង កំពត និងបាត់ដំបងជាដើម។
មូលហេតុដែលបណ្តាលឲ្យកើតមានគ្រោះថ្នាក់ចរាចរណ៍នេះ ត្រូវបានរបាយការណ៍នោះឲ្យដឹងទៀតថា ដោយសារតែ អ្នកបើកបរមិនគោរពច្បាប់ចរាចរណ៍ បើកលឿនហួសកំណត់ ការជែងគ្នា ការបត់មិនប្រុងប្រយ័ត្ន និងបើកបរក្នុងស្ថានភាពស្រវឹងស្រវឹងជាដើម។
លោក យ៉ង់ គិមអេង អ្នកវិភាគសង្គមឯករាជ្យ និងប្រធានមជ្ឍមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាពហៅកាត់ថា (PDP) បានលើកឡើងថា កត្តារួមផ្សំធំជាងគេ ដែលនាំឱ្យមានគ្រោះថ្នាក់ចរាចរណ៍ គឺបញ្ហាគ្រឿងស្រវឹង និងកង្វះវិធានការណ៍របស់អាជ្ញាធរ ក្នុងការប្រឆាំងគ្រោះថ្នាក់ចរាចរណ៍នេះ ដែលកើតឡើងជារៀងរាល់ឆ្នាំ។ កត្តាមួយចំនួនទៀតក៏បានបង្កឲ្យមានគ្រោះថ្នាក់ចរាចរណ៍នេះដែរ ដូចជាការបើកបរដោយហួសល្បឿនកំណត់ និងការចេញប័ណ្ណបើកបរឱ្យអ្នកដែលមិនទាន់យល់ពីច្បាប់ចរាចរណ៍ជាដើម។
លោក យ៉ង់ គិមអេងបានដាក់បន្ទុកទៅលើ សមត្ថកិច្ចប៉ូលីសថា៖ «ការបើកបរដោយមានជាតិអាល់កុល តែងបង្កឲ្យមានគ្រោះថ្នាក់ ដឹងលឺទាំងអស់គ្នា ប៉ុន្តែអាជ្ញាធរអត់មានវិធានការណ៍ចំពោះបញ្ហាហ្នឹង»។
លោកបានពន្យល់ពីវិធានការមួយចំនួន ដូចជាអាជ្ញាធរប៉ូលីស គួរតែត្រួតពិនិត្យជាតិអាល់កុលទៅលើអ្នកបើកបរក្នុងពេលបើកបរ អោយបានតឹងរឹង។ ប្រសិនបើអាជ្ញាធរដូចជាប៉ូលីសចរាចរណ៍ ត្រួតពិនិត្យអោយបានត្រឹមត្រូវ ប្រហែលជាបញ្ជៀសបញ្ហាគ្រោះថ្នាក់នេះបានជាច្រើន។ ជាពិសេសត្រូវតែធ្វើការផាកពិន័យ ឬក៏ដាក់ទោសទណ្ឌកម្មទៅតាមច្បាប់ដែលបានកំណត់ ដើម្បីធ្វើឲ្យមានការរាងចាល និងការពារសុវត្តិភាពរបស់ប្រជាពលរដ្ឋ ដែលមានបំណងចង់ដើរលេងសប្បាយជាមួយគ្រួសារក្នុងរដូវបុណ្យទាន៕
---------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី១៨ មេសា ២០១៤