ការរគ្រោងទុករបស់ក្រុមអ្នកតវ៉ា ដើម្បីអោយដោះលែងអ្នកទាំង២១នាក់ ដែលគ្រោងធ្វើពិធីបួងសួង​នៅតុលាការ​កំពូលមិនបានសម្រេច ដោយសារមានការរារាំងពីសមត្ថកិច្ច​ មិនអោយក្រុមអ្នកតវ៉ាទាំងនោះ​ដង្ហែរក្បួនទៅធ្វើពិធី​បួងសួងរបស់ពួកគេបាន។ មិនត្រឹមតែប៉ុណ្ណោះ មានការដកហូតនូវសម្ភារៈរបស់ក្រុមអ្នកតវ៉ាយកទៅបាត់នោះ ថែមទៀត។

ក្រុមអ្នកតវ៉ាបានធ្វើពិធីបួងសួង នៅមុខរូបចម្លាក់តេជោមាស តេជោយ៉ត ថ្ងៃទី៣ ខែមីនា ឆ្នាំ២០១៤។ (រូបថត MONOROOM.info/ O.Vary)

សិទ្ធិ - នៅថ្ងៃទី០៣ ខែមិនា ឆ្នាំ២០១៤នេះ ពិធីហែក្បួនទៅមុខតុលាការកំពូល ដើម្បីបួងសួងដើម្បីអោយ​តុលាការ​ដោះលែងអ្នកជាប់ឃុំអ្នកទាំង២១នាក់ នៅគុកត្រពាំងផ្លុងខេត្តកំពុងចាម ត្រូវបានរារាំងពីសំណាក់​កងកម្លាំង​សមត្ថកិច្ច។ ខណៈដែលអ្នកចូលរួមទាំងនោះ មកពីសហគមន៍បឹងកក់ បូរីកីឡា ថ្មគោល និងសហគមន៏ដែល​មាន​ជម្លោះដីធ្លីដទៃទៀត មានគ្នាប្រមាណជា១០០នាក់ ដោយមានស្លៀកពាក់ឈុតសរបៀបជាក្បួនដង្ហែរសព និង​តែង​ខ្លួនជាលោកតាដំបងដែក ព្យាយាមហែក្បួនទៅកាន់តុលាការកំពូល ទាមទារឲ្យដោះលែងអ្នកជាប់ឃុំ២១នាក់នោះ ពួកគេត្រូវ​បានកងកម្លាំងសមត្ថកិច្ចចម្រុះ ដាក់របាំងរាំងផ្លូវ មិនអោយក្រុមអ្នកតវ៉ាទាំងនោះ ទៅមុខតុលាការ​កំពូល​ឡើយ។

ព្រឹត្តិការណ៍នៃការបិទផ្លូវ បានបណ្តាលមានការប៉ះទង្គិចគ្នារវាង កងកម្លាំងសមត្ថកិច្ច និងក្រុមអ្នកតវ៉ាដែល​ស្ថិត​នៅ​ក្បែរព្រះបរមរាជវាំង។ ក្នុងអំឡុងពេលនោះ កម្លាំងសន្តិសុខខណ្ឌដូនពេញ និងកម្លាំងរាជធានីភ្នំពេញ បានរឹបអូស​យកឧបករណ៍បំពងសំឡេង ស្គរ និង សម្ភារៈខ្លះពីក្រុមតវ៉ាទាំងនោះ។ យ៉ាងណាមិញក្នុងពេលប៉ះទង្គិចគ្នា​មិន​មាន​ខាងណារបួស និងចាប់ខ្លួនឡើយ។ បើទោះបីមានការបិទផ្លូវរារាំង និងយកសម្ភារៈមួយចំនួន មិនអោយក្រុមអ្នកតវ៉ា​ទៅធ្វើពិធីបួងសួងនៅតុលាការកំពូលយ៉ាងណាក៏ដោយ ក្រុមអ្នកតវ៉ាទាំងនោះ​បានប្តូទិសដៅមកបួងសួង​នៅមុខ​រូប​ចម្លាក់តេជោយ៉ត តេជោមាសវិញ។

ការដកហូតសម្ភារៈ របស់ក្រុមអ្នកតវ៉ាបញ្ចេញមតិដោយអហិង្សាខាងលើ ត្រូវបានលោក ណៃ វ៉ង់ដា អនុប្រធានផ្នែក​សិទ្ធិមនុស្ស និង​មេធាវីតំបន់របស់សមាគមការពារសិទ្ធិមនុស្សអាដហុក ចាត់ទុកថា ជារឿងមួយដែលខុសច្បាប់។ មន្រ្តីសង្គមស៊ីវិលបានថ្លែងពន្យល់ថា ការដែលអាជ្ញាធរដកហូតសម្ភារៈ និង​រារាំងអ្នកតវ៉ាបញ្ចេញដោយសន្តិវិធី នៅ​ភ្នំពេញបច្ចុប្បន្ន វាកើតឡើងជាប្រពៃណីទៅហើយ។ លោកបានអោយដឹង​ទៀតថា វប្បធម៌បែបនេះ សមត្ថកិច្ចគួតែ​បញ្ឈប់ ព្រោះការដកហូតយកសម្ភារៈ ការលួចបន្លំឆ្មក់យកកាមរ៉ា ឬទូរស័ព្ទ​វាមិនមែនរឿងត្រឹមត្រូវនោះទេ ព្រោះ​ខ្លួន​ជាសមត្ថកិច្ច និងជាអ្នកអនុវត្តច្បាប់។

បើទោះជាលោកនាយករដ្ឋមន្ត្រី ហ៊ុន សែន បានប្រកាសដកបម្រាមហាមជួបជុំលើសពីដប់នាក់ហើយក៏មែនពិត តែ​សកម្មភាពនៃការរារាំងនៅព្រឹកថ្ងៃច័ន្ទនេះ ត្រូវបានលោក ណៃ វ៉ង់ដា ថ្លែងបញ្ជាក់ថា «ការរិតត្បិតសេរីភាព​នៃការ​ជួបជុំតវ៉ាបញ្ចេញមតិនៅតែមាន ប្រសិនបើមានការអនុញ្ញាតពិតប្រាកដ គួរអនុញ្ញាតអោយគេធ្វើ ហើយមិនត្រូវ​ដក​ហូត​សម្ភារៈគេនោះទេ។ បើសិនជាអាជ្ញាយល់ថា ការដង្ហែក្បួនរបស់គាត់ប៉ះពាល់ ដល់សណ្តាប់ធ្នាប់សាធារណៈ គួតែឲ្យពួកគាត់ទៅទីលានប្រជាធិបតេយ្យ។»

សកម្មភាពរបស់កងកម្លាំង និងការចោទប្រកាន់ខាងលើ ទស្សនាវដ្ដីមនោរម្យ.អាំងហ្វូ នៅមិនទាន់ទទួលបានប្រតិកម្ម និងការឆ្លើយបំភ្លឺ របស់សាលារាជធានីភ្នំពេញនៅឡើយ មកទល់នឹងម៉ោងនេះ។

ការជួបជុំធ្វើពិធីបួងសួងនៅព្រឹកនេះដែរ អ្នកស្រី យ៉ោម បុប្ផា សកម្មជនតវ៉ានៅតំបន់បឹងកក់ បានអោយដឹងថា ដើម្បី​បួងសួងដល់វត្ថុស័ក្កសិទ្ធិ អ្នកមានរិទ្ធិបរមីអោយបន្ទន់ចិត្តតុលាការ អោយដោះលែងអ្នកទាំង២១នាក់ ដែលកំពុងជាប់​ឃុំនៅក្នុងពន្ធនាគារ។ អ្នកស្រីបានបញ្ជាក់យ៉ាងដូច្នេះទៀតថា «ពិធីនៅថ្ងៃនេះដែរ យើងក៏បួងសួងដាក់​បណ្តាសារ​ដល់មន្រ្តីដែលពុករលួយខុបខិតយកដីរាស្រ្ត សូមអោយអ្នកទាំងអស់ហ្នឹងមានចិត្តកែប្រែខ្លួន ប្រសិនបើមិនកែប្រែ​ខ្លួន​ទេសូមអោយវត្ថុស័ក្កសិទ្ធិ បារាមុខមន្រ្តីដែលខិលខូចអស់នោះ»៕

-----------------------------------------------
ដោយ ក. ចាន់នីតា (ទំនាក់ទំនង៖ [email protected]) - ភ្នំពេញ ថ្ងៃទី ០៣ មិនា ២០១៤