ប្រទេសអូស្ត្រាលី ដែលនាំមុខក្នុងការរុករកយន្ដហោះប៊ូអីង បាត់ខ្លួនតាំងពីដើមខែមីនា រហូតមកនោះ បានប្រកាស​នៅព្រឹក​ថ្ងៃទី១៤ ខែមេសានេះ ក្រុមអ្នករុករករបស់ខ្លួន បានរកឃើញស្នាម«បែកធ្លាយប្រេង»ដ៏ចម្លែក នៅក្នុង​មហា​សមុទ្រឥណ្ឌា ហើយបានអះអាងថាខ្លួននឹងបញ្ជូនប្រអប់យន្ដជ្រមុជទឹក ឲ្យចុះទៅរកយន្ដហោះក្នុងពេលឆាប់ៗនេះ។

ស្នាមប្រេងត្រូវបានរកឃើញអណ្ដែតនៅលើសមុទ្រ នៅព្រឹកថ្ងៃច័ន្ទទី១៤ ខែមេសា ឆ្នាំ២០១៤។ (រូបថត Reuters)

បាត់យន្ដហោះ - ប្រទេសអូស្ត្រាលី បានត្រៀមខ្លួនរួចជាស្រេចហើយ ថាខ្លួននឹងបញ្ជូន«ប្រអប់យន្ដជ្រមុជទឹក»​ឲ្យចុះ​ទៅក្រោមសមុទ្រ ដើម្បីរុករករូបរាងកាយនៃយន្ដហោះ ប៊ូអីង របស់ក្រុមហ៊ុនអាកាសចរណ៍ ម៉ាឡេស៊ី​អ៊ែរឡាញ ដែល​បានបាត់ខ្លួនតាំងពីថ្ងៃទី៨ ខែមីនានោះមក។ ការថ្លែងអះអាងនេះ បានធ្វើឡើងបន្ទាប់ពីប្រទេសដែលបាននាំមុខក្នុង​យុទ្ធនាការរុករកនេះ បានរកឃើញការបែកធ្លាយប្រេង ដ៏សំខាន់មួយបានអណ្ដែតឡើង នៅក្នុងតំបន់រុករក។

នៅក្នុងសន្និសីទសារព័ត៌មាន នៅព្រឹកថ្ងៃចន្ទទី១៤ខែមេសានេះ លោក អេនហ្គឺស ហ៊ូស្ដុន (Angus Houston) អ្នកដឹក​នាំការសម្របសម្រួល (JACC) នៃ​បណ្ដា​ប្រទេស​ចូលរួម​នៅក្នុងយុទ្ធនាការស្វែងរក បានថ្លែងថា នាវា Ocean Shield របស់ប្រទេសអូស្ត្រាលីនឹងបញ្ឈប់ការរុករុករបស់ខ្លួន ពីរលកសម្លេងនៃប្រអប់ខ្មៅនៅថ្ងៃនេះ ហើយនឹងដាក់​ពង្រាយ​«ប្រអប់យន្ដជ្រមុជទឹកប្រភេទ ប៊្លូហ្វីន ២១ (Bluefin-21) ក្នុងពេលឆាប់ៗខាងមុខនេះ»។

រលកសម្លេង ដែលក្រុមអ្នករុករកបានទទួលចុងក្រោយគេបំផុត តាំងពី៦ថ្ងៃមុន ទំនងជានឹងមិនអាចរក​ឃើញជា​បន្ត​ទៅទៀតទេ។ លោក អេនហ្គឺស ហ៊ូស្ដុន បានបន្ថែមថា «យើងដល់ពេលត្រូវចុះរុករកក្នុងទឹកហើយ»។ ប្រអប់ខ្មៅមាន​អាយុកាលរបស់វាត្រឹមតែ៣០ថ្ងៃប៉ុណ្ណោះ បន្ទាប់ពីវាបានធ្លាក់ចូលទៅក្នុងទឹក។ ដូច្នេះ បើគិតមកទល់នឹងថ្ងៃនេះ ប្រអប់​ខ្មៅទាំងនោះប្រហែលជា បាន«ស្លាប់»ទៅហើយ។

ប្រេង២លីត្រដែលបានរកឃើញ កំពុងទទួលការវិភាគ

នាវា Ocean Shield បានរកឃើញស្នាមប្រេងទាំងនោះនៅយប់ថ្ងៃអាទិត្យ ពីស្នាមប្រេងនៅលើតំបន់រុករក ដែល​តំបន់​នេះត្រូវបានគេ​កំណត់​តាំងពី២សប្ដាហ៍មកហើយ។ លោក អេនហ្គឺស ហ៊ូស្ដុន បានបន្តទៀតថា «បរិមាណប្រេង​ប្រមាណជា២លីត្រ ត្រូវបានប្រមូលយក ហើយនឹងត្រូវយកទៅធ្វើការវិភាគ តែលទ្ធផលពីការវិភាគនេះ នឹងមិន​អាច​ត្រូវបានឲ្យដឹងក្នុងពេលភ្លាមៗនេះឡើយ»។ ប៉ុន្តែលោកបានថ្លែងថា ប្រេងទាំងនេះ មិនដូចជាប្រេងដែលចេញ​ពី​នាវា​សមុទ្រនោះទេ។

ប្រអប់យន្ដ ប៊្លូហ្វីន ២១ ដែលនឹងត្រូវដាក់ជ្រមុជចុះទៅក្នុងសមុទ្រនោះ នឹងមានបណ្ដោយប្រមាណជា ៤,៩៣ ម៉ែត្រ ហើយបំពាក់ទៅដោយឧបករណ៍បញ្ជូនរលកសម្លេងមួយ ដើម្បីទាក់ទងជាមួយនឹងតួរយន្ដហោះបាត់ខ្លួន។ ប្រអប់​យន្ដនេះ តែងត្រូវបានគេយកមកប្រើនៅក្នុងជម្រៅសមុទ្រជ្រៅៗ សម្រាប់យុទ្ធនាការរុករកបំណែកផ្សេងៗ (ផ្នែក​បូរាណវិទ្យាក្រោមទឹក និងសមុទ្រវិទ្យា)។ គេក៏ប្រើប្រអប់យន្ដនេះ នៅក្នុងការស្វែងរកគ្រាប់មីន ដាក់បង្កប់ក្រោម​សមុទ្រនោះដែរ។

បន្ទាប់ប្រព័ន្ធបញ្ជូនសម្លេងរបស់ប្រអប់យន្ដ បានរកឃើញរលកសម្លេងអ្វីមួយ ប្រអប់យន្ដនេះ នឹងត្រូវគេលើក​ឡើង​មកលើវិញ ដើម្បីបំពាក់ឲ្យវានូវម៉ាស៊ីថតម្ដងវិញ មុននឹងទម្លាក់វាសារជាថ្មី ចុះទៅក្នុងទឹក។ ប្រអប់យន្ដនេះ មិនអាច​បំពាក់ក្នុងពេលតែមួយ នូវម៉ាស៊ីថត និងឧបករណ៍បញ្ជូនសម្លេងនោះផងបានទេ។ វាមានទម្ងន់៧៥០គីឡូក្រាម ហើយនៅក្នុងទឹកប្រមាណជា២០ម៉ោង ប៉ុន្តែវាអាចជ្រមុជចុះទៅក្នុងសមុទ្រ បានតែត្រឹមជម្រៅជ្រៅបំផុត ៤៥០០ម៉ែត្រ​ប៉ុណ្ណោះ៕

-----------------------------------------------
ដោយ សេក មនោរកុមារ (ទំនាក់ទំនង៖ [email protected]) - ប៉ារីស ថ្ងៃទី១៤ មេសា ២០១៤