ការជួសជុលពង្រីកផ្លូវនានា នៅក្នុងរាជធានី ឬការសាងសង់ស្ពានអាកាសជាដើម នៅតែមិនអាចទប់ទល់ នឹង​ការកកស្ទះចរាចរណ៍បាន ហើយវាបានក្លាយជាបញ្ហាចោទ សឹងតែជានិច្ចជាកាលហើយ សម្រាប់ប្រជា​ពលរដ្ឋ អ្នករស់នៅក្នុងរាជធានី។ បញ្ហាកកស្ទះ ដែលធ្វើឲ្យពលរដ្ឋទ្រាំមិនបាន ហើយបានផ្ទុះការត្អូញត្អែរឡើង។

ប្រជាពលរដ្ឋដែលធ្វើដំណើរ តាមបណ្តោយផ្លូវម៉ៃដា ឬផ្លូវ ២០០៤ ដែលមានទីតាំង នៅសង្កាត់ទឹកថ្លា ខណ្ឌ​សែនសុខ រាជធានីភ្នំពេញនោះ បានត្អួញត្អែរថា មានការកកស្ទះខ្លាំងខុសធម្មតា ក្នុងមួយរយៈកាល​ចុង​ក្រោយ​នេះ។ អ្នកទាំងនោះ ប្រាប់ឲ្យដឹងថា មូលហេតុមួយ នៅក្នុងមូលហេតុច្រើនផ្សេងទៀត ដែលនាំអោយ​ផ្លូវ​ស្ទះ គឺ​មក​ពីគ្មានការសហការគ្នា រវាងអ្នកបច្ចេកទេសធ្វើផ្លូវ និងអ្នកបច្ចេកទេសធ្វើលូ។

ពលរដ្ឋទាំងនោះ បានបន្ថែមទៀតថា នៅពេលគម្រោងជួសជុលផ្លូវ គឺធ្វើតែផ្លូវ ហើយបានបង្កការកកស្ទះ មួយ​សារទៅ។ ដល់ពេលបច្ចុប្បន្ន ដែលធ្វើផ្លូវ ជិតរួចរាល់ជាស្ថារពរ ហើយដែលអ្នកដំណើរ សង្ឃឹមថាបាន​ធ្វើ​ដំណើរ​ស្រួលនោះ ស្រាប់តែបន្តគាស់ផ្លូវធ្វើរួច ទៅសាងសង់លូម្តង ធ្វើឲ្យផ្ទុះការកកស្ទះ ជាថ្មីម្តងទៀត។ ពលរដ្ឋ​ទាំង​នោះ បានសម្ដែងជាចម្ងល់ឡើងថា ហេតុអ្វីបានសាលារាជធានីភ្នំពេញ ធ្វើផ្លូវបានល្អហើយ បែរជារៀបចំ​ដាក់​លូ ក្រោយពេលធ្វើផ្លូវនោះរួចទៅវិញ?

ប្រជាពលរដ្ឋបានបន្ថែមទៀតថា បញ្ហាទាំងនេះ មិនមែនមានតែនៅលើផ្លូវម៉ៃដា ឬផ្លូវ២០០៤នេះទេ បើ​ទោះ​ជា នៅតាមបណ្តាផ្លូវនានា ក្នុងរាជធានីភ្នំពេញផ្សេងទៀត ក៏មានការរៀបចំជួសជុលផ្លូវថ្នល់ មានលក្ខណៈ ដូច​គ្នា​ដែរ៖ នោះ គឺនៅពេលដែលធ្វើផ្លូវរួច តាំងសាលារាជធានីភ្នំពេញ រៀបចំដាក់លូជាក្រោយហើយ។

ទស្សនាវដ្តីមនោរម្យ.អាំងហ្វូ មិនអាចសុំការបំភ្លឺ ចំពោះបញ្ហាខាងលើនេះ ពីលោក ឡុង ឌីម៉ង់ អ្នកនាំ​ពាក្យ​សាលា​រាជធានីភ្នំពេញ បានទេ នៅពេលភ្លាមៗ ដោយទូរស័ព្ទលោក មិនអាចទាក់ទងបាន។ ទស្សនាវដ្ដី​នឹង​ព្យាយាម ស្វែងរកការបញ្ជាក់ ដើម្បីធ្វើការចុះផ្សាយ នៅក្នុងអត្ថបទក្រោយ៕