ការសម្ដែងក្ដីឈឺចាប់របស់ក្រុមអ្នកតវ៉ា ទាមទារសិទ្ធិសេរីភាពរបស់ពួកគេ ចេះតែចេញមកជាបន្តបន្ទាប់។ ប៉ុន្តែនៅ​ពេលដែលការជួបជុំរបស់ពួកគេ កន្លងមកថ្មីៗ តែងត្រូវបានរារាំងដោយកងកម្លាំងអាជ្ញាធរនោះ ពួកគេបានធ្វើការ​ប្រៀបធៀបការរិតត្បិតទាំងនេះ ថាមិនខុសអ្វីទៅនឹងការចាប់ចង ឬជាប់នៅក្នុងគុកឥតជញ្ជាំងនោះទេ។

ពីធីរម្លឹកខួបប្រាំឆ្នាំ នៃការចាកចេញដោយបង្ខំ និងការឈឺចាប់នៃ«អតីតអ្នកតំបន់ដីក្រហម» ថ្ងៃទី២៤ ខែមករាឆ្នាំ២០១៤។ (រូបថត MONOROOM.info/ O. Vary)

សិទ្ធិមនុស្ស - រដ្ឋាភិបាលធ្វើអ្វីមិនច្បាស់លាស់នោះទេ តែរាល់សកម្មភាពដែលគាត់បានធ្វើ ក្នុងពេលកន្លងមក​មិន​ដែលគោរពសិទ្ធិមនុស្ស ធ្វើឲ្យប្រទេសខ្មែររីកចំរើន ល្បីល្បាញនោះទេ ដែលចាត់ទុក«រាស្រ្តខ្លួនឯងជាសត្រូវ»។ «រដ្ឋាភិបាលមិនគ្រប់ទឹក» ស្ទាក់ស្ទើរៗ មិនដឹងថានឹងធ្វើអ្វីឲ្យបានពិតប្រាកដ។ នេះជាការលើកឡើងរបស់អ្នកស្រី ទេព វន្នី មុខអតីតសហគមន៍ដីក្រហមការពីព្រឹកថ្ងៃទី២៤ ខែមករានេះ។

ស្ត្រីសកម្មជនទាមទារសិទ្ធិដីធ្លីរូបនេះ បានបរិហាក្រុម​អាជ្ញាធរថា មិនដែលធ្វើអ្វី ដែលផ្ដល់ផលចំណេញ ឬផលល្អ​ទៅរដ្ឋាភិបាលខ្លួនឯងនោះទេ តែងតែធ្វើឲ្យរដ្ឋាភិបាលនោះ​ធ្លាក់ទឹករហូត ដូចជាការហាមប្រាមមិនឲ្យជួបជុំ ការ​មិន​ឲ្យធ្វើការតស៊ូមតិ ការប្រើកម្លាំងសន្តិសុខសួនមកវាយ ចាប់ ប្រជាពលរដ្ឋដែលសម្តែងមតិជាដើម។

អ្នកស្រីបានចាត់ទុក ការចេញច្បាប់របស់រដ្ឋាភិបាលនេះ ថាជាការចេញ«ច្បាប់»ខុសពីគេ។ «ប្រទេសកម្ពុជា​កាន់លទ្ធិ​ប្រជាធិបតេយ្យ ចេញច្បាប់មកទៅជាច្បាប់កុម្មុយនីស។» រដ្ឋាភិបាល មិនគួណាយកកម្លាំងថែរសួន របស់សាលា​ខណ្ឌ​ដូនពេញ មកវាយតប់ ចាប់ចងប្រជាពលរដ្ឋដោយកម្រោល ជេរប្រមាថព្រះសង្ឃ ដែលខុសពីតួនាទីសន្តិសុខថែសួន។ «អ្វីដែលបានធ្វើនេះមិនត្រូវតាមស្តង់ដានៃអ្នកដឹកនាំឡើយ។ គាត់ធ្វើអ្វីកាន់តែច្រើន កាន់តែធ្លាក់ទឹកទៅៗ»។

ឯប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជា លោក ស ម៉ូរ៉ា បានធ្វើការកត់សម្គាល់ថា កន្លង​មកលោកឃើញមានខ័ណ្ឌដូនពេញ ដែលជាខ័ណ្ឌមួយចូលចិត្តប្រើនូវអំពើហិង្សា និងការរិតត្បិតនូវសេរីភាព ក្នុងការ​បញ្ចេញមតិរបស់ប្រជាពលរដ្ឋ។ លោកបានលើកឡើងថា រាល់ការជួបជុំដែលត្រូវធ្វើឡើងក្នុងខ័ណ្ឌដូនពេញ តែង​តែ​មានក្រុមសន្តិសុខពាក់មួយខ្មៅ មកដេញប្រជាពលរដ្ឋមិនឲ្យជួបជុំគ្នា។

ប្រធានសហព័ន្ធសហជីពរូបនេះ បានលើកឡើងថា នៅកម្ពុជាក្នុង​ស្ថានភាព​បច្ចុប្បន្ននេះ មិនអាចយកកម្លាំង​ហាម​ឃាត់ ការចាប់ខ្លួនមកធ្វើជាដំណោះស្រាយទេ។ «ការតស៊ូរបស់​ប្រជាពលរដ្ឋ​មិនត្រូវបានបញ្ឈប់ទេ ការចាប់តំណាង​របស់គេ ការចាប់គ្រួសាររបស់គេមកដាក់គុក ទៅបាញ់ ទៅបង្កឲ្យមានការ​រងគ្រោះ និងបញ្ហានានាទៀត ដែល​មិន​ព្រមដោះ (ស្រាយ)នោះ។ (…) ប្រជាពលរដ្ឋតែងតែខ្លាច តែមិនមានជម្រើស តើអាចឲ្យពួកគាត់ទៅណា? ចង់​មិន​ចង់​គាត់ត្រូវតែស៊ូ ត្រូវតែប្រថុយប្រថាន ត្រូវតែសម្រេចចិត្ត។ មិនមានអ្វីខុសគ្នាពីការចាប់ខ្លួន ពីការនៅក្នុងពន្ធនាគារទេ បើសេរីភាពនៃការចាប់ខ្លួន ត្រូវបានរិតត្បិតនោះ។»

ចំពោះអ្នកស្រីទេព វន្នី បានចាត់ទុកថា ទង្វើទាំងនេះជាការសហការគ្នា ជាលក្ខណៈប្រព័ន្ធតាំងពីថ្នាក់ក្រោម រហូត​ដល់ថ្នាក់លើ។ នៅពេលមានការចាប់ក្នុងលក្ខណៈធ្ងន់ធ្ងរ តែងតែមានការដោះសារពីស្ថាប័នមួយទៅស្ថាប័នមួយ។ «ការប្រើប្រាស់កម្លាំងរបស់សាលាខ័ណ្ឌដូនពេញនេះ មិនបានគោរពទៅតាមតួនាទីរបស់ខ្លួនទេ។ ពួកគេតែង​តែ​រាត​ត្បាតទូទាំងរាជធានីតែម្តង ដែលមានអំណាចគ្របដណ្តប់លើក្រសួងមហាផ្ទៃ ស្នងការក្រុង ក៏ដូចជាអគ្គស្នងការ​នគរបាលជាតិ។ (...) ក្នុងតួនាទីគ្រាន់តែជាអ្នកថែរក្សាសួនសោះ តែមានអំណាចខ្លាំង ដើរកកូរ អុកឡុក វាយចាប់ចង​ប្រជាពលរដ្ឋដោយសេរី ដែលគ្មានអ្នកណាម្នាក់ ហ៊ានបញ្ឈប់ទង្វើរបស់ពួកគាត់ទេ។»

មិនចំពោះតែករណី នៃការប្រើប្រាស់កម្លាំងក្នុងឯកសណ្ឋានជាសន្តិសុខ ជាមួយនឹងការពាក់មួកសុវត្តិភាព​ពណ៌ខ្មៅ​នោះទេ តែកន្លងមក ក៏មានក្រុមមួយផ្សេងទៀត ដែលក្នុងឯកសណ្ឋានជាជនស៊ីវិល និងពាក់មួកសុវត្តិភាព​ពណ៌​ខ្មៅ​នេះ ត្រូវបានដាក់ពង្រាយពេញមុខសាលាដំបូងរាជធានីភ្នំពេញ កាលពីថ្ងៃទី១៤ ខែមករា ឆ្នាំ២០១៤កន្លងមកនេះ ក្នុង​ពេលមេគណបក្សប្រឆាំងចូលខ្លួន តាមការកោះហៅរបស់ព្រះរាជអាជ្ញានោះ។

ករណីទាំងពីរខាងលើនេះក៏ត្រូវបានបដិសេធដោយលោក ផៃ ស៊ីផាន អ្នកនាំពាក្យនៃទីស្តីការគណៈរដ្ឋមន្ត្រី និងលោក ឡុង ឌីម៉ង់ អ្នកនាំពាក្យសាលារាជធានីភ្នំពេញថា មិនបានដឹងជាក្រុមទាំងនោះចេញមកពីប្រភពណាទេ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី២៤ ខែមករា ឆ្នាំ២០១៤